Mocabꞌ co xajanej co bꞌa yedꞌ jun yolyibꞌan̈qꞌuinal tic
4
¿Bꞌajtil scot juntzan̈ oval yedꞌ chichoncꞌolal dꞌa e cal?
¿Tom man̈oc juntzan̈ malaj svachꞌil tze nibꞌejoch chiꞌ sqꞌue bꞌulnaj yacꞌan oval dꞌayex?
Ichaton chiꞌ tzꞌaj spitzvi juntzan̈ oval chiꞌ.
2 Tze nibꞌejoch junoc tasi,
palta max acꞌjilaj dꞌayex.
Yuj chiꞌ,
ayex tze nibꞌej tze milcham junoc anima.
Ayoch e pensar e nibꞌanoch junoc tasi,
palta max eyacꞌlaj ganar yacꞌji dꞌayex.
Yuj chiꞌ,
tzeyajcꞌolej e bꞌa eyacꞌan oval.
Max acꞌjilaj dꞌayex yujto max e cꞌanlaj dꞌa Dios.
3 Vachꞌchom tze cꞌanaꞌ,
palta man̈ ol acꞌjoclaj dꞌayex,
yujto malaj svachꞌil e pensar ayic tze cꞌanani.
A e naani to ol acꞌjoc dꞌayex,
yic a dꞌa spatic juntzan̈ chucal tze nibꞌejoch tzeyacꞌ lajvoc.
4 A ex tic,
icha junoc ix ix,
an̈ej ajmulal tzecꞌ sayaꞌ,
ich ex taꞌ dꞌa yichan̈ Dios.
¿Tom man̈ eyojtacoc to ayic sco xajanan co bꞌa yedꞌ yolyibꞌan̈qꞌuinal tic,
tzon̈ och ajcꞌolal dꞌa Dios?
Yuj chiꞌ,
a mach sgana xajanan yolyibꞌan̈qꞌuinal tic,
tzꞌoch ajcꞌolal dꞌa Dios.
5 ¿Tom tze naꞌa to malaj yelcꞌoch Slolonel Dios Tzꞌibꞌabꞌilcani?
Aton jun tzꞌalan icha tic:
A Dios ix yacꞌoch cajan Yespíritu dꞌayon̈.
Axo Yespíritu chiꞌ,
snibꞌej to an̈ej ayon̈ yic dꞌa juneln̈ej,
xchi.
6 Yuj chiꞌ ecꞌalxo svachꞌcꞌolal syacꞌ dꞌayon̈.
Icha syal dꞌa Slolonel chiꞌ:
A Dios schacanel ebꞌ syicꞌchaan̈ sbꞌa,
axo pax dꞌa ebꞌ emnaquil syutej sbꞌa,
syacꞌ val svachꞌcꞌolal,
xchi.
7 Yuj chiꞌ,
co cꞌanabꞌajejec Dios.
Co tecꞌbꞌejec co bꞌa co chacanel vin̈ diablo,
yic ol bꞌat vin̈ elelal dꞌayon̈.
8 Co nitzecoch co bꞌa dꞌa Dios,
axo ol snitzpaxcot sbꞌa dꞌayon̈.
A ex malaj svachꞌil e pensar,
bꞌoec e bꞌeybꞌal.
A ex ayoch e pensar dꞌa Dios,
ay pax och e pensar dꞌa yolyibꞌan̈qꞌuinal tic,
vachꞌ bꞌoejec e pensar chiꞌ.
9 Ochan̈ec dꞌa cuscꞌolal.
Sicꞌsicꞌanan̈ec eyoqꞌui.
Ocꞌan̈ec sicꞌlabꞌil.
Meltzajocabꞌ och e tzeej dꞌa oqꞌuel.
Meltzajocabꞌ och e tzalajcꞌolal dꞌa cuselal.
10 Emnaquilocabꞌ tzex ajoch dꞌa Cajal,
axo ol ex icꞌanchaan̈.
Max yal-laj calan pecal
11 Ex vucꞌtac ex vanabꞌ,
man̈xo eyal-laj e pecal junjun ex.
A mach tzꞌalan specal junocxo yetcreyenteal,
ma syacꞌoch dꞌa yibꞌan̈,
syalelcꞌochi to a sley Dios syal specal ma spatiquejeli.
Palta tato sco patiquejel sley Dios,
syalelcꞌochi to man̈ vanoc co cꞌanabꞌajani,
palta to van calani to malaj yelcꞌoch jun ley chiꞌ.
12 Palta an̈ejton Dios ix bꞌoan ley,
an̈ejton Juez yaji,
A syal on̈ scolani,
syal pax on̈ sataneli.
Yuj chiꞌ,
a exxo,
¿tom ay eyalan eyic eyacꞌanoch dꞌa yibꞌan̈ junocxo mach?
Man̈ cojtacoc tas caj qꞌuicꞌan
13 Abꞌec mach ex van eyalan icha tic:
A ticnaic,
ma qꞌuicꞌan,
tzon̈ bꞌat dꞌa junoc chon̈abꞌ.
Ol on̈ aj junoc abꞌil taꞌ.
Ol cacꞌanoch co chon̈,
ol cacꞌan ganar co tumin,
xe chi.
14 Palta man̈ eyojtacoc tas eyaj qꞌuicꞌan chiꞌ.
A co qꞌuinal tic,
junn̈ej rato tzꞌeqꞌui.
Icha yaj xobꞌal lum luum,
junn̈ej rato sqꞌue vaan,
yedꞌn̈ej chiꞌ numumi satxiemi,
icha chiꞌ yecꞌ jun co qꞌuinal tic.
15 Más vachꞌ icha tic tzeyalaꞌ:
Tato ol el dꞌa scꞌool Dios Cajal to pitzan on̈to,
ol co cꞌulej jun tic,
ma junocxo,
xe chi.
16 Palta a exxo,
ton̈ej tzeyicꞌchaan̈ e bꞌa,
tzeyacꞌan acꞌumtaquil.
Masanil ebꞌ icha chiꞌ syutej sbꞌa,
malaj svachꞌil ebꞌ dꞌa yichan̈ Dios.
17 Tato snachajel cuuj tas nibꞌej Dios sco cꞌulej,
palta tato max co cꞌanabꞌajej,
tzꞌoch co mul dꞌa Dios chiꞌ.