Hebreos sbꞌi jun carta tic, aton jun carta tic tzꞌibꞌabꞌilbꞌat dꞌa juntzan̈ ebꞌ creyente israel sacleminac yajbꞌati, yujto ijan val sjavi schabꞌcꞌolal ebꞌ yuj juntzan̈ yaelal sjavi dꞌa yibꞌan̈ ebꞌ yuj ebꞌ ajcꞌool. Spechji bꞌeyecꞌ ebꞌ yic syactej ebꞌ yacꞌanoch Dios dꞌa scꞌool, yic sbꞌeybꞌalejpax juntzan̈ yicham bꞌeybꞌal ebꞌ icha dꞌa yalan̈taxo. A jun mach tzꞌibꞌannac jun carta tic, jantac cꞌaybꞌubꞌal syacꞌ dꞌa ebꞌ, syacꞌan val yojtaquejel ebꞌ to an̈ej Jesucristo ix acꞌjicot yuj Dios.

A dꞌa jun carta tic syalaꞌ to a Jesús Yuninal Dios, yuj chiꞌ yelxo ecꞌbꞌal yelcꞌoch dꞌa yichan̈ ebꞌ schecabꞌ Dios, dꞌa yichan̈ ebꞌ ángel, dꞌa yichan̈ vin̈aj Moisés yedꞌ dꞌa yichan̈ vin̈aj Josué. A val Dios ix alani to a Jesús Sat Sacerdote yaj dꞌa juneln̈ej. Yelxopax ecꞌbꞌal snivanil yelcꞌoch dꞌa yichan̈ ebꞌ sacerdote sbꞌinaj dꞌa slolonel tzꞌibꞌabꞌilcani. An̈ej yuj Jesús syal scolchaj masanil anima dꞌa schucal. Tato syacꞌoch ebꞌ dꞌa scꞌool, tzꞌelcancot ebꞌ dꞌa scal xivcꞌolal yedꞌ dꞌa chamel. An̈ej Jesús syal yacꞌan colnabꞌil dꞌa yel, yuj chiꞌ ay juntzan̈ scꞌaybꞌubꞌal Dios tzꞌibꞌabꞌilcan dꞌa slolonel chꞌoxnabꞌil yaji.

A jun mach tzꞌibꞌannacbꞌat jun carta tic, a tzꞌalan yuj yabꞌixal juntzan̈ anima dꞌa slolonel Dios tzꞌibꞌabꞌilcani, yic syojtaquejel juntzan̈ abꞌix chiꞌ ebꞌ creyente, yic stecꞌbꞌej sbꞌa ebꞌ masanto dꞌa slajvubꞌ, syacꞌanpaxoch spensar ebꞌ dꞌa juntzan̈ schꞌoxnac Cristo. Slajvi juntzan̈ lolonel tic yedꞌ cachnabꞌil, aj pensaril yedꞌ stzatzil scꞌool ebꞌ creyente.