A Scarta San Pablo
DꞌA VIN̈AJ FILEMÓN
Tzꞌel yich scarta vin̈aj Pablo
1
A in Pablo in tic,
ay in och dꞌa preso,
yujto svacꞌoch in pensar dꞌa Cristo Jesús.
A in yedꞌ vin̈ cucꞌtac Timoteo,
sco tzꞌibꞌejbꞌat jun co carta tic dꞌayach ach Filemón.
Te xajan ach cuuj,
yujto quetbꞌeyum co bꞌa dꞌa smunlajel Dios.
2 Tzacꞌ stzatzil scꞌool ebꞌ creyente smolbꞌej sbꞌa dꞌa a pat.
Tzacꞌpax stzatzil scꞌool ix canabꞌ Apia yedꞌ vin̈ cucꞌtac Arquipo,
yujto syacꞌpax val yip vin̈ dꞌa yic Dios quedꞌoc.
3 Aocabꞌ co Mam Dios yedꞌ Cajal Jesucristo syacꞌ svachꞌcꞌolal yedꞌ sjuncꞌolal dꞌayex taꞌ.
Xajan Jesús yuj vin̈aj Filemón
4 Ayic tzin lesalvi,
svacꞌ val yuj diosal dꞌa Dios uuj,
5 yujto svabꞌ dꞌa tic to tzacꞌ val och Cajal Jesús dꞌa a cꞌool.
Svabꞌi to te xajan Cajalil chiꞌ uuj,
tza xajanej pax masanil ebꞌ yicxo Dios.
6 Ay ebꞌ syacꞌoch Cristo dꞌa scꞌool uuj,
yujto ix acꞌoch dꞌa a cꞌool.
Tzin cꞌan dꞌa Dios,
yic ol vachꞌ nachajel yuj ebꞌ to a Cristo Jesús tzꞌacꞌan masanil tas vachꞌ dꞌayon̈.
7 Tzin te tzalaj val uuj ach vucꞌtac,
yujto tza xajanej ebꞌ taꞌ.
Uuj sjavi snivanil in cꞌool dꞌa tic,
yujto tzacꞌ val stzalajcꞌolal ebꞌ creyente taꞌ.
Tas scꞌan vin̈aj Pablo yuj vin̈aj Onésimo
8 Yujto tza xajanej ebꞌ yicxo Dios chiꞌ,
yuj chiꞌ ijan tzin tecꞌbꞌej in bꞌa ach in checan yuj tas yovalil tza cꞌulej taꞌ.
9 Palta mantoc tzach vacꞌ mandar.
Ton̈ej tzin cꞌan dꞌayach yic ol checlajeloc to sco xajanej co bꞌa.
A in Pablo in tic,
icham vinac in xo.
A ticnaic,
ayinto och dꞌa preso,
yujto svacꞌoch in pensar dꞌa Cristo Jesús.
10 Tzin cꞌan val dꞌayach yuj vin̈aj Onésimo,
yujto icha vuninal ix aj vin̈ dꞌa yol preso tic,
yujto ix scha Cristo vin̈ vuuj.
11 A dꞌa yalan̈taxo ayic ix ach yacꞌan servil vin̈,
malaj jabꞌoc yopisio vin̈ dꞌayach.
Axo ticnaic,
te ay yopisio vin̈ dꞌayach* yedꞌ pax dꞌayin.
12 Yuj chiꞌ,
tic tzin checbꞌat vin̈ dꞌayach.
Tza cha vin̈ scꞌochi,
icha tzutej a chaan in cꞌochi.
13 In gana ix aj vin̈ vedꞌ dꞌa tic,
yic tzin yacꞌ servil vin̈,
yic ichato a ach tzul in acꞌ servil dꞌa yol preso tic.
Ay in och dꞌa preso yujn̈ej to svalel vachꞌ abꞌix yic colnabꞌil.
14 Palta malaj in gana tzin bꞌabꞌlaj bꞌoej in trato yedꞌ vin̈ masanto tzin cꞌanbꞌej vabꞌ dꞌayach.
Yujto in gana,
to tzꞌel val dꞌa a cꞌool tzacꞌ pavor dꞌayin yedꞌ vin̈,
man̈ acꞌbꞌiloc pural tzach vutej.
15 Yel toni,
ix el vin̈ elelal dꞌayach jayeꞌ cꞌual.
Palta icham chiꞌ ix aji yic tzꞌajxi vin̈ dꞌayach dꞌa juneln̈ej.
16 A ticnaic man̈xo checabꞌocn̈ej yaj vin̈ dꞌayach.
Másxo nivan yopisio vin̈,
yujto cucꞌtacxo vin̈.
Te xajanabꞌil vin̈ vuuj.
A achxo,
másxo val tza xajanej vin̈ ayic ol cꞌochxoc vin̈ dꞌayach.
Man̈ yujoc to a checabꞌ vin̈ tza xajanej vin̈,
palta yujto yicxo Cajalil yaj vin̈ quedꞌoc.
17 Yuj chiꞌ,
tato tza na vedꞌoc to quetbꞌeyum co bꞌa,
tza cha vin̈ scꞌoch taꞌ ichato a in tzin cꞌochi.
18 Tato ay sbꞌoc vin̈ dꞌayach,
ma ay junocxo smul vin̈ ix ochi,
tzacꞌcan dꞌa in cuenta.
19 A in Pablo in tic ol vacꞌ sbꞌoc vin̈ chiꞌ dꞌayach,
yuj chiꞌ svacꞌ in tiꞌ,
tzin tzꞌibꞌanpaxbꞌat dꞌayach yedꞌ in cꞌabꞌ.
Palta ojtac paxi,
ichato ay a bꞌoc dꞌayin,
yujto vuuj ix a cha Cristo.
20 Yuj chiꞌ vucꞌtac,
acꞌ pavor dꞌayin dꞌa sbꞌi Cajal Jesús.
Acꞌ in tzalajcꞌolal yuj Cristo.
21 Svalbꞌat juntzan̈ tic dꞌayach,
yujto tza cꞌanabꞌajej val.
Vojtac to man̈ocn̈ej tas svalbꞌat tic dꞌayach ol a cꞌulej,
palta ol ecꞌ dꞌa yibꞌan̈ a cꞌulan juntzan̈xo tas.
22 Svalpaxbꞌat junxo tic dꞌayach to tzacꞌ lista jabꞌoc in posado taꞌ.
Talaj icha chiꞌ ol el dꞌa scꞌool Dios,
ol in yacꞌbꞌat dꞌayex taꞌ,
icha tzꞌaj e cꞌanan dꞌa e lesal.
Stzatzil scꞌool vin̈aj Filemón
23 A vin̈ cucꞌtac Epafras tic,
syacꞌbꞌat stzatzil a cꞌool vin̈.
Ayto ochta vin̈ dꞌa preso tic vedꞌoc,
yujto syacꞌpaxoch spensar vin̈ dꞌa Cristo Jesús.
24 Axo ebꞌ smunlaj vedꞌ dꞌa tic,
aton vin̈aj Marcos,
vin̈aj Aristarco,
vin̈aj Demas yedꞌ vin̈aj Lucas,
syacꞌpaxbꞌat stzatzil a cꞌool ebꞌ vin̈.
25 Aocabꞌ Cajal Jesucristo syacꞌ svachꞌcꞌolal dꞌayex taꞌ.