A Chꞌan̈ Carta
DꞌA EBꞌ HEBREO
A Yuninal Dios ix yacꞌlabꞌej slolon dꞌayon̈
1
A dꞌa pecaꞌ tzijtum tas yacꞌlabꞌejnac Dios slolon dꞌa ebꞌ co mam quicham.
Tzijtum el yacꞌlabꞌejnac ebꞌ schecabꞌ yalaneli.
2 Axo dꞌa slajvubꞌ tiempoal tic,
a val Yuninal ix scheccot yal dꞌayon̈.
A yedꞌoc sbꞌonac yolyibꞌan̈qꞌuinal tic yedꞌ masanil tas ay dꞌay.
Yacꞌannac paxcanoch masanil juntzan̈ chiꞌ dꞌa yol scꞌabꞌ.
3 A Yuninal chiꞌ schꞌoxan val el snivanil yelcꞌoch Dios.
Te lajann̈ej spensar yedꞌ Dios chiꞌ.
Yujn̈ej slolonel Yuninal chiꞌ,
vachꞌn̈ej yecꞌ masanil tasi,
yujto a slolonel chiꞌ te nivan spoder.
Ayic ix lajvi yicꞌancanel co mul,
ix bꞌat em cꞌojan dꞌa svachꞌ cꞌabꞌ Dios dꞌa satchaan̈.
Snivanil yelcꞌoch Yuninal Dios
4 A Yuninal Dios chiꞌ,
ecꞌalxo ix aj dꞌa yichan̈ ebꞌ ángel,
yujto a yopisio acꞌbꞌil yuj Smam,
ecꞌalxo nivan yelcꞌoch dꞌa yichan̈ yopisio ebꞌ ángel chiꞌ.
5 Malaj junoc ebꞌ ángel bꞌaj ix yal Dios icha ix aj yalan dꞌa Yuninal.
Aton ix yalan icha tic:
A ach tic Vuninal ach.
A dꞌa jun cꞌu tic ix vacꞌ checlajoc to Vuninal ach,
xchi.
Ayic ix yalanxi Dios icha tic,
man̈ yujoc junoc ebꞌ ángel ix yalaꞌ,
palta yuj Yuninal chiꞌ ix yalaꞌ:
A in tic,
Mamabꞌil ol in aj dꞌay,
axo Uninabꞌil ol aj dꞌayin,
xchi Dios.
6 Ayic ix schecancot jun pitan̈ Yuninal Dios dꞌa yolyibꞌan̈qꞌuinal tic,
ix yalan yuuj:
Emocabꞌ cuman masanil ebꞌ vángel dꞌay,
xchi.
7 Axo yuj ebꞌ ángel yalnac Dios icha tic:
Svacꞌoch ebꞌ vángel icha icꞌal,
axo ebꞌ tzin acꞌan servil,
svacꞌoch ebꞌ icha yoc cꞌaqꞌuil,
xchi.
8 Palta syal pax Dios chiꞌ yuj Yuninal icha tic:
Ach Dios,
Rey achn̈ej dꞌa masanil qꞌuinal.
A ach tic,
tojoln̈ej tzutej acꞌan yajalil dꞌa yibꞌan̈ ebꞌ icoꞌ.
9 Tzach tzalaji,
tato vachꞌ tas scꞌulej ebꞌ anima,
axo tato a chucal scꞌulej ebꞌ jun,
schichon a cꞌool.
Yuj chiꞌ,
a Dios,
aton a Diosal,
Aꞌ ix ach sicꞌaneli,
ix yacꞌan jun nivan tzalajcꞌolal dꞌayach.
A jun chiꞌ,
ecꞌal nivan yelcꞌoch dꞌa yichan̈ icha ix acꞌji dꞌa ebꞌ ajun edꞌoc,
xchi dꞌa Slolonel Dios chiꞌ.
10 Syalanpax icha tic:
Ach Cajal,
atax dꞌa yichbꞌanil a bꞌonaccanem yich yolyibꞌan̈qꞌuinal tic,
a ach pax val lacꞌan a bꞌonaccan satchaan̈.
11 Ol satel masanil juntzan̈ tic,
a achxo jun,
ayachn̈ejeqꞌui.
A juntzan̈ tic ol ixtaxoc,
icha scꞌabꞌicꞌoch junoc cꞌapac.
12 Ol a qꞌuexcanel icha val sqꞌuexanel junoc scꞌa pichul ebꞌ anima,
syumancanel ebꞌ.
A achxo jun,
an̈ejaꞌ aji,
malaj bꞌaqꞌuin̈ ol ach sateloc,
xchican dꞌa Slolonel Dios chiꞌ.
13 Malaj juneloc ix yal Dios dꞌa junoc ángel icha ix yutej yalan dꞌa Yuninal,
ayic ix yalan icha tic:
Eman̈ cꞌojan dꞌa in vachꞌ cꞌabꞌ,
masanto ol vacꞌcanoch ebꞌ ayoch ajcꞌolal dꞌayach dꞌa yalan̈ oc,
xchi dꞌa Yuninal chiꞌ.
14 A ebꞌ ángel chiꞌ,
espíritu ton ebꞌ,
yacꞌumaln̈ej servil Dios yaj ebꞌ.
Checbꞌilcot ebꞌ yic scolvaj ebꞌ dꞌayon̈ a on̈ ol co cha co colnabꞌil dꞌa juneln̈ej.