An̈ejocabꞌ co colnabꞌil sco naꞌa
2
Yuj chiꞌ yovalil scacꞌoch co pensar dꞌa juntzan̈ cꞌaybꞌubꞌal ix cabꞌi,
tato maay,
jabꞌjabꞌil ol on̈ satcaneloc.
2 A slolonel Dios yalnaccan ebꞌ ángel dꞌa ebꞌ co mam quicham dꞌa pecaꞌ,
tzꞌacan ajnac yelcꞌochi.
A ebꞌ man̈ cꞌanabꞌajannacoc jun lolonel chiꞌ,
javinac yaelal dꞌa yibꞌan̈ ebꞌ.
3 Tato icha chiꞌ ajnac ebꞌ chiꞌ,
¿tasto val ol cutoc co colan co bꞌa tato squiqꞌuel co pensar dꞌa jun co colnabꞌil te nivan yelcꞌoch tic?
A val lacꞌan Cajal Jesús bꞌabꞌlaj aljinac yabꞌixal.
Axo ebꞌ abꞌannac,
schꞌoxnac ebꞌ to yel jun abꞌix tic,
ix yalanpax ebꞌ dꞌayon̈.
4 An̈ejtonaꞌ yacꞌnac pax testigoal sbꞌa Dios yuj jun abꞌix tic ayic schꞌoxannac juntzan̈ milagro yedꞌ juntzan̈ tas satubꞌtac yilji,
yic scheclaji to te yel.
An̈ejtonaꞌ ix yacꞌ pax Espíritu Santo dꞌayon̈,
ato syalaꞌ tas opisio sgana syacꞌ dꞌa junjun on̈.
Lajan ix aj Jesucristo quedꞌoc
5 Van valancot yuj junxo yolyibꞌan̈qꞌuinal toto ol javoc.
A jun chiꞌ,
man̈oc dꞌa yol scꞌabꞌ ebꞌ ángel ol yacꞌoch Dios.
6 Yujto ay bꞌaj syal icha tic dꞌa Slolonel Tzꞌibꞌabꞌilcani:
Mamin,
¿tas val jabꞌoc quelcꞌoch a on̈ anima on̈ tic,
yuj chiꞌ tzon̈ a nacoti,
tzon̈ a tan̈van yuj co vachꞌiloc?
7 Ejminac ix on̈ utejcan janicꞌ dꞌa yichan̈ ebꞌ ángel ayic ix on̈ a bꞌoani,
palta nivan quelcꞌoch yuj copisio ix acꞌaꞌ.
8 Ix acꞌanoch masanil tastac bꞌobꞌil uuj dꞌa yol co cꞌabꞌ,
xchi dꞌa Slolonel chiꞌ.
Yuj chiꞌ,
ayic ix yacꞌanoch masanil tas Dios dꞌa yol co cꞌabꞌ,
malaj junoc tas maj yacꞌcan ochi.
A ticnaic maxto quilochlaj tato ix can masanil dꞌa yol co cꞌabꞌ.
9 Palta squiloch Jesús to lajan ajnac quedꞌoc,
yuj chiꞌ a dꞌay tzꞌelcꞌoch masanil tas tzꞌibꞌabꞌilcan chiꞌ,
vachꞌchom malaj val ix aj yelcꞌoch junoc tiempoal dꞌa yichan̈ ebꞌ ángel yuj Dios,
ayic ul yacꞌannacoch sbꞌa animail.
Yuj svachꞌcꞌolal Dios,
yuj chiꞌ ix el dꞌa scꞌool scham Jesús cuuj co masanil.
Axo ticnaic,
te ecꞌbꞌal svachꞌil ix aji,
te nivan yelcꞌochi,
yujto ix yabꞌ syail ayic ix chami.
10 Masanil tas bꞌobꞌil yuj Dios,
yuuj aypaxeqꞌui.
Snibꞌej to masanil ebꞌ yuninal ol cꞌoch bꞌaj ay stziquiquial.
Yuj chiꞌ yovalil ix yabꞌ syail Jesús co Columal,
icha chiꞌ ix aj stzꞌacvielcꞌoch yuj Dios.
A Jesús chiꞌ ix acꞌanem yich co colnabꞌil.
11 A on̈ yic on̈xo Dios,
junn̈ej co Mam yedꞌ jun ix on̈ acꞌanoch yicoc Dios chiꞌ.
Yuj chiꞌ a Yuninal Dios chiꞌ,
max qꞌuixvilaj on̈ yalan yucꞌtacoc ma yanabꞌoc.
12 Icha tic ix yal dꞌa Smam dꞌa Slolonel Dios Tzꞌibꞌabꞌilcani:
Ol valel abꞌixal dꞌa ebꞌ vetchon̈abꞌ.
Ayic ol smolbꞌan sbꞌa ebꞌ,
ol ach in bꞌitej dꞌa scal ebꞌ,
xchi.
13 Yalannac pax icha tic:
A Dios ol vacꞌoch yipoc in cꞌool,
xchi.
An̈ejtonaꞌ syalanpax icha tic:
Ayinn̈ej ecꞌ dꞌa tic yedꞌ ebꞌ vuninal ix yacꞌ Dios dꞌayin,
xchi dꞌa Slolonel Dios chiꞌ.
14 A on̈ tzon̈ och yuninaloc Dios,
chamelbꞌa yaj co nivanil tic.
Yuj chiꞌ yovalil ix och pax snivanil Jesús chamelbꞌail icha co nivanil tic.
Yuj chiꞌ ayic ix chami,
ix yacꞌ lajvoc yopisio jun vin̈ ay spoder smilvaji,
aton vin̈ diablo.
15 A dꞌa yalan̈taxo,
ichato ayon̈ och schecabꞌoc vin̈ diablo chiꞌ,
yujto tzon̈ xiv co chami,
palta a Jesús ix on̈ acꞌancanel dꞌa libre.
16 Val yel,
man̈ yicoc scol ebꞌ ángel ix uleqꞌui,
palta cuuj a on̈ yin̈til on̈ vin̈aj Abraham tic.
17 Yuj chiꞌ,
yovalil lajan ix aj quedꞌoc a on̈ yucꞌtac on̈ tic,
yic vachꞌ tzꞌocꞌ scꞌool dꞌayon̈,
yic pax scꞌanabꞌajej yopisio dꞌa Sat Sacerdoteal dꞌa yichan̈ Dios,
yic aꞌ stupanel co mul.
18 Ix yabꞌ val syail,
ayic ix acꞌji proval.
Yuj chiꞌ a ticnaic syal scolvaj quedꞌoc ayic tzon̈ acꞌji proval.