Ecꞌal yelcꞌoch Jesús dꞌa yichan̈ vin̈aj Moisés
3
Ex vucꞌtac ex vanabꞌ,
yic exxo Dios vedꞌoc,
yujto Aꞌ avtannac on̈ och yicoc.
Yuj chiꞌ co vachꞌ aqꞌuejecoch co pensar dꞌa Cristo Jesús,
yujto schecabꞌ Dios yaj dꞌayon̈.
Sat Sacerdote pax yaji,
icha syal co cꞌaybꞌubꞌal chabꞌil cuuj.
2 A Jesús cꞌanabꞌajum ix yutej sbꞌa dꞌa jun ix acꞌan yopisio,
icha yutejnac vin̈aj Moisés scꞌanabꞌajan dꞌa scal ebꞌ yuninal Dios smasanil yedꞌoc.
3 A junoc bꞌoum pat,
más ecꞌal dꞌa jun pat sbꞌo chiꞌ.
Ichaton chiꞌ Jesús,
más ecꞌal dꞌa yichan̈ vin̈aj Moisés chiꞌ.
4 Junjun teꞌ pat,
ay mach sbꞌoan teꞌ.
Palta a masanil tasi,
a Dios bꞌojinac.
5 A vin̈aj Moisés chiꞌ,
scꞌanabꞌajejnac vin̈ yacꞌan servil dꞌa scal masanil ebꞌ yuninal Dios yedꞌoc,
yujto yacꞌumal servil Dios yaj vin̈.
Ayocto yacꞌannac testigoal sbꞌa vin̈ yuj juntzan̈ tas dꞌin̈an yalan Dios.
6 Palta a Cristo ix scꞌanabꞌajej,
yujto Yuninal Dios.
Aꞌ ayoch Yajalil dꞌa yibꞌan̈ ebꞌ yicoꞌ,
aton ebꞌ yuninalxo Dios yedꞌoc.
Tato tecꞌan scutej cacꞌanoch dꞌa co cꞌool,
tzon̈ tzalaj pax yuj jun ayoch yipoc co cꞌool,
yuninal on̈ ton Dios syal chiꞌ.
Ay jun icꞌoj ip yic ebꞌ yuninal Dios
7 Yuj chiꞌ,
icha syalcan Yespíritu Dios dꞌa Slolonel Tzꞌibꞌabꞌilcani:
A dꞌa jun cꞌu tic,
tato tzeyabꞌ tas syal Dios,
8 man̈ e pitej e bꞌa icha yutejnac sbꞌa ebꞌ e mam eyicham,
a ebꞌ chiꞌ,
spitejnac sbꞌa ebꞌ dꞌayin dꞌa tzꞌinan luum,
yacꞌannac in proval ebꞌ taꞌ.
9 Vachꞌchom 40 abꞌil yilnac juntzan̈ milagro ebꞌ in bꞌonac,
palta an̈ejaꞌ yacꞌlejnac in proval ebꞌ.
10 Yuj chiꞌ cotnac voval,
valannac yuj ebꞌ:
Masanil tiempo chꞌocn̈ej bꞌaj ayoch spensar ebꞌ.
Toxonton malaj sgana ebꞌ yojtacanel in cꞌolbꞌal,
xin chi.
11 Yuj chiꞌ,
cotnac voval dꞌa ebꞌ.
Vacꞌannac in tiꞌ to man̈ ol och ebꞌ dꞌa jun lum luum bꞌaj juncꞌolaln̈ej ol aj ebꞌ,
xchi Dios dꞌa slolonel chiꞌ.
12 Ex vucꞌtac ex vanabꞌ,
tzeyaꞌilej val e bꞌa,
yic malaj junoc ex tze pitej e bꞌa yuj e chabꞌcꞌolal,
yuj chiꞌ tze patiquejel Dios pitzan.
13 Yacbꞌan tzato yalaꞌ,
slaj eyacꞌlaj e tecꞌanil junjun ex dꞌa junjun cꞌu,
yic vachꞌ malaj ex tzex juviel yuj chucal,
malaj ex tzex pitbꞌiel yuuj.
14 Yujto atax dꞌa sbꞌabꞌelal cacꞌnacoch Cristo yipoc co cꞌool.
Tato an̈ejaꞌ tecꞌan scutej co bꞌa cacꞌanoch yipoc co cꞌool masanto dꞌa slajvubꞌ,
ay calan quic yedꞌoc syal chiꞌ.
15 Yujto icha chiꞌ yaj stzꞌibꞌajcani:
A dꞌa jun cꞌu tic,
tato tzeyabꞌ tas syal Dios,
man̈ e pitej e bꞌa,
icha yutejnac sbꞌa ebꞌ e mam eyicham,
ayic spitannac sbꞌa ebꞌ dꞌayin,
xchicani.
16 ¿Mach ebꞌ abꞌannac slolonel Dios tze naꞌa,
slajvi chiꞌ spitannac sbꞌa ebꞌ dꞌay?
Aton masanil ebꞌ coljinac elta yuj vin̈aj Moisés dꞌa Egipto.
17 ¿Mach ebꞌ bꞌaj 40 abꞌil cotnac yoval Dios tze naꞌa?
Aton ebꞌ ochnac smul dꞌay,
yuj chiꞌ chamnac ebꞌ dꞌa tzꞌinan luum chiꞌ.
18 ¿Mach ebꞌ bꞌaj yacꞌnac stiꞌ Dios to man̈ ol cꞌoch ebꞌ bꞌaj juncꞌolaln̈ej ol aj tze naꞌa?
Aton ebꞌ man̈ cꞌanabꞌajannacoc dꞌay.
19 Yuj chiꞌ snachajel cuuj to maj ochlaj ebꞌ bꞌaj juncꞌolaln̈ej tzꞌaj chiꞌ,
yujto maj scꞌanabꞌajej ebꞌ.