4
Yalnaccan Dios to ol yal co cꞌoch bꞌaj ay juncꞌolal.
Yuj chiꞌ yovalil squil co bꞌa,
yic malaj junoc on̈ man̈ ol on̈ tzacꞌvan co cꞌoch bꞌaj ay juncꞌolal chiꞌ.
2 Yujto albꞌilxo vachꞌ abꞌix yic colnabꞌil dꞌayon̈,
icha aj yaljinac dꞌa ebꞌ.
Palta nabꞌan̈ej aljinac jun abꞌix chiꞌ dꞌa ebꞌ,
yujto maj yacꞌoch ebꞌ dꞌa scꞌool ayic yabꞌannac ebꞌ.
3 Palta a on̈xo tic,
juncꞌolalxo caji,
yujto scacꞌoch dꞌa co cꞌool.
Icha tic ajnac yalan Dios yuj ebꞌ co mam quicham chiꞌ:
Vacꞌnac in tiꞌ to man̈ ol och ebꞌ dꞌa jun lum luum bꞌaj juncꞌolaln̈ej ol ajoc,
xchi.
Axo Dios,
atax yic slajvinac sbꞌoan yolyibꞌan̈qꞌuinal tic,
ochnac vaan smunlaji.
4 A Slolonel Dios Tzꞌibꞌabꞌilcani,
aꞌ tzꞌalan yuj yuquil cꞌual icha tic:
A dꞌa yuquil cꞌual sbꞌoan yolyibꞌan̈qꞌuinal tic Dios,
ix och vaan smunlaji,
xchi.
5 Syalanpax icha tic:
Man̈ ol och ebꞌ dꞌa jun lum luum bꞌaj juncꞌolaln̈ej ol ajoc,
xchi.
6 A ebꞌ chiꞌ bꞌabꞌlaj abꞌannac jun vachꞌ abꞌix yic colnabꞌil tic,
palta maj cꞌochlaj ebꞌ bꞌaj juncꞌolaln̈ej tzꞌaj chiꞌ yujto maj scꞌanabꞌajej ebꞌ.
Palta yovalil ay mach ol cꞌoch bꞌaj ay juncꞌolal icha yalnaccan chiꞌ.
7 Yujto ix schꞌox junxo tiempoal Dios,
aton jun tiempoal bꞌaj ayon̈ ecꞌ tic.
Yujto pecatax yalnaccan yuj jun bꞌaj ay juncꞌolal chiꞌ,
schecannac yal vin̈aj David icha ix valaꞌ,
bꞌaj syal icha tic:
A dꞌa jun cꞌu tic,
tato tzeyabꞌ tas syal Dios,
man̈ e pitej e bꞌa dꞌay,
xchi.
8 Qꞌuinaloc cꞌochnac ebꞌ quetisraelal yuj vin̈aj Josué bꞌaj ay juncꞌolal chiꞌ,
majxom yal Dios tato tzato yal coch bꞌaj ay junxo juncꞌolal chiꞌ.
9 Yuj chiꞌ,
a on̈ yicon̈xo Dios tic,
ayto val jun bꞌaj ay juncꞌolal ol yacꞌ dꞌayon̈.
10 Yujto ayic ol yacꞌan jun chiꞌ Dios dꞌayon̈,
icha ajnac yoch vaan smunlaji,
icha chiꞌ ol aj coch vaan co munlaji.
11 Yuj chiꞌ,
caqꞌuec val quip cacꞌanoch Dios dꞌa co cꞌool yic ol on̈ och dꞌa juncꞌolal chiꞌ.
Malajocabꞌ junoc on̈ sco bꞌeybꞌalej sbꞌeybꞌal ebꞌ spitejnac sbꞌa chiꞌ.
12 A slolonel Dios,
pitzan yaji,
ay spoder.
Lajan slolonel chiꞌ icha junoc qꞌuen espada jay ye dꞌa schabꞌil pacꞌan̈.
Yuj chiꞌ,
ichato stecjioch dꞌa co pixan yedꞌ dꞌa co pensar masanto scheclajelta tas caj junjun on̈.
Yujto a schꞌoxanelta tas sco naꞌa yedꞌ tas sco nibꞌej.
13 Malaj junoc mach syal scꞌubꞌanel sbꞌa dꞌa Dios.
Yujto chequeln̈ej masanil tas dꞌa yichan̈,
aton dꞌay ol cacꞌ entregar co cuenta.
A Jesús, tzꞌacꞌanoch co tiꞌ dꞌa Dios
14 Ay val jun tzꞌacꞌanoch co tiꞌ dꞌa Dios,
te nivan yelcꞌochi,
aton Jesús,
Yuninal.
Aꞌ ix cꞌoch dꞌa satchaan̈ dꞌa yichan̈ Dios.
Yuj chiꞌ yovalil tecꞌan scutej co bꞌa cacꞌanoch co cꞌool dꞌa jun cꞌaybꞌubꞌal ix co chaꞌa.
15 A jun tzꞌacꞌanoch co tiꞌ dꞌa Dios,
aꞌ tzꞌocꞌ scꞌool dꞌayon̈ ayic malaj quip,
yujto lajan ix utaj yacꞌji proval ichoc on̈ tic,
palta malaj juneloc ix och smul.
16 Yuj chiꞌ,
max on̈ xiv co cꞌoch dꞌa yichan̈ Dios bꞌaj scheclaj svachꞌcꞌolal,
yic tzꞌocꞌ scꞌool dꞌayon̈ taꞌ,
syacꞌanpax svachꞌcꞌolal dꞌayon̈ ayic te malaj svachꞌil caji.