5
A junjun ebꞌ sat sacerdote a dꞌa co cal a on̈ anima on̈ tic sicꞌjielta ebꞌ.
Tzꞌacꞌji yopisio ebꞌ yacꞌanoch co tiꞌ dꞌa Dios,
syacꞌan ofrenda ebꞌ yedꞌ silabꞌ sn̈usji yuj co mul.
2 Lajan ebꞌ sat sacerdote chiꞌ quedꞌoc,
yujto malaj stecꞌanil ebꞌ.
Yuj chiꞌ syal nivan syutej scꞌool ebꞌ dꞌa ebꞌ max nachajel yuuj yedꞌ dꞌa ebꞌ tzꞌem dꞌa junoc spaltail.
3 A ebꞌ sat sacerdote chiꞌ,
animan̈ej ebꞌ,
yuj chiꞌ yovalil syacꞌpax juntzan̈ silabꞌ n̈usbꞌil chiꞌ ebꞌ yuj smul,
icha juntzan̈ silabꞌ syacꞌ ebꞌ yuj smul ebꞌ anima.
4 Malaj junoc mach scomon aqꞌuejoch sbꞌa dꞌa jun opisio chiꞌ.
An̈ej ebꞌ avtabꞌil yuj Dios syal yochi,
icha ajnac vin̈aj Aarón yuj Dios dꞌa pecaꞌ.
5 Icha pax chiꞌ Cristo,
maj yacꞌochlaj sbꞌa sat sacerdoteal dꞌa yol yicoꞌ,
palta a Dios ix acꞌanoch yopisio.
Icha tic ix yutej yalan dꞌay:
A ach tic,
Vuninal ach.
A dꞌa jun cꞌu tic,
ix vacꞌ checlajoc to Vuninal ach,
xchi.
6 An̈ejaꞌ,
ay pax bꞌaj icha tic syalcan dꞌa Slolonel:
Sacerdote achn̈ej dꞌa juneln̈ej,
icha yopisio vin̈aj Melquisedec,
xchi Dios chiꞌ dꞌay.
7 Ayic ix ecꞌ Jesús dꞌa yolyibꞌan̈qꞌuinal tic,
te chaan̈ ix lesalvi,
ix oqꞌui ayic ix scꞌanan tas dꞌa Dios,
aton jun ay spoder scolanelta dꞌa yol scꞌabꞌ chamel.
Ix abꞌji slesal chiꞌ,
yujto te nanam ix yutej sbꞌa dꞌay.
8 Vachꞌchom Yuninal Dios,
palta yuj juntzan̈ yaelal ix yabꞌi snachajel yuuj chajtil syutej scꞌanabꞌajani.
9 Ayic ix yicꞌanelcꞌoch sbꞌa masanil tas nabꞌil yuuj,
ix acꞌji yopisio yacꞌan colnabꞌil dꞌa juneln̈ej dꞌa masanil ebꞌ scꞌanabꞌajan tas syalaꞌ.
10 Yuj chiꞌ a Dios ix acꞌan yopisio yoch sat sacerdoteal icha yopisio vin̈aj Melquisedec dꞌa pecaꞌ.
Ay smay co meltzajxi dꞌa co patic
11 Tzijtumto tas in gana sval dꞌayex yuj jun tic,
palta ajaltac calani tas syalelcꞌochi,
yujto te pural snachajel eyuuj.
12 Ayxo stiempoal eyacꞌan och dꞌa e cꞌool.
Smoj to tzaxo e cꞌaybꞌej ebꞌ yicxo Dios ticnaic.
Palta ina an̈ej juntzan̈ scꞌaybꞌubꞌal Dios man̈ ajaltacoc tze nibꞌej tzꞌalchajxi dꞌayex,
yujto maxto canlaj eyuuj.
Mantalaj e tecꞌanil,
lajan ex icha junoc neneꞌ unin vanto schuni,
maxto ujilaj svaꞌi.
13 A juntzan̈ cꞌaybꞌubꞌal chiꞌ,
icha lech,
ichn̈ej taꞌ.
Yuj chiꞌ a ebꞌ sgana yabꞌan juntzan̈ chiꞌ,
an̈ejaꞌ lajan ebꞌ icha junoc neneꞌ unin.
An̈ejaꞌ maxto nachajel yuj ebꞌ tas scutej co tojolbꞌitan co bꞌeybꞌal.
14 Axo juntzan̈ cꞌaybꞌubꞌal pural snachajeli,
lajan icha tas syabꞌlej ebꞌ icham anima.
Yuj chiꞌ,
a ebꞌ scꞌaybꞌan juntzan̈ chiꞌ,
aton ebꞌ tecꞌanxo spensar.
Cꞌaynac ebꞌ snaaneli bꞌaja juntzan̈ tas vachꞌ yedꞌ juntzan̈ chuc.