6
Axo ticnaic,
caqꞌuec quip co bꞌat dꞌa quichan̈,
yic stecꞌcꞌaj co pensar.
A ticnaic canocabꞌ juntzan̈ bꞌabꞌel cꞌaybꞌubꞌal syal yuj Cristo.
Mocxobꞌ co cꞌaybꞌejeclaj juntzan̈ bꞌabꞌel cꞌaybꞌubꞌal ol val tic.
Aton juntzan̈ tzꞌalani to sco na co bꞌa dꞌa jun bꞌeybꞌal tzon̈ icꞌanbꞌat dꞌa chamel,
aton jun bꞌeybꞌal max yal on̈ scolani.
Syalanxi to scacꞌoch Dios dꞌa co cꞌool.
2 Syalanpax yuj bautismo.
Syalanxi yuj ebꞌ syaqꞌuecꞌ scꞌabꞌ dꞌa co jolom ayic tzꞌoch copisio.
Syalanxi to ol on̈ pitzvocxi dꞌa scal ebꞌ chamnac.
Syalanxi to ol cot yaelal dꞌa yibꞌan̈ ebꞌ anima dꞌa juneln̈ej.
Aton juntzan̈ cꞌaybꞌubꞌal tic,
cꞌocbꞌilxo cabꞌani.
3 A ticnaic,
ayto val juntzan̈xo ol co cꞌaybꞌej tato syal scꞌool co Mam Dios.
4 A on̈xo tic,
ichato tzꞌictajabꞌilxo co pensar.
Chabꞌilxo jun silabꞌ Dios te vachꞌ cuuj.
Ay calan quic dꞌa Espíritu Santo.
5 Cojtacxo svachꞌil slolonel Dios.
Cojtacxo spoder ol checlaj dꞌa jun tiempo toto ol javoc.
6 Yuj chiꞌ,
tato ay mach syiqꞌuel sbꞌa dꞌa Cristo,
maxtzac yal smeltzaj junelxo yic sna sbꞌa.
Yujto ayic smeltzaj dꞌa spatic,
syalelcꞌochi to a val lacꞌan van yacꞌanoch Yuninal Dios dꞌa spenec teꞌ culus junelxo.
Van yacꞌan qꞌuixvelal sbꞌa dꞌa yichan̈ ebꞌ anima.
7 Yujto a on̈ tic,
lajan on̈ icha lum luum.
Ayic syacꞌan n̈abꞌ,
syucꞌbꞌat aꞌ luum.
Ay lum luum vachꞌ avbꞌen syacꞌ dꞌa ebꞌ smunlaj dꞌa sat.
Yuj chiꞌ syacꞌ svachꞌcꞌolal Dios dꞌa luum.
8 Ay pax lum luum nabꞌa qꞌuiix,
nabꞌa an̈ cꞌultacn̈ej sqꞌuibꞌ dꞌa sat.
Malaj jabꞌoc syaxil.
Yuj chiꞌ scatabꞌaj luum yuj Dios,
axo dꞌa slajvubꞌalxo,
stzꞌabꞌat luum smasanil.
A tas scacꞌoch yipoc co cꞌool
9 Palta a ex,
ex xajanabꞌil cuuj,
vachꞌchom scalbꞌat juntzan̈ tic dꞌayex,
palta scacꞌoch yipoc co cꞌool to man̈ ex lajanoc yedꞌ ebꞌ scal tic,
palta ol checlajel juntzan̈ vachꞌil dꞌayex schꞌoxani to ay e colnabꞌil.
10 Yujto a Dios tojol spensar.
Man̈ ol satlaj scꞌool dꞌa juntzan̈ tas ix e cꞌulej yedꞌ chajtil ix aj e xajanani,
ayic ix ex colvaj dꞌa ebꞌ yicxo Dios.
An̈ejtonaꞌ tze cꞌulejn̈ej paxi.
11 Palta co gana to tze cꞌulejn̈ej juntzan̈ tic dꞌa masanil tiempo,
yic vachꞌ tzꞌacan ol e cha jun spac van e tan̈vani.
12 Co gana to man̈ jaraganaoc tzeyutej e bꞌa dꞌa yic Dios.
Bꞌeybꞌalejec sbꞌeybꞌal ebꞌ syacꞌ val och scꞌool dꞌay,
ebꞌ tecꞌan val syutej sbꞌa,
yujto a ebꞌ icha chiꞌ syutej sbꞌa,
van schaan juntzan̈ tas yalnaccan Dios to ol yacꞌ dꞌa ebꞌ.
13 Ayic yacꞌannac stiꞌ Dios dꞌa vin̈aj Abraham dꞌa pecaꞌ,
munil Aꞌ slocnac sbꞌi,
yujto malaj junoc mach ecꞌal dꞌa yichan̈.
Yuj chiꞌ man̈ slocnacoc junocxo bꞌi.
14 Yalnac icha tic dꞌa vin̈:
Val yel nivan in vachꞌcꞌolal ol vacꞌ dꞌayach.
Tzijtum in̈tilal ol vacꞌcan pitzvoqueli,
xchi dꞌa vin̈.
15 Axo vin̈aj Abraham chiꞌ,
nivan yutejnac scꞌool vin̈ stan̈vani,
yuj chiꞌ schanac jun bꞌaj yacꞌnac stiꞌ Dios chiꞌ vin̈.
16 Ayic sco locan sbꞌi junoc mach,
an̈ej junoc mach ecꞌal dꞌa quichan̈ sco locoꞌ.
Ayic scalan junoc tas te yel,
sco loc sbꞌi junoc mach,
yic man̈xa mach stelaj sbꞌa quedꞌoc.
17 An̈ejtonaꞌ,
icha chiꞌ yutejnac Dios yacꞌan stiꞌ,
munil slocnac sbꞌa schꞌocoj,
yujto sgana schꞌox dꞌayon̈ to yel ol quiquej tas bꞌaj yacꞌnac stiꞌ,
malaj jabꞌoc tas ol sqꞌuexaꞌ.
18 Yujto slocnac sbꞌi Dios ayic yacꞌannac stiꞌ,
yuj chiꞌ a tas yalnac,
malaj bꞌaqꞌuin̈ ol qꞌuexmajoc,
yujto max yesejlaj.
A tas yalnac chiꞌ,
syacꞌ val snivanil co cꞌool,
yujto a on̈ tic cacꞌnacoch co bꞌa dꞌa yol scꞌabꞌ yic tzon̈ scoloꞌ.
Van co tan̈vani tas ol yacꞌ dꞌayon̈,
yuj chiꞌ a scacꞌoch yipoc co cꞌool.
19 Te tecꞌan yaj co pensar ticnaic,
yujto scacꞌoch jun chiꞌ yipoc co cꞌool.
Lajan yaj icha junoc barco te ay yip syamnubꞌ syamanoch vaan.
A jun ayoch yipoc co cꞌool chiꞌ,
ayxo och dꞌa spatic och cꞌapac smacul snan̈al yol stemplo Dios ay dꞌa satchaan̈.
20 Ataꞌ bꞌabꞌel ochnac Jesús dꞌa quichan̈ yic sjacan dꞌayon̈.
Yujto malaj bꞌaqꞌuin̈ ol yactej yoch Sacerdoteal,
icha yopisio vin̈aj Melquisedec.