A Jesús Sat Sacerdote icha yopisio vin̈aj Melquisedec
7
A vin̈aj Melquisedec chiꞌ,*
rey vin̈ dꞌa chon̈abꞌ Salem dꞌa pecaꞌ.
Yacꞌnac sacerdoteal vin̈ dꞌa Dios,
aton Dios te nivan yelcꞌoch dꞌa yichan̈ masanil.
A junel,
xidꞌecꞌ vin̈aj Abraham yacꞌ oval yedꞌ juntzan̈ ebꞌ rey,
yacꞌji ganar ebꞌ yuj vin̈.
Axo yic spaxta vin̈,
axo vin̈aj Melquisedec chiꞌ xidꞌ cꞌuman vin̈ dꞌa yol bꞌe.
Scꞌanan svachꞌcꞌolal Dios vin̈ dꞌa yibꞌan̈ vin̈aj Abraham chiꞌ.
2 Axo vin̈aj Abraham chiꞌ acꞌan sdiezmoal jantacn̈ej tas yacꞌ ganar dꞌa jun oval chiꞌ dꞌa vin̈aj Melquisedec chiꞌ.
A sbꞌi vin̈ chiꞌ syalelcꞌochi,
rey te tojol.
An̈ejtonaꞌ sreyal pax chon̈abꞌ Salem.
A Salem syalelcꞌochi,
juncꞌolal.
Yuj chiꞌ scuchan pax vin̈ sreyal juncꞌolal.
3 Man̈ chequeloc mach smam snun vin̈,
mach pax smam yicham vin̈.
Malaj bꞌaj syalcan dꞌa Slolonel Dios Tzꞌibꞌabꞌilcan yuj yaljubꞌal vin̈ yedꞌ pax yuj schamel vin̈.
Yuj chiꞌ schꞌoxnabꞌil Yuninal Dios yaj vin̈,
yujto ochnac vin̈ sacerdoteal dꞌa masanil tiempo.
4 Nachajocabꞌel eyuuj ticnaic to te nivan yelcꞌoch vin̈aj Melquisedec chiꞌ.
Yujto yacꞌnac sdiezmoal masanil tas xidꞌ yacꞌnac ganar vin̈ co mam quicham Abraham dꞌa vin̈.
5 Syal dꞌa ley Moisés to a ebꞌ sacerdote,
aton ebꞌ yin̈tilal Leví,
ay yalan yic ebꞌ schaan sdiezmoal masanil tas ay dꞌa ebꞌ quetchon̈abꞌ,
vachꞌchom yin̈tilal Abraham ebꞌ yedꞌ ebꞌ.
6 Axo vin̈aj Melquisedec chiꞌ,
vachꞌchom man̈ yin̈tilaloc Leví yaj vin̈,
palta schanac sdiezmo vin̈aj Abraham chiꞌ vin̈,
aton vin̈ bꞌaj yacꞌnac stiꞌ Dios.
Scꞌanannac svachꞌcꞌolal Dios vin̈ dꞌa yibꞌan̈ vin̈aj Abraham chiꞌ.
7 Cojtac to a mach scꞌanan svachꞌcꞌolal Dios dꞌa yibꞌan̈ junocxo anima,
más nivan yelcꞌoch dꞌa yichan̈ jun schaan svachꞌcꞌolal Dios chiꞌ.
8 A ticnaic,
a ebꞌ schaan sdiezmo ebꞌ quetchon̈abꞌ,
chamelbꞌa anima yaj ebꞌ.
Palta a Slolonel Dios tzꞌalani to ichato pitzanto vin̈aj Melquisedec chiꞌ.
9 A dꞌa pecaꞌ,
a vin̈aj Leví chaannac sdiezmo ebꞌ quetchon̈abꞌ,
palta syal calani to a vin̈ acꞌannac sdiezmo dꞌa vin̈aj Melquisedec chiꞌ ayic yacꞌannac yic vin̈aj Abraham dꞌa vin̈.
10 Yujto ayic xidꞌnaquecꞌ vin̈aj Melquisedec chiꞌ scꞌumej vin̈aj Abraham chiꞌ,
manto aljilaj vin̈aj Leví chiꞌ.
Aytooch vin̈ dꞌa snivanil vin̈aj Abraham chiꞌ,
yujto a vin̈ ay yin̈til vin̈.
11 A ebꞌ co mam quicham a dꞌa yol scꞌabꞌ ebꞌ sacerdote yin̈tilcan vin̈aj Aarón,
vin̈ cotnac dꞌa yin̈tilal vin̈aj Leví schanac ley Moisés ebꞌ.
Qꞌuinaloc tato ix yal sbꞌoan spensar ebꞌ quetchon̈abꞌ chiꞌ ebꞌ dꞌa yichan̈ Dios,
¿tasto val yuj ix och junxo sacerdote icha yopisio vin̈aj Melquisedec,
man̈ ichaoc ajnac vin̈aj Aarón chiꞌ?
12 Tato ix qꞌuexvi stzolal smunlaj ebꞌ sacerdote chiꞌ,
yovalil pax sqꞌuexvi ley Moisés syal chiꞌ.
13 A jun van yalji tic,
aton Cajal Jesús.
A Cajal tic,
man̈oc vin̈aj Leví ay yin̈tilal.
Chꞌoc junxo macan̈ ebꞌ israel ay yin̈tilal.
A dꞌa scal jun macan̈ ebꞌ chiꞌ,
malaj junoc ebꞌ ix och sacerdoteal.
14 Cojtac to a Cajal chiꞌ,
a vin̈aj Judá ay yin̈tilcani.
Axo vin̈aj Moisés,
malaj tas yalnaccan vin̈,
tato ay junoc ebꞌ yin̈tilal vin̈aj Judá chiꞌ syal yoch sacerdoteal.
15 Snachaj val el jun tic cuuj,
yujto a junxo sacerdote janac,
aton Cajal Jesús,
jun lajan yaj yedꞌ vin̈aj Melquisedec.
16 Ix och Cristo sacerdoteal yujto malaj bꞌaqꞌuin̈ ol chamoc,
man̈ yujoc to dꞌa junoc in̈tilal sicꞌbꞌilcanel icha yalan ley ix coti.
17 Yujto ix yal Dios dꞌay:
Malaj bꞌaqꞌuin̈ ol actej och Sacerdoteal,
icha yopisio vin̈aj Melquisedec,
xchi dꞌay.
18 Yuj chiꞌ,
a jun ley dꞌa yalan̈taxo,
lajvinac yopisio,
yujto malaj tzꞌochi.
Nabꞌan̈ej ayeqꞌui.
19 Malaj junoc mach bꞌonac spensar yuj jun ley chiꞌ.
Palta ay junxo ecꞌal svachꞌil ochnac sqꞌuexuloc.
Aton jun chiꞌ ayoch yipoc co cꞌool.
Yujn̈ej jun chiꞌ syal co nitzanoch co bꞌa dꞌa stzꞌey Dios.
20 Ayic ix sbꞌoan jun tic Dios,
locbꞌil val sbꞌi yuuj.
21 Ayic ix och yopisio ebꞌ sacerdote dꞌa pecaꞌ,
maj sloclaj sbꞌi Dios chiꞌ.
Palta ayic ix och Cristo sacerdoteal,
ato taꞌ ix sloc sbꞌi.
Yujto tzꞌibꞌyajcan dꞌa Slolonel Dios icha tic:
Ix yacꞌ stiꞌ Cajal,
malaj bꞌaqꞌuin̈ ol sqꞌuexaꞌ,
yalnaccan icha tic:
Malaj bꞌaqꞌuin̈ ol actej och Sacerdoteal,
icha yopisio vin̈aj Melquisedec,
xchicani.
22 A junxo strato yacꞌnac chiꞌ,
ecꞌto svachꞌil dꞌa yichan̈ jun sbꞌabꞌlaj aqꞌuejnac.
Axo Jesús tzꞌacꞌanelcꞌoch jun trato chiꞌ.
23 Vachꞌchom tzijtum ebꞌ sacerdote ochnac dꞌa jun opisio chiꞌ,
palta man̈ junoc ebꞌ munlajnac dꞌa masanil tiempo,
yujto scham ebꞌ.
24 Palta axo Jesús chiꞌ,
man̈xalaj bꞌaqꞌuin̈ ol chamoc.
Yuj chiꞌ masanil tiempo ay yopisio yacꞌanoch co tiꞌ dꞌa Dios.
25 Yuj chiꞌ,
a on̈ ix on̈ acꞌjioch yicoc Dios yuuj,
syal tzon̈ colchaj yuuj dꞌa juneln̈ej,
yujto pitzann̈ej dꞌa juneln̈ej,
yic stevi dꞌa Dios cuuj.
26 Yuj chiꞌ,
ayton val yopisio jun sat sacerdote chiꞌ dꞌayon̈,
aton jun vachꞌn̈ej toni.
Malaj jabꞌoc schucal ma smul ochnac.
Man̈ lajanoc yedꞌ ebꞌ ajmul.
A Dios ix icꞌanchaan̈ dꞌa yibꞌan̈ ebꞌ ay dꞌa satchaan̈.
27 Man̈ lajanoc icha juntzan̈xo ebꞌ sat sacerdote.
Yujto a ebꞌ chiꞌ yovalil syacꞌ juntzan̈ silabꞌ ebꞌ sn̈uschaj dꞌa junjun cꞌu.
Sbꞌabꞌlaj aqꞌuej yic ebꞌ yuj smul,
ichato chiꞌ syacꞌanpax ebꞌ yuj smul ebꞌ yetanimail,
palta a Jesús,
juneln̈ej ix yacꞌ jun silabꞌ yuj co mul co masanil,
aton yic ix yacꞌanoch sbꞌa dꞌa yol scꞌabꞌ chamel cuuj.
28 A ebꞌ ochnac sat sacerdoteal yuj ley Moisés,
anima ebꞌ,
ay spaltail ebꞌ.
Palta ayic ix lajvi yopisio jun ley chiꞌ,
ix yaqꞌuelcꞌoch jun stiꞌ Dios yacꞌnaccani,
aton yacꞌannac yopisio junxo sat sacerdote,
aton Yuninal,
jun ix acꞌanelcꞌoch masanil tas nabꞌil yuj Dios chiꞌ.