A jun schabꞌil strato Dios
8
Aton juntzan̈ ix val tic,
in gana snachajel eyuuj to icha chiꞌ yaj jun co sat sacerdote chiꞌ.
Cꞌojanxoem dꞌa svachꞌ cꞌabꞌ Dios bꞌaj ay dꞌa satchaan̈ ticnaic.
2 Van smunlajoch dꞌa yopisio chiꞌ dꞌa yol stemplo Dios te yel,
aton jun a val lacꞌan Cajal chiꞌ bꞌoannac.
Man̈oc ebꞌ anima bꞌoannac.
3 Junjun ebꞌ sat sacerdote,
ay yopisio ebꞌ yacꞌan juntzan̈ ofrenda dꞌa Dios yedꞌ juntzan̈ silabꞌ sn̈usji.
Yuj chiꞌ,
yovalil ay pax tas syacꞌ Cristo chiꞌ dꞌa Dios.
4 Qꞌuinaloc an̈ejaꞌ ayecꞌ dꞌa yolyibꞌan̈qꞌuinal tic ticnaic,
man̈xom oclaj sacerdote yaj dꞌa Dios,
yujto ay juntzan̈xo ebꞌ sacerdote ay yopisio yacꞌan juntzan̈ ofrenda icha syal ley Moisés.
5 Palta chꞌoxnabꞌiln̈ej yaj yopisio ebꞌ chiꞌ dꞌa tas ay dꞌa satchaan̈,
ichato yen̈uln̈ej yaji.
Cojtac to ton̈ej chꞌoxnabꞌil yaji,
yujto ayic manto bꞌoji scajnubꞌ Dios yuj vin̈aj Moisés chiꞌ,
yal Dios chiꞌ dꞌa vin̈:
Abꞌi,
tza bꞌo masanil icha val jun yechel in chꞌoxnac dꞌayach dꞌa jolom vitz tic,
xchi dꞌa vin̈.
6 Palta a jun co sat sacerdote ticnaic,
ecꞌal svachꞌil yopisio dꞌa yichan̈ yopisio ebꞌ chiꞌ.
Yujto a tzꞌacꞌanelcꞌoch jun strato Dios yacꞌnac dꞌayon̈.
A jun strato chiꞌ,
más vachꞌ dꞌa yichan̈ jun bꞌabꞌel,
yujto a juntzan̈ tas bꞌaj yacꞌnac stiꞌ Dios,
ecꞌal te vachꞌ.
7 Qꞌuinaloc tato malaj junoc tas ix yacꞌ palta dꞌa jun bꞌabꞌel trato chiꞌ,
man̈xom yovaliloc ix yacꞌ junxo schabꞌil trato tic.
8 Palta yilnac Dios to palta yutejnac sbꞌa ebꞌ anima chiꞌ.
Yuj chiꞌ icha tic syalcan dꞌa Slolonel Tzꞌibꞌabꞌilcani:
A Dios Cajal tzꞌalani:
Dꞌa jun tiempoal ol javoc,
ol in bꞌo junxo schabꞌil in trato yedꞌ ebꞌ yin̈tilal Israel yedꞌ pax ebꞌ yin̈tilal Judá.
9 A jun trato chiꞌ,
man̈ lajanoc ol aj yedꞌ jun in trato in bꞌonac yedꞌ ebꞌ smam yicham ebꞌ,
ayic vicꞌannac elta ebꞌ dꞌa yol yic Egipto.
Yujto ayic vicꞌannac elta ebꞌ chiꞌ,
ichato ochnac in quetz quetz dꞌa scꞌabꞌ ebꞌ.
Palta man̈ scꞌanabꞌajejnacoclaj in trato chiꞌ ebꞌ,
yuj chiꞌ vactejnaccan ebꞌ schꞌocoj.
10 Axo junxo schabꞌil in trato ol in bꞌo yedꞌ ebꞌ yin̈tilal Israel bꞌaqꞌuin̈,
icha tic ol vutoc:
Ol vacꞌoch juntzan̈ in checnabꞌil dꞌa spensar ebꞌ,
ichato ol in tzꞌibꞌejcanoch dꞌa spixan ebꞌ.
A in ol in och sDiosaloc ebꞌ.
Axo ebꞌ ol och in chon̈abꞌoc.
11 Man̈xa ebꞌ ol alan dꞌa ebꞌ yetchon̈abꞌ icha tic:
Yovalil tzeyojtaquejel Dios Cajal,
man̈ xchioc ebꞌ.
Yujto ol in yojtaquejel ebꞌ masanil,
vachꞌchom ebꞌ unin,
ma ebꞌ icham anima.
12 Ol vacꞌcan lajvoc schucal ebꞌ.
Man̈xalaj bꞌaqꞌuin̈ ol in nacot smul ebꞌ,
xchi Dios Cajal dꞌa Slolonel chiꞌ.
13 Ayic ix yalancot Dios yuj jun schabꞌil trato tic,
ix schꞌoxoꞌ to ecꞌnacxobꞌat jun bꞌabꞌel trato.
Qꞌuinaloc ay junoc tas ecꞌnacxobꞌat ticnaic,
¿tom ayto yopisio?
Tato man̈xa yopisio,
syalelcꞌochi to van sateli.