A scajnubꞌ Dios
9
A dꞌa jun bꞌabꞌel trato,
ay juntzan̈ checnabꞌil syalaꞌ tas syutej ebꞌ yacꞌanem sbꞌa dꞌa Dios bꞌaj ay scajnubꞌ dꞌa sat luum tic.
2 Icha tic ajnac sbꞌo jun scajnubꞌ chiꞌ:
A jun bꞌabꞌel cuarto,
scuch Yic Dios.
Ataꞌ ay jun bꞌachnubꞌ candil.
Ay jun mexa yedꞌ juntzan̈ pan tzꞌacꞌji dꞌa Dios.
3 Axo dꞌa spatic och jun cꞌapac schabꞌil smacul yool,
ataꞌ ay junxo cuarto,
scuch Yicn̈ej Dios Yaji.
4 Ataꞌ ay jun qꞌuen chaynubꞌ nabꞌa oro bꞌaj sn̈usji incienso.
Ataꞌ ay pax scaxail strato Dios,
aton jun nabꞌa oro spatic.
Axo dꞌa yool,
a jun chen nabꞌa oro ayemi,
ayem maná dꞌa yool.
Axo dꞌa stzꞌey jun chen chiꞌ ayem teꞌ scꞌococh vin̈aj Aarón,
aton jun teꞌ volannac.
Ay paxem juntzan̈ qꞌuen bꞌaj tzꞌibꞌabꞌilcan jun strato Dios.
5 Axo dꞌa yibꞌan̈ jun caxa chiꞌ acꞌbꞌilqꞌue yechel querubín,
yic chequel to a Dios ayecꞌ taꞌ.
Jen̈anqꞌue scꞌaxil ebꞌ dꞌa yibꞌan̈ jun yedꞌtal bꞌaj tzꞌacꞌji juntzan̈ silabꞌ yuj smul ebꞌ quetchon̈abꞌ.
Cꞌocbꞌiln̈ejocabꞌ chiꞌ sval dꞌayex yuj chajtil yilji jun chiꞌ.
6 Ayic yochnac yopisio juntzan̈ chiꞌ,
junjun cꞌu tzꞌoch ebꞌ sacerdote dꞌa jun bꞌabꞌel cuarto chiꞌ,
yic syacꞌ servil Dios ebꞌ taꞌ.
7 Palta axo dꞌa jun schabꞌil cuarto chiꞌ,
an̈ej vin̈ sat sacerdote syal yochi.
Juntac eln̈ej tzꞌoch vin̈ dꞌa junjun abꞌil.
Ayic tzꞌoch vin̈ chiꞌ,
yovalil yedꞌnac schiqꞌuil nocꞌ nocꞌ vin̈,
yic syacꞌ vin̈ silabꞌoc yuj smul,
yuj pax smul ebꞌ quetchon̈abꞌ max yil yochi.
8 Palta a Yespíritu Dios tzꞌacꞌan nachajel junxo tic cuuj:
Yacbꞌan ayto yopisio jun bꞌabꞌel cuarto chiꞌ,
axo junxo cuarto scuchan Yicn̈ej Dios Yaji,
macancani.
9 A juntzan̈ chiꞌ,
chꞌoxnabꞌil yaj dꞌayon̈ dꞌa jun tiempoal tic.
A ebꞌ syal sbꞌa dꞌa Dios yedꞌ juntzan̈ yofrenda yedꞌ juntzan̈ silabꞌ sn̈usji,
max yal-laj yacꞌji sat smul ebꞌ dꞌa scꞌool yuuj.
10 Yujto a juntzan̈ tas scꞌulej ebꞌ chiꞌ,
an̈ej yuj tas sva ebꞌ yedꞌ tas syuqꞌuej ebꞌ syalaꞌ.
Syalanpax yuj chajtil tzꞌaj sacbꞌican juntzan̈ tastac yuuj.
A juntzan̈ checjinac scꞌulej ebꞌ chiꞌ,
yicn̈ej snivanil ebꞌ yaji.
Ayn̈ej yopisio juntzan̈ chiꞌ yuj ebꞌ,
masanto a Dios ix qꞌuexani.
11 Palta ulnacxoecꞌ Cristo,
yuj chiꞌ Aꞌ ayoch co sat sacerdoteoc ticnaic.
Te vachꞌ juntzan̈ tas ix yacꞌ dꞌayon̈,
yujto a junxo scajnubꞌ Dios bꞌaj tzꞌacꞌchaj servil,
másxo te vachꞌ,
malaj jabꞌoc spaltail.
A jun chiꞌ,
man̈ animaoc bꞌojinac,
yujto man̈oc dꞌa yolyibꞌan̈qꞌuinal tic ayeqꞌui.
12 Ayic yochnac Cristo chiꞌ dꞌa juneln̈ej dꞌa jun cuarto Yicn̈ej Dios Yaji,
man̈oc schiqꞌuil nocꞌ quelemtac chiva,
ma nocꞌ quelemtac vacax yacꞌnac silabꞌoc.
A val schiqꞌuil yacꞌlabꞌejnac,
yuj chiꞌ yacꞌnac ganar co colnabꞌil dꞌa juneln̈ej.
13 A schiqꞌuil nocꞌ toro,
schiqꞌuil nocꞌ chiva yedꞌ stan̈il nocꞌ cobꞌestac vacax stzꞌai,
a stzicjibꞌat dꞌa yibꞌan̈ ebꞌ anima man̈ vachꞌoc icha yalan ley,
icha chiꞌ tzꞌutaj ebꞌ,
yic tzꞌochxican ebꞌ vachꞌil dꞌa yichan̈ ley chiꞌ,
palta an̈ej dꞌa snivanil ebꞌ ay yopisio jun chiꞌ.
14 Tato icha chiꞌ yopisio schiqꞌuil nocꞌ nocꞌ chiꞌ,
ocxom val schiqꞌuil Cristo.
A Espíritu ayecꞌ dꞌa masanil tiempo.
Yuuj yacꞌnac och sbꞌa Cristo silabꞌoc dꞌa Dios,
icha junoc nocꞌ nocꞌ malaj jabꞌoc spaltail tzꞌacꞌji silabꞌil.
Yuj chiꞌ a schiqꞌuil chiꞌ syal yicꞌanel dꞌa co pensar juntzan̈ chucal tzꞌacꞌancot chamel dꞌa quibꞌan̈.
Axo ticnaic syal cacꞌan servil Dios pitzan.
15 Yuj chiꞌ,
a Jesucristo tzꞌacꞌan elcꞌoch jun schabꞌil trato chiꞌ.
Ayic ix chami,
ix yacꞌcan lajvoc smul masanil ebꞌ ayecꞌ dꞌa yol scꞌabꞌ jun bꞌabꞌel trato chiꞌ.
Yuj chiꞌ a on̈ avtabꞌil on̈ yuj Dios yicoc,
syal quican jun bꞌaj yacꞌnaccan stiꞌ,
aton co qꞌuinal dꞌa juneln̈ej.
16 Yujto ayic ay junoc chꞌan̈ testamento,*
yovalil scheclaji tato chamnacxo jun bꞌojinac chiꞌ,
yic syal yoch yopisio chꞌan̈.
17 Yujto mantalaj yopisio chꞌan̈ tato pitzanto vin̈ bꞌojinac chꞌan̈ chiꞌ.
Ato scham vin̈,
tzꞌoch yopisio chꞌan̈.
18 Yuj chiꞌ icha chiꞌ yaj jun bꞌabꞌel trato chiꞌ.
Ayic manto och yopisio,
ay juntzan̈ chicꞌ elnac.
19 Yujto a vin̈aj Moisés avtannac masanil juntzan̈ checnabꞌil yic ley yabꞌ ebꞌ co mam quicham.
Slajvi chiꞌ,
yicꞌancot jun scꞌabꞌ teꞌ hisopo vin̈ bꞌacꞌbꞌil dꞌa chacchac lana.
Axo dꞌa scal schiqꞌuil nocꞌ quelemtac vacax,
nocꞌ quelemtac chiva,
calan yaj yedꞌ a aꞌ,
sbꞌat labꞌejem vin̈,
stzicanbꞌat vin̈ dꞌa yibꞌan̈ chꞌan̈ ley yedꞌ dꞌa yibꞌan̈ ebꞌ anima chiꞌ.
20 Slajvi chiꞌ,
yalan vin̈ dꞌa ebꞌ:
A jun chicꞌ tic,
a tzꞌacꞌanelcꞌoch jun strato Dios syacꞌ dꞌayon̈,*
xchi.
21 An̈ejtonaꞌ stzicnacbꞌat juntzan̈ chicꞌ chiꞌ vin̈ dꞌa yibꞌan̈ scajnubꞌ Dios yedꞌ dꞌa juntzan̈ yamcꞌabꞌ ay yopisio taꞌ.
22 Syal ton calan icha syal ley chiꞌ,
ijan val sacbꞌicanel masanil tastac yuj chicꞌ.
An̈ejtonaꞌ malaj junoc mach slajvican smul,
tato malaj chicꞌ tzꞌel yuj smul chiꞌ.
Yacꞌnac sbꞌa Cristo silabꞌoc
23 Yovalil yacꞌnac juntzan̈ silabꞌ chiꞌ ebꞌ,
yic sacbꞌican juntzan̈ chiꞌ masanil.
Palta a juntzan̈ chiꞌ,
yen̈uln̈ej juntzan̈ tas ay dꞌa satchaan̈ yaji.
Axo juntzan̈xo ay dꞌa satchaan̈,
yovalil sacbꞌicanel yuj junxo silabꞌ más nivan yelcꞌochi.
24 Yujto a Cristo,
man̈ ochnacoclaj dꞌa jun stemplo Dios sbꞌonac ebꞌ anima,
yujto a jun chiꞌ,
yen̈uln̈ej jun dꞌa val yel stemplo Dios yaji.
A dꞌa satchaan̈,
ataꞌ ochnac.
Axo ticnaic,
ayecꞌ dꞌa yichan̈ Dios,
van stevi cuuj.
25 A vin̈ sat sacerdote,
junjun abꞌil tzꞌoch vin̈ dꞌa yol jun lugar Yicn̈ej Dios Yaji,
yic syacꞌ juntzan̈ chicꞌ vin̈ silabꞌoc.
Palta man̈oclaj schiqꞌuil vin̈ syacꞌlabꞌej.
Palta axo Cristo man̈ tzijtumeloc ix chami ayic ix yacꞌan sbꞌa silabꞌil.
26 Qꞌuinaloc tato man̈ juneln̈ejoc ix yacꞌ sbꞌa Cristo silabꞌoc,
tecan tzijtumelxo ix chami yictax ix bꞌo jun yolyibꞌan̈qꞌuinal tic.
Palta man̈ ichocta ix aji.
Yujto a dꞌa jun slajvubꞌ tiempoal tic,
juneln̈ej ix uleqꞌui.
A val lacꞌan ix yacꞌoch sbꞌa silabꞌil yic syiqꞌuel co mul.
27 Yovalil juneln̈ej ol cham ebꞌ anima smasanil,
slajvi chiꞌ ol chꞌolbꞌitaj tas yaj ebꞌ.
28 An̈ejtonaꞌ Cristo,
juneln̈ej ix milji silabꞌil,
yuj chiꞌ tzijtum on̈ ix icꞌjiel co mul yuuj.
Ayic ol jax dꞌa schaelal,
man̈xo yujoc yicꞌanel co mul ol jaxoc,
palta ol ja yacꞌ co colnabꞌil a on̈ van co tan̈van sjax tic.