10
A juntzan̈ syal dꞌa ley Moisés,
ichato yen̈uln̈ej yaj dꞌa juntzan̈ vachꞌ tzacꞌanto janac.
Man̈oc val tzꞌicꞌanel co mul,
yujto man̈oclaj jun ley chiꞌ tzꞌicꞌan sbꞌo spensar ebꞌ anima sgana scꞌoch dꞌa Dios yuj juntzan̈ silabꞌ tzꞌacꞌji chiꞌ dꞌa junjun abꞌil.
2 Qꞌuinaloc tato sbꞌo spensar ebꞌ yuj jun ley chiꞌ,
tecan ochnac vaan ebꞌ yacꞌan juntzan̈ silabꞌ chiꞌ.
Qꞌuinaloc tato yel sacbꞌicanel ebꞌ dꞌa smul,
ayic syacꞌan juntzan̈ silabꞌ chiꞌ ebꞌ,
tecan maxtzac snacot smul ebꞌ chiꞌ.
3 Ocxo jun,
yuj juntzan̈ silabꞌ chiꞌ,
snacot smul ebꞌ dꞌa junjun abꞌil.
4 Yujto max yal yicꞌanel co mul schiqꞌuil nocꞌ vacax yedꞌ nocꞌ chiva.
5 Yuj chiꞌ,
ayic ix ulecꞌ Cristo dꞌa yolyibꞌan̈qꞌuinal tic,
ix yal dꞌa Dios:
Max a nibꞌejlaj nocꞌ nocꞌ tzꞌacꞌji silabꞌil dꞌayach,
ma juntzan̈xo ofrenda.
Palta ix acꞌ in nivanil.
6 Max a cꞌanlaj nocꞌ nocꞌ sn̈usjitzꞌa silabꞌil dꞌayach,
ma val silabꞌ yic slajvicanel mul.
7 Yuj chiꞌ sval dꞌayach:
Ach in Diosal,
tic tzin javi yuj in bꞌoan icha tas a gana,
ichataxon yaj stzꞌibꞌchajcan vabꞌixal,
xin chi,
xchi Cristo.
8 A dꞌa sbꞌabꞌelal ix yal Cristo chiꞌ to malaj sgana Dios dꞌa juntzan̈ silabꞌ sn̈usjitzꞌa chiꞌ,
juntzan̈ nocꞌ nocꞌ tzꞌacꞌji dꞌay yuj smul ebꞌ anima.
Vachꞌchom syal dꞌa ley to yovalil tzꞌacꞌji juntzan̈ chiꞌ dꞌa Dios,
palta max tzalajlaj yedꞌoc.
9 Ix lajvi chiꞌ,
ix yalanxi Cristo icha tic:
Ach in Diosal,
tic tzin javi yuj in bꞌoan icha tas a gana,
xchi.
Syalelcꞌochi to ix ul yacꞌ lajvoc yopisio juntzan̈ silabꞌ chiꞌ.
Axo junxo silabꞌ ix yacꞌ sqꞌuexuloc.
10 Yuj chiꞌ a Jesucristo chiꞌ,
a val snivanil ix ul yacꞌ silabꞌoc dꞌa juneln̈ej icha sgana Dios.
Yuj jun silabꞌ chi,
lajvinacxoel co mul.
11 Masanil ebꞌ sacerdote dꞌa scal ebꞌ quetchon̈abꞌ,
lin̈anqꞌue ebꞌ,
ayn̈ejoch ebꞌ dꞌa yopisio junjun cꞌu.
Ichan̈ej chiꞌ yacꞌan juntzan̈ silabꞌ chiꞌ ebꞌ,
palta a juntzan̈ chiꞌ,
max yal-laj yicꞌanel co mul.
12 Palta axo Jesucristo,
junn̈ej silabꞌ yacꞌnac yuj co mul dꞌa juneln̈ej.
Ichato chiꞌ bꞌian,
ix em cꞌojan dꞌa svachꞌ cꞌabꞌ Dios.
13 Ataꞌ van stan̈vani masanto ol can ebꞌ yajcꞌool dꞌa yalan̈ yuj Dios.
14 Yujto juneln̈ej tzꞌacvinac on̈ el yuj jun silabꞌ chiꞌ,
yujto ix lajvicanel masanil co chucal yuuj.
15 Axo Yespíritu Dios syacꞌ testigoal sbꞌa dꞌayon̈ yuj juntzan̈ tic.
Yujto icha tic yalnaccani:
16 A dꞌa yic ol lajvoc jun tiempoal chiꞌ,
icha tic ol vutoc in trato yedꞌ ebꞌ yin̈tilal Israel dꞌa bꞌaqꞌuin̈:
Ol vacꞌoch juntzan̈ in checnabꞌil dꞌa spixan ebꞌ,
ichato ol in tzꞌibꞌejcanoch dꞌa spensar ebꞌ,
xchi Cajal dꞌa Slolonel chiꞌ.
17 Syalanpaxcan icha tic:
Man̈xa bꞌaqꞌuin̈ ol in nacot smul ebꞌ yedꞌ schucal ebꞌ,
xchi.
18 Yuj chiꞌ,
ayic tzꞌacꞌjican lajvoc co mul,
man̈xo yovaliloc scacꞌ junocxo silabꞌ yuj co mul chiꞌ.
Co nitzecoch co bꞌa dꞌa stzꞌey Dios
19 Yuj chiꞌ,
ex vucꞌtac ex vanabꞌ,
max on̈ xivlaj coch dꞌa yol jun lugar Yicn̈ej Dios Yaji,
yujto yuj schiqꞌuil Jesucristo ayxo calan quic cochi.
20 Syal coch yuj jun acꞌ bꞌe yic qꞌuinal jacbꞌilcan dꞌayon̈,
aton jun bꞌe scꞌaxpaj ecꞌ dꞌa cꞌapac smacul yool.
A jun cꞌapac chiꞌ,
a snivanil Cristo syalelcꞌoch cꞌapac.
21 A on̈ yuninal on̈xo Dios tic,
ay jun co sacerdote te nivan yelcꞌochi.
22 Yuj chiꞌ,
yovalil sco nitzoch co bꞌa dꞌa Dios yedꞌ smasanil co cꞌool.
Man̈xalaj co chabꞌcꞌolal dꞌay,
yujto sacxo yaj co pixan yuuj,
yuj chiꞌ man̈xalaj co chucal scabꞌi,
axo co nivanil,
bꞌicbꞌilxoel dꞌa jun a aꞌ yaaxn̈ej.
23 Tecꞌan val scutej co bꞌa cacꞌanoch Dios yipoc co cꞌool.
Man̈ caqꞌuec chabꞌax co cꞌool,
yujto a Dios chiꞌ ol yaqꞌuelcꞌoch jun tas yalnaccan dꞌayon̈.
24 Yovalil sco naꞌa tas scutej co cuchbꞌan co bꞌa,
scacꞌlan quip co xajanan co bꞌa yedꞌ co cꞌulan tas vachꞌ.
25 Mocabꞌ cactejec co molbꞌan co bꞌa icha syutej sbꞌa juntzan̈xo ebꞌ.
Yovalil squeclaj co naꞌa.
Scacꞌ val quip,
yujto vanxo quilan juntzan̈ yechel schꞌoxani to van sja scꞌual sjaubꞌal Cajal Jesús.
26 A ticnaic,
cojtacxo jun abꞌix te yel.
Yuj chiꞌ tato an̈ejaꞌ cacꞌanoch co pensar co cꞌulan chucal,
man̈xalaj junocxo silabꞌ syal yicꞌanel co mul.
27 Tato icha chiꞌ,
axon̈ej jun nivan yaelal sco tan̈vej yedꞌ jun cꞌacꞌ sqꞌue n̈iln̈on yoc,
aton jun tzon̈ te xiv yuuj.
Yuj jun cꞌacꞌ chiꞌ,
ol lajvoquel ebꞌ ayoch ajcꞌolal dꞌa Dios.
28 Tato ay ebꞌ spitej sbꞌa dꞌa ley Moisés,
tzꞌacꞌjioch ebꞌ dꞌa yol scꞌabꞌ chamel tato ay chavan̈oc ma oxvan̈oc testigo tzꞌilani.
Malaj junoc mach syal yocꞌ scꞌool dꞌa ebꞌ.
29 Axo ticnaic,
tato ay on̈ mach on̈ sco patiquejcanel Yuninal Dios,
mato malaj yelcꞌoch schiqꞌuil dꞌayon̈,
ma scacꞌ sqꞌuixvelal Yespíritu Dios,
aton jun tzꞌacꞌan svachꞌcꞌolal Dios dꞌayon̈,
tato icha chiꞌ,
yelxom val ecꞌto yaelal smoj ol co cha dꞌa yichan̈ ebꞌ ix paticanel ley Moisés chiꞌ.
Yujto a schiqꞌuil Cristo chiꞌ,
a acꞌjinac elcꞌoch strato Dios dꞌayon̈.
Yuuj ix lajvicanel co mul.
30 Cojtac to icha tic yaj yalancan Dios Cajal:
A in ton tic ay valan vic vacꞌan syaelal ebꞌ.
A in ol vacꞌ spac dꞌa ebꞌ,
xchi.
Syalanpax icha tic:
A in tic,
Yajal in,
ol in chꞌolbꞌitej tas yaj ebꞌ in chon̈abꞌ,
xchi.
31 Te xivcꞌolalxo scot yoval scꞌool Dios pitzan dꞌa quibꞌan̈.
32 Palta naeccot dꞌa yic yalan̈ ayic ix bꞌabꞌlaj och saquilqꞌuinal dꞌayex,
tecꞌtecꞌ ix eyutej e bꞌa.
Ayic ix eyabꞌan syail,
ix eyacꞌ val eyip.
33 Yujto ayex ix ex bꞌuchji.
Ay ex pax ix acꞌjioch yaelal dꞌa eyibꞌan̈ dꞌa yichan̈ chon̈abꞌ.
Ay ex pax ya ix eyabꞌi ayic ix eyilani to ay ebꞌ ix yabꞌ syail.
Ix eyabꞌ pax syail yedꞌ ebꞌ chiꞌ.
34 Ix ocꞌ e cꞌool yuj ebꞌ ix och dꞌa preso.
Ayic ix laj icꞌjiecꞌ juntzan̈ tas dꞌayex,
ix eyacꞌ techajoc.
Ix ex te tzalaji yujto eyojtac to ay junxo eyic dꞌa satchaan̈ más te vachꞌ.
A jun chiꞌ ayn̈ejecꞌ dꞌa juneln̈ej.
35 Yuj chiꞌ man̈ eyactejcan e tecꞌanil chiꞌ.
Yujto yuuj ol e cha jun spac te nivan.
36 Yovalil nivan tzeyutej e cꞌool,
yic ol yal e cꞌulan masanil tas sgana Dios,
ol e chaan jun tas bꞌaj yacꞌnaccan stiꞌ to ol yacꞌ dꞌayon̈.
37 Yujto icha tic syal Dios dꞌa Slolonel Tzꞌibꞌabꞌilcani:
Jabꞌxon̈ej val,
axo sjavi jun yovalil ol javoc,
man̈ ol ecꞌlaj tiempo sjavi.
38 A ebꞌ tzin acꞌanoch dꞌa scꞌool,
ay sqꞌuinal ebꞌ dꞌa juneln̈ej,
palta tato smeltzaj ebꞌ dꞌa spatic,
man̈xo ol in tzalajlaj yedꞌ ebꞌ,
xchi Dios.
39 Palta a on̈ tic,
man̈ on̈ lajanoclaj icha juntzan̈xo ebꞌ smeltzaj dꞌa spatic yic satcanel ebꞌ dꞌa juneln̈ej,
palta lajan on̈ icha ebꞌ ol icꞌan scolnabꞌil dꞌa juneln̈ej yujto syacꞌoch Dios ebꞌ dꞌa scꞌool.