3 Yujto scacꞌoch Dios dꞌa co cꞌool,

yuj chiꞌ cojtac to ton̈ej lolonnac ayic sbꞌoannac jun yolyibꞌan̈qꞌuinal tic.

A juntzan̈ tas squil ticnaic,

malaj tas yacꞌlabꞌejnac ayic sbꞌoannac.

4 A vin̈aj Abel,

yacꞌnac val och Dios vin̈ dꞌa scꞌool,

yuj chiꞌ a silabꞌ vin̈ yacꞌnac dꞌa Dios chiꞌ,

más vachꞌ dꞌa yichan̈ yic vin̈aj Caín.

Yuj chiꞌ aljinac vin̈ vachꞌil yuj Dios chiꞌ,

yuj chiꞌ chajinac jun silabꞌ chiꞌ yuuj.

Vachꞌchom chamnacxo vin̈,

palta an̈ejaꞌ ichato tzato yal vin̈ dꞌayon̈,

yujto yacꞌnac val och Dios vin̈ dꞌa scꞌool.

5 A vin̈aj Enoc,

yacꞌnac och Dios vin̈ dꞌa scꞌool.

Yuj chiꞌ pitzanto vin̈ yicꞌjinacbꞌat vin̈ yuj Dios dꞌa satchaan̈.

Man̈xa bꞌaj ilchajnac vin̈ yuj ebꞌ anima.

Syal yuj vin̈ dꞌa Slolonel Dios to ayic manto icꞌjibꞌat vin̈,

tzalajnac Dios chiꞌ yedꞌ vin̈.

6 Palta tato max cacꞌoch Dios dꞌa co cꞌool,

toxon man̈ jabꞌoc stzalaj quedꞌoc.

Yujto a mach scꞌoch dꞌa Dios,

yovalil syacꞌoch dꞌa scꞌool to ay Dios chiꞌ.

Syacꞌanpaxoch dꞌa scꞌool to a tzꞌacꞌan spac dꞌa ebꞌ syacꞌ yip scꞌoch dꞌay.

7 A vin̈aj Noé,

yacꞌnac val och Dios vin̈ dꞌa scꞌool.

Yuj chiꞌ ayic yalannac Dios dꞌa vin̈ to van sja jun tas te ay smay manta bꞌaj tzuji,

scꞌanabꞌajejnac vin̈ sbꞌoan jun nivan barco bꞌaj scol sbꞌa yedꞌ ebꞌ ay dꞌa yol spat.

Yuj bꞌaj scꞌanabꞌajejnac vin̈ chiꞌ,

ochcan chamel dꞌa yibꞌan̈ masanil ebꞌ man̈ cꞌanabꞌajannacoc.

An̈ejtonaꞌ yalnac Dios to vachꞌ vin̈ dꞌa yichan̈,

yujn̈ej to yacꞌnac och Dios chiꞌ vin̈ dꞌa scꞌool.

8 A vin̈aj Abraham,

yacꞌnac val och Dios vin̈ dꞌa scꞌool.

Yuj chiꞌ ayic yavtajnac vin̈ yuuj,

scꞌanabꞌajejnac vin̈ sbꞌat dꞌa jun lugar yalnaccani to ol yacꞌ dꞌa vin̈.

Vachꞌchom manto yojtacoc vin̈ bꞌaj sbꞌati,

palta yactejnaccan sluum vin̈,

sbꞌatnac vin̈.

9 Yujto yacꞌnac och vin̈ dꞌa scꞌool,

yuj chiꞌ ecꞌlejnac cajan vin̈ dꞌa jun lugar yalnaccan Dios to ol yacꞌ dꞌay.

A cꞌapac mantiado sbꞌonacqꞌue vin̈ spatoc.

An̈ejtonaꞌ icha chiꞌ yutejnac sbꞌa vin̈aj Isaac yedꞌ vin̈aj Jacob,

yujto ay yalan yic ebꞌ vin̈ schaan jun yalnac Dios chiꞌ to ol scha ebꞌ.

10 A vin̈aj Abraham chiꞌ,

stan̈vejnac vin̈ sjavi jun chon̈abꞌ ayem yipumal yich,

aton jun chon̈abꞌ a Dios naannac tas tzꞌaj sbꞌoi,

an̈ejaꞌ bꞌoannac paxi.

11 A ix Sara,

yacꞌnac val och Dios ix dꞌa scꞌool.

Yuj chiꞌ vachꞌchom man̈ unevumixoc ix,

palta acꞌjinacto yip ix yic yaljinac jun yuneꞌ ix dꞌa yolxo schichimal.

Ay jun yuneꞌ ix aljinac,

yujto yacꞌnac och ix dꞌa scꞌool to a jun yacꞌnac stiꞌ dꞌa ix,

tzꞌeln̈ejcꞌoch tas syalaꞌ.

12 Yuj chiꞌ,

vachꞌchom ichamxo vin̈aj Abraham chiꞌ,

vachꞌchom junn̈ej pax vin̈,

palta tzijtum ix aj ebꞌ yin̈tilal vin̈ spitzvieli.

Lajan sbꞌisul ebꞌ icha qꞌuen cꞌanal dꞌa satchaan̈.

Lajan pax sbꞌisul ebꞌ icha qꞌuen yarenail stiꞌ aꞌ mar man̈xo bꞌischajbꞌenoc.

13 A junjun ebꞌ sval yabꞌixal tic,

manto schalaj juntzan̈ yalnac Dios to syacꞌ dꞌa ebꞌ ayic schamnac ebꞌ.

Palta yacꞌnac val och Dios ebꞌ dꞌa scꞌool,

yuj chiꞌ ichato najat yilnacbꞌat juntzan̈ chiꞌ ebꞌ,

yacꞌannac och spensar ebꞌ dꞌay.

Icha chiꞌ ajnac yacꞌan testigoal sbꞌa ebꞌ to a jun yolyibꞌan̈qꞌuinal tic,

man̈ schon̈abꞌoc ebꞌ,

palta paxyalvumn̈ej ebꞌ.

14 A ebꞌ icha chiꞌ yutejnac sbꞌa,

schꞌoxnac val ebꞌ sicꞌlabꞌil to a dꞌa junxo chon̈abꞌ ayoch spensar ebꞌ.

15 Qꞌuinaloc tato an̈ej dꞌa jun schon̈abꞌ ebꞌ yactejnaccan chiꞌ yacꞌnac och spensar,

tecan meltzajnacxi ebꞌ taꞌ.

16 Palta a val dꞌa junxo chon̈abꞌ más vachꞌ bꞌaj yacꞌnac och spensar ebꞌ,

aton jun chon̈abꞌ ay dꞌa satchaan̈.

Yuj chiꞌ max qꞌuixvilaj Dios ayic tzꞌalji to a sDiosal ebꞌ,

yujto vachꞌxo yaj jun chon̈abꞌ ol yacꞌ yiquej ebꞌ chiꞌ.

17 A vin̈aj Abraham chiꞌ,

yacꞌnac val och Dios vin̈ dꞌa scꞌool.

Yuj chiꞌ ayic yacꞌjinac proval vin̈ yuuj,

yicꞌnacbꞌat vin̈aj Isaac vin̈,

yujto ijanoch yacꞌan vin̈ silabꞌoc yalani.

Vachꞌchom yacꞌnac stiꞌ Dios yuj vin̈aj Isaac chiꞌ,

palta yacꞌnac elta jun pitan̈ yuninal vin̈ chiꞌ silabꞌoc.

18 Yalnac Dios dꞌa vin̈aj Abraham chiꞌ icha tic:

A dꞌa vin̈aj Isaac ol pitzvoccanel in̈tilal,

xchi.

Icha chiꞌ yutejnac yacꞌancan stiꞌ dꞌa vin̈.

19 Icha chiꞌ yutejnac vin̈aj Abraham chiꞌ,

yujto nachajnac el yuj vin̈ to ay spoder Dios yacꞌan pitzvocxi ebꞌ chamnac.

Yuj chiꞌ,

syal calani ichato pitzvinacxi vin̈aj Isaac chiꞌ,

yacꞌjinacxi vin̈ dꞌa vin̈aj Abraham chiꞌ.

20 A vin̈aj Isaac chiꞌ,

yacꞌnac val och Dios vin̈ dꞌa scꞌool,

yuj chiꞌ ayocto yalannaccan vin̈ yuj juntzan̈ tas vachꞌ ol scha vin̈aj Jacob yedꞌ vin̈aj Esaú.

21 Axo vin̈aj Jacob chiꞌ,

yacꞌnac val och Dios vin̈ dꞌa scꞌool.

Yuj chiꞌ ayic vanxo scham vin̈ yalannaccan vin̈ yuj juntzan̈ tas vachꞌ ol scha ebꞌ yuninal vin̈aj José schavan̈il.

Yacꞌnacto em sbꞌa vin̈ dꞌa Dios ayic yemnac n̈ojan vin̈ dꞌa yibꞌan̈ teꞌ scꞌococh.

22 Axo vin̈aj José chiꞌ,

yacꞌnac val och Dios vin̈ dꞌa scꞌool,

yuj chiꞌ ayic vanxo scham vin̈,

yalannaccan vin̈ to ol el ebꞌ israel dꞌa yol yic Egipto.

Yalannacpaxcan vin̈,

yuj tas ol yutoc sbꞌaquil vin̈ ebꞌ.

23 A smam snun vin̈aj Moisés,

yacꞌnac val och Dios ebꞌ dꞌa scꞌool,

yuj chiꞌ ayic yaljinac vin̈,

oxeꞌ ujal scꞌubꞌejnac el vin̈ ebꞌ,

yujto yilnac ebꞌ to te vachꞌ yilji vin̈.

Man̈ xivnacoclaj ebꞌ dꞌa sley vin̈ rey tzꞌalani to smiljicham ebꞌ unin tzato alji.

24 Axo vin̈aj Moisés chiꞌ,

yacꞌnac val och Dios vin̈ dꞌa scꞌool.

Yuj chiꞌ ayic yelnac qꞌuinal dꞌa sat vin̈,

man̈xa sgana vin̈ tzꞌalji to a ix yisil vin̈ sreyal Egipto ay yuneꞌ vin̈.

25 Man̈ yalnacoclaj scꞌool vin̈ yacꞌan sgana yedꞌ juntzan̈ chucal,

yujto yojtac vin̈ to eqꞌuelbꞌan̈ej tzꞌecꞌ juntzan̈ chiꞌ.

Yuj chiꞌ sna vin̈ to más vachꞌ syabꞌ syail vin̈ yedꞌ ebꞌ schon̈abꞌ Dios.

26 Snaannac pax vin̈ to más vachꞌ syabꞌ syail vin̈ sbꞌuchji yuj Cristo.

Masanil juntzan̈ sbꞌeyumal Egipto chiꞌ,

malaj yelcꞌoch dꞌa vin̈,

yujto yacꞌnac och spensar vin̈ dꞌa jun ol yacꞌ Dios dꞌay.

27 Yacꞌnac val och vin̈ dꞌa scꞌool,

yuj chiꞌ elnac vin̈ dꞌa yol yic Egipto chiꞌ.

Man̈ xivnacoclaj vin̈ dꞌa yoval scꞌool vin̈ rey chiꞌ.

Tecꞌtecꞌ val yutejnac spensar vin̈,

ichato ochnac qꞌuelan vin̈ dꞌa jun man̈ chequeloc,

aton Dios.

28 A vin̈aj Moisés chiꞌ,

yacꞌnacoch Dios vin̈ dꞌa scꞌool,

yuj chiꞌ scꞌanabꞌajejnac vin̈ yicꞌanel yich jun qꞌuin̈ yic snajicoti tas aj yelnaccot ebꞌ israel dꞌa Egipto.

Yalannac vin̈ dꞌa ebꞌ yetisraelal to slaj stzicoch chicꞌ ebꞌ dꞌa spuertail spat,

yic max cham sbꞌabꞌel unin ebꞌ yuj jun ángel ay yopisio smilancham anima.

29 A ebꞌ israel chiꞌ,

yacꞌnac och ebꞌ dꞌa scꞌool,

yuj chiꞌ ecꞌnac ebꞌ dꞌa snan̈al aꞌ Chacchac Mar,

icha quecꞌ bꞌaj taquin̈ bꞌe.

Axo pax ebꞌ aj Egipto jun,

scomon acꞌlejnac proval ebꞌ yeqꞌui,

palta masanil ebꞌ jicꞌvinaccham yuj aꞌ.

30 A ebꞌ co mam quicham,

yacꞌnac val och Dios ebꞌ dꞌa scꞌool,

yuj chiꞌ ayic slajvinac yuquil cꞌual yecꞌ oyoyoc ebꞌ dꞌa spatic chon̈abꞌ Jericó,

laj emnac lan̈aljoc yipumal yich smuroal jun chon̈abꞌ chiꞌ.

31 A ix Rahab,

vachꞌchom ajmul ix ix,

palta yacꞌnacoch Dios ix dꞌa scꞌool.

Maj chamlaj ix yedꞌ ebꞌ spitejnac sbꞌa dꞌa Dios,

yujto vachꞌ yutejnac sbꞌa ix schaan ebꞌ israel ecꞌ iljinac chajtil yaj jun chon̈abꞌ chiꞌ.

32 Tzijtumto tas syal valanbꞌat dꞌayex,

palta man̈xalaj tiempo sval yabꞌixal vin̈aj Gedeón,

vin̈aj Barac,

vin̈aj Sansón,

vin̈aj Jefté,

vin̈aj David,

vin̈aj Samuel yedꞌ ebꞌ vin̈ schecabꞌ Dios.

33 A ebꞌ chiꞌ,

yacꞌnac val och Dios ebꞌ dꞌa scꞌool,

yuj chiꞌ ay ebꞌ acꞌannac ganar juntzan̈ nación ayic yacꞌannac oval ebꞌ yedꞌoc.

Ay ebꞌ tojol yutejnac yacꞌan yajalil.

Ay ebꞌ chaannac tas albꞌilcan yuj Dios.

Ay ebꞌ macchannac stiꞌ nocꞌ choj.

34 Ay ebꞌ acꞌjinac tup juntzan̈ cꞌacꞌ te ov.

Ay pax ebꞌ colchajnaqueli ayic ijan smiljinaccham ebꞌ dꞌa qꞌuen espada.

A ebꞌ malaj yip,

acꞌjinac yip ebꞌ,

tecꞌan yutejnac sbꞌa ebꞌ dꞌa oval,

yuj chiꞌ elnac lemnaj ebꞌ soldado chꞌoc chon̈abꞌil dꞌa ebꞌ.

35 Ay ebꞌ ix ix pitzvinacxi ebꞌ schamnac,

schaanacxi ebꞌ yuneꞌ ebꞌ ix chiꞌ.

Palta ay pax juntzan̈xo ebꞌ chamnac yuj juntzan̈ yaelal acꞌjinac och dꞌa yibꞌan̈.

Man̈ yalnacoc scꞌol ebꞌ yacꞌji el dꞌa libre,

yic vachꞌ ol yacꞌ ganar ebꞌ spitzvixi,

ol schaan junxo sqꞌuinal ebꞌ más vachꞌ.

36 Ay juntzan̈xo ebꞌ yabꞌnac syail sbꞌuchji,

smacꞌji.

Laj tzecꞌchajnac ebꞌ dꞌa qꞌuen cadena,

ochnac pax ebꞌ dꞌa preso.

37 Ay ebꞌ juljinaccham dꞌa qꞌuen qꞌueen.

Ay ebꞌ jochjinac dꞌin̈chaj snan̈al dꞌa qꞌuen sierra.

Ay ebꞌ acꞌjinac och yaelal dꞌa yibꞌan̈.

Ay pax ebꞌ miljinaccham dꞌa qꞌuen espada.

Ay ebꞌ ichn̈ej taꞌ bꞌeynac eqꞌui,

an̈ej stzꞌumal nocꞌ calnel,

nocꞌ chiva ochnac spichuloc ebꞌ.

Te mebꞌaꞌ ebꞌ.

Tzijtum val yaelal yabꞌnac ebꞌ.

Acꞌjinac och syaelal ebꞌ.

38 Man̈ smojoc ebꞌ ay dꞌa yolyibꞌan̈qꞌuinal tic yecꞌ juntzan̈ anima vachꞌ tic dꞌa scal.

A ebꞌ chiꞌ,

ichn̈ejtaꞌ ecꞌnac ebꞌ dꞌa tzꞌinan luum yedꞌ dꞌa tzalquixtac.

Ecꞌnac cajan ebꞌ dꞌa yoltac qꞌuen n̈aqꞌueen yedꞌ dꞌa yoltac olan.

39 Masanil ebꞌ chiꞌ,

vachꞌ ebꞌ dꞌa yichan̈ Dios,

yujto yacꞌnac och Dios chiꞌ ebꞌ dꞌa scꞌool.

Vachꞌchom icha chiꞌ ebꞌ,

palta man̈ schanacoc jun bꞌaj yacꞌnaccan stiꞌ Dios to ol yacꞌ dꞌa ebꞌ.

40 Yujto ay jun tas ecꞌbꞌal svachꞌil nabꞌilxo yuj Dios dꞌayon̈,

yuj chiꞌ majto yicꞌlaj sbꞌa tas nabꞌil yuuj dꞌa yibꞌan̈ ebꞌ chiꞌ,

masanto ol on̈ smolbꞌej yedꞌ ebꞌ chiꞌ,

ichato chiꞌ ol yicꞌan sbꞌa.