Caqꞌuecoch co pensar dꞌa Jesús
12
Tzijtum ebꞌ chꞌoxannac eli to yacꞌnac val och Dios ebꞌ dꞌa scꞌool.
A ticnaic,
ichato oyanoch ebꞌ dꞌa co patic quichan̈.
A on̈xo tic van cacꞌan quip icha ebꞌ tzꞌacꞌan carrera.
Yuj chiꞌ yovalil squiqꞌuel juntzan̈ icha icatz ayoch dꞌa quibꞌan̈.
An̈ejtonaꞌ yovalil scactejcan juntzan̈ chucal ichato bꞌacꞌanoch dꞌayon̈.
Yovalil tecꞌan scutej co bꞌa cacꞌan quip icha ebꞌ tzꞌacꞌan carrera chiꞌ.
2 Caqꞌuec val och co cꞌol dꞌa Jesús,
aton tzꞌacꞌan cacꞌoch Dios dꞌa co cꞌool,
scolvajn̈ej quedꞌoc masanto tzon̈ tecꞌcꞌaji.
Yabꞌnac val syail dꞌa teꞌ culus.
Malaj ix aj snaani vachꞌchom qꞌuixvelal ix utaji ayic ix chami,
yujto yojtac to ayic slajvi yabꞌan syail chiꞌ,
tzalajcꞌolal yicoꞌ.
Ix cꞌoch cꞌojan dꞌa svachꞌ cꞌabꞌ Dios.
3 Yuj chiꞌ,
tze na val cot sbꞌeybꞌal Jesús chajtil yutejnac yacꞌan techaj syaelal yuj ebꞌ chuc.
Tato icha chiꞌ,
man̈ ol ex tzactzajoc,
man̈ ol somchaj pax el-laj e pensar.
4 A ex tic,
vachꞌchom tze chaquel juntzan̈ chucal,
palta manto acꞌjoc ochlaj chamel dꞌa eyibꞌan̈ icha ajnac Jesús chiꞌ.
5 Tecan ix sat dꞌa e cꞌool tas yalnaccan Dios dꞌayon̈,
ayic ix yecan co na to yuninal on̈xo.
Syalcan dꞌa Slolonel Dios icha tic:
Ach vuninal,
man̈ a patiquejel scachnabꞌil Dios,
mocabꞌ cot oval ayic syacꞌanoch a yaelal.
6 Yujto a ebꞌ xajanabꞌil yuuj,
aton ebꞌ chiꞌ scachaꞌ,
syacꞌanoch syaelal masanil ebꞌ schaoch yuninaloc,
xchicani.
7 Yovalil scacꞌ techaj juntzan̈ yaelal syal tic.
Icha tzꞌutaj junoc uninabꞌil yuj smam,
icha chiꞌ tzon̈ yutej Dios,
yujto yuninal on̈.
¿Tom ay junoc uninabꞌil max macꞌji yuj smam?
8 Qꞌuinaloc max yacꞌoch co yaelal icha tzꞌutaj ebꞌ uninabꞌil,
man̈ on̈ yuninaloclaj syal chiꞌ,
mitzꞌ uninn̈ej caj dꞌay.
9 Naec val jun tic:
Ayic yunetac on̈to,
tzon̈ macꞌji yuj co mam co nun,
yuj chiꞌ sco cꞌanabꞌajej ebꞌ,
ocxom ticnaic,
¿tom man̈ ol co cꞌanabꞌajej Dios yuj co yaelal syacꞌaꞌ,
yic sco cha co qꞌuinal dꞌa juneln̈ej?
10 A ebꞌ co mam ay dꞌa yolyibꞌan̈qꞌuinal tic,
syacꞌoch co yaelal ebꞌ janicꞌoc tiempo,
icha sgana ebꞌ.
Palta axo Dios,
syacꞌoch co yaelal yic vachꞌ tzon̈ aji,
yic vachꞌ tojol tzꞌaj co pensar icha spensar.
11 Yel toni,
ayic syacꞌanoch co yaelal Dios,
malaj juneloc tzon̈ tzalaj dꞌa elan̈chamel.
Palta tato sco cha cabꞌi,
cꞌojancꞌolal stojolbꞌi co bꞌeybꞌal yuuj,
sja co juncꞌolal.
Ay smay co paticanel Dios
12 A ex mach ex schabꞌax e cꞌool,
ichato malaj yip e cꞌabꞌ,
ma ichato sicbꞌinac el e yoc.
Aqꞌuec val eyip,
yic vachꞌ ol ex tecꞌcꞌajoc.
13 Tze bꞌeybꞌalan tojol bꞌeybꞌal,
yic a ex ichato coxo ex,
ol vachꞌ bꞌo e pensar,
man̈ ol ex vachꞌ juvoc el-laj.
14 Tzeyacꞌan val e yip,
yic juncꞌolal tzex aj yedꞌ ebꞌ anima smasanil.
Tzeyacꞌan val eyip e bꞌeybꞌalan vachꞌil,
yujto a ebꞌ chuc sbꞌeybꞌal man̈ ol yil-laj co Mam Dios ebꞌ.
15 Tzeyil val e bꞌa,
yic malaj junoc ex tze patiquejel Dios jun tzꞌacꞌan svachꞌcꞌolal dꞌayon̈,
yujto talaj spitzvi junoc chucal dꞌa e cal icha sqꞌuibꞌ junoc an̈cꞌultac stacjiel tas vachꞌ yuuj.
Tato icha chiꞌ ay talaj nan̈aloc ex tzex juviel yuuj.
16 Malajocabꞌ junoc ex tzex em dꞌa ajmulal.
Malajocabꞌ junoc ex tze patiquejel juntzan̈ yic Dios syacꞌ dꞌayex icha yutejnac sbꞌa vin̈aj Esaú.
A vin̈ chiꞌ,
bꞌabꞌel unin vin̈,
yuj chiꞌ a vin̈ ay yalan yic schaancan juntzan̈ tas dꞌa smam.
Palta yedꞌ jun ucꞌabꞌ vael schon̈nac el jun bꞌaj ay yalan yic vin̈ chiꞌ.
17 Cojtac,
ayic slajvinac chiꞌ,
snibꞌejnacto vin̈ acꞌji yic yuj smam chiꞌ,
palta majxo acꞌjilaj dꞌa vin̈.
Vachꞌchom te ocꞌnacto vin̈,
palta majxo yal-laj sqꞌuexanxi tas yalnac smam vin̈ chiꞌ.
18 A on̈ tic,
man̈ lajanoc scutej co bꞌa icha ebꞌ quetchon̈abꞌ Israel dꞌa pecaꞌ.
Yujto a ebꞌ chiꞌ,
xidꞌnaquecꞌ ebꞌ dꞌa jun vitz bꞌaj chequel to ay jun cꞌacꞌ sqꞌue n̈iln̈onoc,
aton vitzal Sinaí.
Ataꞌ,
te qꞌuicꞌqꞌuinal,
max yal-laj quilani.
Ecꞌnac pax jun chacxuxum icꞌ taꞌ.
19 Yabꞌnac ebꞌ yocꞌ jun trompeta.
Yabꞌannac ebꞌ yoch sjaj Dios sloloni.
A ebꞌ abꞌan slolon chiꞌ,
tevi val ebꞌ dꞌa vin̈aj Moisés,
yic maxtzac lolon Dios chiꞌ dꞌa ebꞌ.
20 Icha chiꞌ yutejnac sbꞌa ebꞌ,
yujto maj techaj yuj ebꞌ yabꞌan jun schecnabꞌil syal icha tic:
Tato ay junoc mach sja dꞌa jun vitz tic,
vachꞌchom junoc nocꞌ nocꞌ,
yovalil ol juljoccham dꞌa qꞌuen qꞌueen,
xchi.
21 Te xivnac ebꞌ yilan juntzan̈ chiꞌ.
A vin̈aj Moisés pax chiꞌ,
yalnac vin̈ icha tic:
Tzin ibꞌxi val yuj xivelal,
xchi vin̈.
22 Palta a on̈xo tic,
man̈oc talaj aybꞌat co pensar.
Yujto a dꞌa jun tzalan scuch Sion yedꞌ dꞌa jun chon̈abꞌ yic Dios pitzan,
ataꞌ aybꞌat co pensar.
A jun chon̈abꞌ chiꞌ,
aton jun Jerusalén ay dꞌa satchaan̈,
jun bꞌaj man̈xo bꞌischajbꞌenoc ebꞌ ángel.
23 A ebꞌ yuninalxo Dios quedꞌoc,
ebꞌ tzꞌibꞌabꞌilxo sbꞌi dꞌa satchaan̈,
smolbꞌej sbꞌa ebꞌ dꞌa tzalajcꞌolal.
Ayoch co pensar dꞌa Dios,
aton Sjuezal masanil anima.
Ay pax bꞌat co pensar bꞌaj ay spixan ebꞌ vachꞌ sbꞌeybꞌal,
aton ebꞌ tzꞌacanxo yuj Dios.
24 Aypaxoch co pensar dꞌa Jesús,
jun tzꞌacꞌanelcꞌoch jun schabꞌil strato Dios.
Ay pax och co pensar dꞌa schiqꞌuil.
A schiqꞌuil chiꞌ tzꞌicꞌanel co mul,
ichato stzicjiecꞌ dꞌa quibꞌan̈.
A schiqꞌuil chiꞌ,
ichato tzon̈ scꞌan nivancꞌolal dꞌa Dios,
man̈ lajanoc yedꞌ schiqꞌuil vin̈aj Abel,
yujto a yic vin̈ chiꞌ,
scꞌannac ecꞌ spac.
25 Yuj chiꞌ yovalil squil val co bꞌa,
yic vachꞌ max co patiquejel Dios chiꞌ yujto aꞌ van slolon dꞌayon̈.
A ebꞌ paticannaquel dꞌa pecaꞌ,
ayic scachjinac ebꞌ dꞌa yolyibꞌan̈qꞌuinal tic,
man̈xo yalnacoclaj yel ebꞌ dꞌa syaelal.
Ocon̈xom a on̈ tic,
¿tom ol yal co colan co bꞌa,
tato sco patiquejel jun tzꞌalancot dꞌayon̈ dꞌa satchaan̈?
26 Ayic slolonnac dꞌa pecaꞌ chiꞌ,
ibꞌxinac val lum luum tic.
Palta a ticnaic syalaꞌ:
A dꞌa junelxo,
man̈ocn̈ej lum luum tic ol vacꞌ ibꞌxoc,
ol vacꞌpax ibꞌxoc satchaan̈,
xchi.
27 A jun lolonel “dꞌa junelxo” syal chiꞌ,
syalelcꞌochi to masanil tas bꞌobꞌil yuuj,
ol stzicubꞌtan̈ej ol sataneli.
Axo juntzan̈ max ibꞌxilaj ol can dꞌa masanil tiempo.
28 A jun maj ibꞌxoclaj chiꞌ,
aton jun lugar ol yacꞌ Dios dꞌayon̈ bꞌaj ayoch yajalil.
Caqꞌuec yuj diosal dꞌay yuj jun tic.
Caqꞌuec em co bꞌa dꞌay dꞌa smasanil co cꞌool icha sgana.
Con̈ xivec dꞌay.
29 Yujto a co Diosal,
lajan icha cꞌacꞌ slajviel masanil tas yuuj.