A tas scutej co bꞌeybꞌal
13
Man̈ cactejec co xajanan co bꞌa,
yujto junxon̈ej co Mam.
2 Mocabꞌ puraloc scacꞌ sposado ebꞌ tzꞌecꞌ dꞌayon̈,
yujto man̈ cojtacoc mach ebꞌ.
Ay ebꞌ acꞌjinac sposado ebꞌ ángel,
palta maj nachajel yuj ebꞌ tato ángel ebꞌ bꞌaj vachꞌ yutejnac sbꞌa ebꞌ chiꞌ.
3 Co naeccot ebꞌ ayoch dꞌa preso,
ichato preso caj yedꞌ ebꞌ.
Co naeccot ebꞌ ayoch dꞌa syaelal,
ichato a on̈ jun scabꞌ syail yedꞌ ebꞌ.
4 Ayic squicꞌlan co bꞌa yedꞌ quetbꞌeyum,
ayocabꞌ yelcꞌoch jun icꞌlajbꞌail chiꞌ dꞌayon̈.
Yovalil an̈ej dꞌa quetbꞌeyum junjun on̈ scacꞌoch co pensar.
Yujto a Dios ol chꞌolbꞌitan ebꞌ tzꞌem dꞌa ajmulal,
ol acꞌjocbꞌat dꞌa yibꞌan̈ ebꞌ.
5 Man̈ocn̈ej qꞌuen tumin scacꞌoch co pensar co sayani.
Con̈ tzalajec yedꞌ jabꞌoc tas ay dꞌayon̈,
yujto syal Dios:
Malaj bꞌaqꞌuin̈ ol ex vactejcani,
malaj bꞌaqꞌuin̈ ol ex vactejcan e chꞌocoj,
xchi.
6 Yuj chiꞌ dꞌa smasanil co cꞌool scal icha tic:
A Cajalil scolvaj quedꞌoc.
Man̈ ol on̈ xivlaj yuj tas ol on̈ yutoc ebꞌ anima,
xco chi.
7 Tze nacot ebꞌ e tan̈vumal,
aton ebꞌ alannac el slolonel Dios dꞌayex.
Tze nacoti tas ajnac ebꞌ yuj svachꞌ bꞌeybꞌal.
Icha yutejnac ebꞌ yacꞌanoch Dios dꞌa scꞌool,
icha pax chiꞌ tzeyutej e bꞌa a ex tic.
8 A Jesucristo,
icha yaj dꞌa pecaꞌ,
icha chiꞌ yaj ticnaic,
an̈ejaꞌ icha chiꞌ ol aj dꞌa masanil tiempo.
9 Man̈ eyacꞌ ixtaxel e pensar yuj juntzan̈xo chꞌoc cꞌaybꞌubꞌal tzꞌalji.
Vachꞌ tato tzꞌacꞌji stecꞌanil co pensar yuj svachꞌcꞌolal Dios syacꞌ dꞌayon̈.
Xal juntzan̈ comon checnabꞌil tzꞌalan yuj tas sco vaꞌa,
max tecꞌcꞌajlaj co pensar yuuj.
Yujto a juntzan̈ checnabꞌil chiꞌ,
malaj jabꞌoc yopisio sbꞌoan spensar ebꞌ sbꞌeybꞌalani.
10 A on̈ tic,
ay jun co silabꞌ chꞌoc yeli.
Axo ebꞌ sacerdote dꞌa scal ebꞌ quetisraelal tzꞌacꞌan servil Dios dꞌa yol stemplo,
malaj yalan yic ebꞌ schiꞌan jun silabꞌ tic.
11 Yujto a vin̈ sat sacerdote chiꞌ,
syicꞌbꞌat schiqꞌuil juntzan̈ nocꞌ nocꞌ vin̈ dꞌa jun cuarto Yicn̈ej Dios Yaji,
yuj yicꞌanel mul.
Axo snivanil juntzan̈ nocꞌ nocꞌ chiꞌ,
max chijilaj,
palta to sn̈usjitzꞌa dꞌa stiel chon̈abꞌ.
12 Icha chiꞌ ix aj yabꞌan syail Jesús,
a dꞌa stiel chon̈abꞌ ix chami,
yic vachꞌ a schiqꞌuil tzꞌicꞌanel co chucal.
13 Yuj chiꞌ,
coyec yedꞌ Jesús bꞌaj ix icꞌjiel dꞌa tiꞌ chon̈abꞌ chiꞌ,
syalelcꞌochi to lajan tzꞌaj co paticajel yedꞌoc.
14 Yujto a jun yolyibꞌan̈qꞌuinal tic,
man̈ co chon̈abꞌoc dꞌa juneln̈ej,
palta ay jun co chon̈abꞌ toto ol javoc,
aton jun chiꞌ van co tan̈vani.
15 Yuj chiꞌ,
yovalil scaln̈ej vachꞌ lolonel dꞌa Dios yuj Jesucristo.
A juntzan̈ vachꞌ lolonel scal tic dꞌa Dios,
aton co silabꞌ yaji.
16 Mocabꞌ sat dꞌa co cꞌool co cꞌulan juntzan̈ tas vachꞌ,
tzon̈ colvajpax dꞌa ebꞌ quetanimail.
Yujto an̈ejaꞌ co silabꞌ yaj pax juntzan̈ tic dꞌa Dios,
stzalaj val yedꞌoc.
17 Tze cꞌanabꞌajej tas syal ebꞌ e tan̈vumal.
Aqꞌuec och e bꞌa dꞌa yol scꞌabꞌ ebꞌ,
yujto a ebꞌ van ex yilani.
Yojtac ebꞌ to ol yacꞌ entregar scuenta ebꞌ eyuuj dꞌa Dios.
Vachꞌ tzeyutej e bꞌa,
yic stzalaj ebꞌ yilan jun munlajel chiꞌ,
yic max cus ebꞌ.
Tato tzeyacꞌ cus ebꞌ,
man̈ vachꞌoc eyicoꞌ.
18 Lesalvan̈ec cuuj,
cojtac to malaj tas syal yalji dꞌa co patic,
yujto co gana vachꞌn̈ej scutej co bꞌeybꞌal dꞌa masanil tasi.
19 Tzin cꞌan val dꞌayex,
yic tzex lesalvi val vuuj,
yic ol yal in cꞌoch dꞌayex junelxo dꞌa elan̈chamel.
Tzꞌacꞌjibꞌat stzatzil scꞌool ebꞌ
20 A Dios tzꞌacꞌan juncꞌolal,
aton jun acꞌjinac pitzvocxi Cajal Jesucristo dꞌa scal ebꞌ chamnac.
A Jesucristo,
icha yaj vin̈ Tan̈vum Calnel,
icha chiꞌ yaj dꞌayon̈,
te nivan yelcꞌochi.
Yuj schiqꞌuil ix elcꞌoch jun strato Dios yacꞌnac dꞌayon̈ dꞌa juneln̈ej.
21 In gana to sbꞌo val e pensar yuj Dios,
yic vachꞌn̈ej tzex aji,
tze cꞌulan icha sgana.
In gana paxi to vachꞌ tzon̈ aj dꞌa sat yuj Jesucristo,
yic stzalaj quedꞌoc.
Nivanocabꞌ yelcꞌoch Cristo dꞌa masanil tiempo.
Amén.
22 Ex vucꞌtac ex vanabꞌ,
tzin cꞌan val dꞌayex to nivan tzeyutej e cꞌool dꞌa juntzan̈ lolonel svalbꞌat tic,
yic svecan e naꞌa,
vachꞌchom quenn̈ej svalbꞌat dꞌayex dꞌa jun carta tic.
23 Svalbꞌat eyabꞌi to ix el vin̈ cucꞌtac Timoteo dꞌa libre.
Tato ol ja vin̈ dꞌa tic dꞌa elan̈chamel,
ol bꞌat vin̈ vucꞌlevoc ayic ol in bꞌat ex vilaꞌ.
24 Svacꞌbꞌat stzatzil scꞌool ebꞌ e tan̈vumal taꞌ.
Svacꞌanpaxbꞌat stzatzil e cꞌool e masanil ex yic exxo Dios vedꞌoc.
Yedꞌ pax ebꞌ cucꞌtac aj Italia,
syacꞌ pax bꞌat stzatzil e cꞌool ebꞌ.
25 Aocabꞌ Dios syacꞌ svachꞌcꞌolal dꞌayex e masanil.