A tas syal co tiꞌ
3
Mocabꞌ tzijtumoc ex tzeyacꞌoch e bꞌa cꞌaybꞌumal.
Yujto eyojtac to ol cham val co chꞌolbꞌitaj a on̈ cꞌaybꞌum on̈ tic.
2 Yujto cotac scal tzon̈ em dꞌa co paltail.
Tato malaj bꞌaj tzꞌoch co paltail yuj tas scalaꞌ,
te vachꞌ on̈ am syal chiꞌ.
Syal co yamanoch vaan co nivanil smasanil.
3 Ayic scacꞌanoch sfreno nocꞌ chej,
scꞌanabꞌajejn̈ej nocꞌ bꞌaj squicꞌbꞌati.
4 Qꞌuinaloc ay junoc nivan barco,
tzꞌochpax chulan nivan icꞌ dꞌay,
palta yujn̈ej jabꞌ bꞌaj schꞌumchaji,
sbꞌatn̈ej bꞌajtil snibꞌej vin̈ schꞌuman yicꞌanbꞌati.
5 An̈ejtonaꞌ,
icha pax chiꞌ co tiꞌ tic.
Jabꞌ tzin,
palta tzijtum tas syal yuuj.
Qꞌuinaloc ay junoc namix cꞌacꞌ tzꞌemcan dꞌa caltac teꞌ,
man̈xo jantacoc vayumtac stzꞌabꞌat yuuj.
6 Icha chiꞌ tas scalaꞌ,
lajan yedꞌ junoc namix cꞌacꞌ chiꞌ.
Masanil juntzan̈ chucal ay dꞌa yolyibꞌan̈qꞌuinal tic syal yuuj.
A jun co tiꞌ tic,
yetbꞌeyum sbꞌa yedꞌ co nivanil tic,
palta tzon̈ yicꞌn̈ejbꞌat dꞌa chucal yacbꞌan sbꞌeyn̈ejbꞌat co qꞌuinal.
A juntzan̈ chucal scalaꞌ,
ichato dꞌa scꞌacꞌal infierno scoti.
7 A junjun macan̈il nocꞌ nocꞌ,
nocꞌ much,
nocꞌ chan,
nocꞌ snocꞌal aꞌ mar,
syal co cꞌaybꞌan nocꞌ,
syacꞌ ganar ebꞌ anima scꞌaybꞌan nocꞌ.
8 A on̈ xo anima on̈ tic,
malaj junoc on̈ syal co cꞌaybꞌan co tiꞌ calanel vachꞌil.
A tas syal jun co tiꞌ tic,
te chuc,
max yal co yamanoch vaan.
Lajan icha junoc nocꞌ chan te ay svenenoal scham anima yuuj.
9 A yedꞌ co tiꞌ tic scal vachꞌ lolonel dꞌa Cajal,
aton co Mam Dios,
an̈ejtonaꞌ yedꞌoc pax sco catabꞌej ebꞌ quetanimail,
palta a Dios chiꞌ bꞌojinac pax ebꞌ,
icha val Dios chiꞌ,
icha chiꞌ yutejnac ebꞌ.
10 An̈ejtonaꞌ jun co tiꞌ tic scacꞌlabꞌej calan vachꞌ lolonel dꞌa Dios,
scacꞌlabꞌan pax dꞌa bꞌajval.
Man̈ smojoc icha chiꞌ sco cꞌulej.
11 Qꞌuinaloc ay junoc sjaj a aꞌ ticnaic,
¿toc val junn̈ej sqꞌueul a aꞌ vachꞌ yedꞌ a aꞌ cꞌachiꞌ?
12 Yedꞌ junxo tic,
qꞌuinaloc ay jun ibꞌoc teꞌ higo,
¿tom mansan sat teꞌ ol yacꞌaꞌ?
Mato ay jun ibꞌoc teꞌ uva,
¿tom higo sat teꞌ ol yacꞌaꞌ?
Malaj pax juneloc calan tzꞌaj sqꞌueul a aꞌ vachꞌ yedꞌ a aꞌ cꞌachiꞌ.
A jun jelanil scot dꞌa Dios
13 Tato ay junoc ex jelan ex,
te ay e pensar,
yovalil vachꞌn̈ej tzeyutej e bꞌeybꞌal.
Checlajocabꞌ jun tic yuj e cꞌulan masanil tas dꞌa emnaquilal yedꞌ dꞌa jelanilal.
14 Palta tato ton̈ej scot eyoval,
axon̈ej eyic e gana tze nibꞌej tzeyalaꞌ,
man̈ eyicꞌchaan̈ e bꞌa yuj e jelanil chiꞌ.
Tato icha chiꞌ tzeyutej e bꞌa,
nivan chequel to ton̈ej van eyesanoch e bꞌa jelanil.
15 Tato icha chiꞌ tzeyutej e bꞌa,
a jun e jelanil chiꞌ,
man̈oc dꞌa Dios scoti.
A yolyibꞌan̈qꞌuinal tic ay yicoꞌ,
yic comon anima,
yicn̈ej pax vin̈ diablo yaji.
16 Yujto a bꞌaj ay ebꞌ axon̈ej yic syalaꞌ,
ebꞌ sgana axon̈ej tzꞌacꞌan mandar,
ataꞌ sqꞌue somnaj ebꞌ anima,
spitzvi pax qꞌuechaan̈ masanil macan̈il chucal.
17 Axo jun jelanil scot dꞌa Dios,
man̈ ichoctaꞌ.
Tato sco bꞌeybꞌalej jun jelanil chiꞌ,
malaj junoc tas yuj syal yacꞌjioch dꞌa quibꞌan̈.
Juncꞌolal tzon̈ aji.
Emnaquil scutej co bꞌa.
Sco cꞌanabꞌajej masanil tastac.
Tzꞌocꞌ val co cꞌool dꞌa ebꞌ quetanimail,
a pax tas vachꞌ sco bꞌo dꞌa ebꞌ.
Malaj sqꞌuexan̈il ebꞌ quetanimail dꞌa co sat,
man̈ on̈ chabꞌsatoc paxi.
18 Tato scacꞌoch ebꞌ quetanimail dꞌa juncꞌolal,
syalelcꞌochi to van co bꞌeybꞌalan tas sgana Dios.