Malajocabꞌ sqꞌuexan̈il ebꞌ anima dꞌayon̈
2
Tato yel scacꞌ val och Cajal Jesucristo dꞌa co cꞌool,
aton jun te nivan svachꞌil,
comonoc malaj sqꞌuexan̈il ebꞌ quetanimail dꞌayon̈.
2 Qꞌuinaloc ay junoc bꞌeyum tzꞌochcꞌoch bꞌaj sco molbꞌej co bꞌa,
ayoch junoc scolcꞌabꞌ nabꞌa oro,
te vachꞌ spichul ayochi.
Slajvi chiꞌ tzꞌochcꞌoch junoc mebꞌaꞌ,
n̈icꞌchimtac spichul ayochi.
3 Tato an̈ej yedꞌ jun vachꞌ sbꞌo yedꞌ spichul chiꞌ tzon̈ qꞌuechaan̈,
scalan dꞌay icha tic:
Eman̈ cꞌojan dꞌa jun cꞌojnubꞌ te vachꞌ tic,
xco chi dꞌay.
Axo dꞌa jun mebꞌaꞌ chiꞌ scal icha tic:
Vachꞌ aj lin̈an taꞌ bꞌela ma eman̈ cꞌojan dꞌa sat lum dꞌa in tzꞌey tic,
ta xco chi dꞌay,
4 van cacꞌanoch co bꞌa calani mach nivan yelcꞌoch dꞌa co cal,
mach pax maay.
Palta man̈ vachꞌoc tato icha chiꞌ scutej co bꞌa.
5 Ex xajanabꞌil vuuj,
abꞌec.
A ebꞌ mebꞌaꞌ dꞌa yol sat ebꞌ ay dꞌa yolyibꞌan̈qꞌuinal tic,
aton ebꞌ ix sicꞌjielta yuj Dios yic vachꞌ syacꞌoch Dios ebꞌ dꞌa scꞌool.
A ebꞌ chiꞌ,
ichato bꞌeyum ebꞌ dꞌa yichan̈ Dios chiꞌ,
yujto ol scha smacbꞌen ebꞌ bꞌaj ayoch Dios yajalil,
aton jun ix yalcani to ol yacꞌ dꞌa ebꞌ xajanani.
6 Palta a exxo,
malaj tzꞌoch ebꞌ dꞌayex,
¿tom man̈oc ebꞌ bꞌeyum tzon̈ ixtani,
tzon̈ sjachanbꞌat ebꞌ dꞌa yichan̈ alcal?
7 Aton ebꞌ chiꞌ sbꞌuchvaj dꞌa sbꞌi Cristo,
jun te nivan yelcꞌoch ayon̈ yicoꞌ.
8 Palta ay jun ley tzꞌibꞌabꞌilcan dꞌa Slolonel co Reyal tzꞌalan icha tic:
Ichaocabꞌ eyaꞌilan e bꞌa,
ichaocabꞌ chiꞌ e xajanan ebꞌ ay dꞌa spatic schiquin e pat,
xchi.
Tato sco cꞌanabꞌajej tas syal jun ley chiꞌ,
vachꞌ scutej co bꞌa syal chiꞌ.
9 Palta tato ay sqꞌuexan̈il ebꞌ quetanimail dꞌayon̈,
tzꞌoch val co mul.
An̈ejtonaꞌ a jun ley chiꞌ tzꞌalani to tzꞌoch co mul.
10 Tato ay junoc tas schecji co cꞌulej yuj jun ley chiꞌ,
palta tato max co cꞌulej,
yujn̈ej val jun chiꞌ scotcan masanil ley chiꞌ dꞌa quibꞌan̈.
11 A Dios aljinac icha tic:
Man̈ ex em dꞌa ajmulal,
yalannac paxi:
Man̈ e milcham ebꞌ eyetanimail,
xchi.
Yuj chiꞌ vachꞌchom max on̈ em dꞌa ajmulal,
palta tato sco milcham junoc quetanimail,
syalelcꞌochi to van quecꞌ dꞌa yibꞌan̈ sley Dios chiꞌ.
12 Yuj chiꞌ vachꞌocabꞌ scutej co loloni,
vachꞌocabꞌ pax scutej co bꞌeybꞌal.
Yujto ol on̈ chꞌolbꞌitaj yuj jun ley,
aton jun tzon̈ acꞌanel dꞌa libre.
13 Tato max ocꞌ co cꞌool dꞌa ebꞌ quetanimail,
man̈ ol ocꞌpaxlaj scꞌool Dios dꞌayon̈ ayic ol schꞌolbꞌitan tas caji.
Palta tato tzꞌocꞌ co cꞌool dꞌa ebꞌ quetanimail,
ol ocꞌpax scꞌool dꞌayon̈.
Man̈ cꞌocbꞌiloc ton̈ej scalaꞌ to ayoch Dios dꞌa co cꞌool
14 Ex vucꞌtac ex vanabꞌ,
tato scalaꞌ to ayoch Dios dꞌa co cꞌool,
palta max checlaj yuj co bꞌeybꞌal tato yicon̈xo Dios,
tato icha chiꞌ scutej cacꞌan och Dios dꞌa co cꞌool,
¿tom ol on̈ colchaj yuuj tze naꞌa?
15 Qꞌuinaloc ay junoc quetanimail te mebꞌaꞌ scꞌoch dꞌayon̈,
malaj spichul,
malaj tas svaꞌa.
16 Tato scal dꞌay:
Paxan̈ dꞌa tzalajcꞌolal,
malaj a pena,
cꞌaxnan̈,
say a cꞌoloc,
ta xco chi dꞌay.
Palta ina malaj jabꞌoc tas yovalil tzꞌoch yuuj ix cacꞌ dꞌay,
¿tom ay jabꞌoc vachꞌilal scha yuj co lolonel chiꞌ?
17 Yuj chiꞌ,
tato ton̈ej scacꞌoch Dios dꞌa co cꞌool,
palta man̈ vachꞌoc co bꞌeybꞌal,
nabꞌan̈ej syal chiꞌ.
18 Palta tecan ay ebꞌ tzꞌalan icha tic:
Ay ebꞌ ton̈ej syacꞌoch Dios dꞌa scꞌool.
Ay pax ebꞌ ton̈ej vachꞌ syutej sbꞌeybꞌal,
xcham ebꞌ.
Palta a in tic svalaꞌ to man̈ chequeloc tato ix cacꞌoch Dios dꞌa co cꞌool tato man̈ vachꞌoc co bꞌeybꞌal.
Yuj co vachꞌ bꞌeybꞌal chiꞌ scheclajeli to yel ayoch Dios dꞌa co cꞌool.
19 Ay ebꞌ tzꞌacꞌanoch dꞌa scꞌool to junn̈ej Dios ay.
Yel ton syal ebꞌ.
Palta syacꞌpaxoch jun chiꞌ ebꞌ enemigo dꞌa scꞌool,
sluclon ebꞌ yuj xivelal.
20 Palta ayex jayvan̈ ex,
icha val to malaj e pensar.
Nachajocabꞌel juntzan̈ tic eyuuj.
Tato scacꞌoch Dios dꞌa co cꞌool calani,
palta tato an̈ejaꞌ man̈ vachꞌoc co bꞌeybꞌal,
malaj yelcꞌochi.
21 Ochnac vin̈ co mam quicham Abraham dꞌa pecaꞌ vachꞌil dꞌa yichan̈ Dios,
yujto yicꞌnacbꞌat jun yuninal vin̈ scuchan Isaac,
yic syacꞌan silabꞌoc snaani icha nocꞌ nocꞌ sn̈usji,*
icha yutejnac Dios yalan dꞌa vin̈.
22 Co naec jun to yacꞌnacoch Dios vin̈ dꞌa scꞌool,
yuj chiꞌ yalnac scꞌanabꞌajan vin̈ tas checjinac scꞌulej chiꞌ.
Ato val scꞌulannac jun chiꞌ vin̈,
scheclajnaqueli to yel ay val och Dios chiꞌ dꞌa scꞌool vin̈.
23 Yuj chiꞌ tzꞌelcꞌoch tas syal dꞌa Slolonel,
aton bꞌaj syalcan icha tic:
Yacꞌnacoch vin̈aj Abraham dꞌa scꞌool tas yalnac Dios,
yuj chiꞌ ochnac vin̈ vachꞌil dꞌa yichan̈,
xchi.
An̈ejtonaꞌ syalpaxcani:
Yamigo sbꞌa vin̈ yedꞌ Dios,
xchicani.
24 Yuj chiꞌ te chequel to yuj tas sco cꞌulej tzon̈ och vachꞌil dꞌa yichan̈ Dios,
man̈ yujocn̈ej to scacꞌoch dꞌa co cꞌool.
25 Icha pax chiꞌ ajnac jun ix ajmul ix scuch Rahab dꞌa pecaꞌ.
Yacꞌnac sposado ebꞌ vin̈ schecabꞌ israel* ix.
Slajvi chiꞌ schecannac meltzaj ebꞌ vin̈ ix dꞌa junxo bꞌe,
yic max yamchaj ebꞌ vin̈.
Yuj svachꞌil yutejnac sbꞌa ix chiꞌ dꞌa ebꞌ vin̈,
aljinac ix vachꞌil yuj Dios.
26 Tato scacꞌoch Dios dꞌa co cꞌool calani,
palta man̈ vachꞌoc co bꞌeybꞌal,
malaj yelcꞌoch tas scal chiꞌ.
Lajan on̈ icha junoc nivanil chamnacxo man̈xo ayococh spixanil.