A Chꞌan̈ Scarta Vin̈aj
SANTIAGO
Tzꞌel yich scarta vin̈aj Santiago
1
A in Santiago in tic,
svacꞌ servil Dios yedꞌ Cajal Jesucristo.
Svacꞌbꞌat stzatzil e cꞌool ex lajchav macan̈ vetisraelal sacleminac yajbꞌat dꞌa junjun chon̈abꞌ.
Jun jelanil syacꞌ Dios
2-3 Ex vucꞌtac ex vanabꞌ,
cojtac ayic sjavi yaln̈ej tas provalil dꞌa quibꞌan̈,
tato max chabꞌax co cꞌool yuuj,
tzon̈ te tecꞌcꞌaji.
Yuj chiꞌ con̈ tzalajec ayic sjavi juntzan̈ chiꞌ dꞌa quibꞌan̈.
4 Yuj chiꞌ,
tecꞌtecꞌ scutejec cacꞌanoch Dios dꞌa co cꞌool,
yic ol vachꞌ bꞌo co pensar.
Tato icha chiꞌ,
vachꞌ on̈ dꞌa sat Dios.
Malaj pax jabꞌoc bꞌaj scacꞌ palta dꞌay.
5 Tato ay on̈ manto tzꞌacanoc co jelanil,
co cꞌanec dꞌa Dios,
axo ol acꞌan dꞌayon̈.
Yujto dꞌa smasanil scꞌool syacꞌ dꞌayon̈ co masanil,
tato sco cꞌan dꞌay,
max on̈ stumejlaj.
6 Ayic sco cꞌanan co jelanil chiꞌ,
yovalil scacꞌ och dꞌa co cꞌool to ol co chaꞌa.
Man̈ chabꞌcꞌolaloc sco cꞌanaꞌ.
Yujto a ebꞌ ay schabꞌcꞌolal dꞌa Dios,
lajan ebꞌ icha aꞌ mar sqꞌue chulan sat yuj icꞌ tzꞌemxi pon̈najoc.
7-8 Tato ayex icha ex chiꞌ,
ma ay e chabꞌcꞌolal,
mato man̈ tecꞌanoc tzeyutej e pensar dꞌa masanil tas tze cꞌulej,
man̈ e naꞌa to ay jabꞌoc tas ol e cha dꞌa Cajal chiꞌ.
9 A ex mebꞌaꞌ ex,
tzalajan̈ec,
yujto nivan eyelcꞌoch dꞌa yichan̈ Dios.
10 A exxo bꞌeyum ex,
tzalajan̈ec,
yujto a Dios tzꞌacꞌan nachajel eyuuj to emnaquil ex.
Yujto a ebꞌ bꞌeyum,
lajan ebꞌ icha xumaquil an̈ an̈cꞌultac elan̈chamel tzꞌecꞌbꞌati,
11 yujto ayic ov yem yoc cꞌu,
stacjiem lojnaj an̈ yuj cꞌacꞌ,
junn̈ej rato tzꞌel xumaquil an̈,
tzꞌecꞌbꞌat svachꞌil yilji an̈.
Icha stacjiel xumaquil an̈ chiꞌ,
icha chiꞌ ol aj slajviem ebꞌ bꞌeyum van smolbꞌan stumin.
Ayic tzon̈ acꞌji proval
12 Tato scacꞌ techajoc ayic tzon̈ acꞌji proval,
te vachꞌ quicoꞌ,
yujto ayic toxo ix lajvi cacꞌji proval chiꞌ,
ol co cha spac,
aton co qꞌuinal dꞌa juneln̈ej.
Aton jun yalnaccan Dios to ol yacꞌ dꞌa masanil ebꞌ xajanani.
13 Ayic scuchbꞌaj co cꞌulej junoc chucal,
max yal calani to a Dios tzon̈ cuchbꞌani.
Yujto max yal yacꞌji proval Dios yic scꞌulan chucal.
An̈ejtonaꞌ malaj junoc mach scuchbꞌejbꞌat Dios chiꞌ dꞌa chucal.
14 Palta a junjun on̈,
yujn̈ej junoc tas bꞌaj squiloch co cꞌool,
a tzon̈ cuchbꞌani.
A juntzan̈ chiꞌ tzon̈ montanbꞌat dꞌa chucal.
15 Axo yic sco cꞌulan juntzan̈ tas bꞌaj squiloch co cꞌool chiꞌ,
tzꞌoch co mul,
axo svachꞌ juviel co pensar yuj jun co mul chiꞌ,
yujn̈ej val chiꞌ tzon̈ bꞌatcan dꞌa chamel.
16 Ex xajanabꞌil vuuj,
man̈xo eyacꞌ e bꞌa musansatil.
17 A dꞌa Dios scot masanil tas vachꞌ,
ton̈ej pax siej dꞌayon̈.
Aꞌ bꞌoannac juntzan̈ tzꞌecꞌ dꞌa satchaan̈,
syacꞌan saquilqꞌuinal squilaꞌ.
A juntzan̈ chiꞌ,
vachꞌchom sqꞌuexmaj yilji,
yujto tzꞌoch veven dꞌay,
palta a Dios,
man̈ ichoctaꞌ tzꞌaji.
Malaj bꞌaj sqꞌuex spensar juneloc.
18 Yujto icha chiꞌ ix el dꞌa scꞌool,
ix on̈ yicꞌanchaan̈ yuninaloc yuj slolonel te yel,
yic vachꞌ te nivan quelcꞌoch dꞌa yichan̈ masanil tas bꞌobꞌil yuuj.
Yovalil sco cꞌanabꞌajej slolonel Dios
19 Ex xajanabꞌil vuuj,
ojtaquejequel jun sval tic.
Lista tzeyutej e bꞌa eyabꞌani.
Man̈ comonoc tzeyal eyic dꞌa elan̈chamel.
An̈ejtonaꞌ man̈ comonoc tzeyacꞌcot eyoval,
20 yujto ayic scot coval,
man̈oc tas snibꞌej Dios sco cꞌulej.
21 Yuj chiꞌ cactejeccan masanil chucal dꞌa sat Dios yedꞌ masanil tas malaj svachꞌil ayn̈ejeqꞌui.
Co chaec slolonel Dios dꞌa emnaquilal,
aton jun acꞌbꞌilxooch dꞌayon̈,
yujto ay spoder co colchajcanel yuuj.
22 Co cꞌanabꞌajejec tas xchi slolonel chiꞌ.
Man̈ ton̈ejoc scabꞌeqꞌui.
Tato ton̈ej scabꞌeqꞌui,
a on̈ val lacꞌan scacꞌ musansatil co bꞌa.
23 Tato scabꞌ slolonel Dios,
axo tzꞌaji max co cꞌanabꞌajejlaj,
lajan on̈ icha junoc vin̈ vinac tzꞌilan sat dꞌa junoc nen.
24 Slajvi yilan sat vin̈ chiꞌ,
sbꞌat vin̈,
satxibꞌat dꞌa scꞌool vin̈ chajtil yilji sat chiꞌ.
25 Tato sco cꞌaybꞌej scꞌaybꞌubꞌal vachꞌ abꞌix yic colnabꞌil sicꞌlabꞌil,
aton jun sley Dios tzon̈ acꞌanel dꞌa libre,
max satpaxlaj co cꞌool dꞌa tas syalaꞌ,
tato yel sco cꞌanabꞌajej tas syal chiꞌ,
ol co cha svachꞌcꞌolal Dios dꞌa masanil tas sco cꞌulej.
26 Tato ay on̈ scalaꞌ to ayoch co pensar dꞌa Dios,
palta max co yamoch vaan co tiꞌ dꞌa tas scalaꞌ,
nabꞌan̈ej scalaꞌ to ayoch co pensar dꞌay.
Munil scacꞌ musansatil co bꞌa calan icha chiꞌ.
27 Palta svalan junxo tic:
Tato ay ebꞌ unin man̈xalaj smam,
yedꞌ ebꞌ ix ix chamnacxo yetbꞌeyum ay stzapan smajanil,
yovalil tzon̈ bꞌat quil ebꞌ,
tzon̈ colvaj dꞌa ebꞌ.
An̈ejtonaꞌ,
squicꞌanel co bꞌa dꞌa chucal dꞌa yolyibꞌan̈qꞌuinal tic.
Tato icha chiꞌ scutej co bꞌa,
dꞌa val yel van cacꞌanoch co pensar dꞌa co Mam Dios dꞌa stojolal icha val sgana.