A tas ol aj ebꞌ bꞌeyum
5
Abꞌec ex bꞌeyum.
Elocabꞌ veqꞌuecꞌoc eyav eyoqꞌui,
yujto ay nivac yaelal van sjavi dꞌa eyibꞌan̈.
2 A e bꞌeyumal chiꞌ cꞌaeltacxo,
axo e pichul,
toxon̈ej bꞌulaneqꞌui,
olchimtacxo yuj nocꞌ nocꞌ.
3 Icha pax chiꞌ qꞌuen e tumin,
chicꞌtacxo qꞌueen.
Scheclajel e mul yuj schiqꞌuil qꞌuen e tumin chiꞌ.
Icha stzꞌa junoc tas yuj cꞌacꞌ,
icha chiꞌ ol aj slajviel e nivanil yuj schiqꞌuil qꞌueen.
Te nivan e bꞌeyumal chiꞌ tze molbꞌej,
palta ina vanxo sja slajvubꞌ cꞌual.
4 A ebꞌ e majan smunlaj dꞌayex max e tuplaj ebꞌ,
ton̈ej tzeyacꞌ musansatil ebꞌ.
Yuj chiꞌ tzꞌavajchaan̈ ebꞌ dꞌa e patic yalan e mul,
axo yav ebꞌ chiꞌ syabꞌ Dios Yajal dꞌa Smasanil.
5 A ex tic vachꞌ tzex ecꞌ dꞌa yolyibꞌan̈qꞌuinal tic,
bꞌudꞌan yol e pat yuj masanil tastac ay dꞌayex.
Toxon̈ej tzꞌixtax eyuuj.
Icha junoc vacax tzꞌacꞌji servil yic bꞌaqꞌuechxo ayic smilchaji,
ich ex taꞌ.
Ton̈ej tzeyacꞌ jabꞌoc e gana.
6 A ex tzeyacꞌbꞌat dꞌa yibꞌan̈ ebꞌ tojol spensar.
Ay pax ebꞌ tze milchamoc.
Palta max spac sbꞌa ebꞌ dꞌayex.
Sco tan̈vej sjaubꞌal Cajalil
7 Nivan tzeyutej e cꞌool e tan̈van sjaubꞌal Cajal.
Ina ebꞌ munlajvum stan̈van yelul sat smunlajel,
aton jun sat te nibꞌabꞌil.
Stan̈vej ebꞌ yem bꞌabꞌel n̈abꞌ,
stan̈vej pax ebꞌ slajviecꞌ n̈abꞌil qꞌuinal,
palta nivann̈ej syutej scꞌool ebꞌ yedꞌ smunlajel chiꞌ.
8 Icha syutej sbꞌa ebꞌ munlajvum chiꞌ,
icha chiꞌ tzeyutej e bꞌa e tan̈van sjax Cajalil.
Tecꞌtecꞌ tzeyutej e bꞌa,
yujto toxo ol jaxoc.
9 Man̈ eyeclaj e paticoc junjun ex,
yic man̈ ol acꞌjococh dꞌa eyibꞌan̈,
yujto toxo ol ja jun ol on̈ chꞌolbꞌitanoc.
10 Ex vucꞌtac ex vanabꞌ,
a ebꞌ schecabꞌ Dios alannac el slolonel Dios chiꞌ dꞌa pecaꞌ,
techajnac yuj ebꞌ yabꞌan syail.
Nivan yutejnacpax scꞌool ebꞌ.
Yuj chiꞌ bꞌeybꞌalejec sbꞌeybꞌal ebꞌ chiꞌ.
11 Cojtac to a ebꞌ acꞌannac techaj chiꞌ,
tzalajcꞌolal yaj ebꞌ ticnaic.
Naeccot yabꞌixal vin̈aj Job.
Tecꞌan yutejnac sbꞌa vin̈ yabꞌan syaelal.
Naecpaxcoti,
chajtil ajnac vin̈ yuj Cajalil dꞌa slajvubꞌalxo,
yujto ocꞌnac scꞌool dꞌa vin̈,
ochnac pax pitzꞌan dꞌa scꞌool Cajalil chiꞌ yuj vin̈.
12 Palta ay val junxo ol val dꞌayex to yovalil tze vachꞌ cꞌanabꞌajej.
Man̈ e comon loquej sbꞌi Dios ay dꞌa satchaan̈,
ma sbꞌi junocxo mach,
ma sbꞌi junocxo tas ay dꞌa yolyibꞌan̈qꞌuinal tic.
Ichaocabꞌ tic tzeyutej e loloni.
Tato yel,
Yel,
xe chin̈ej.
Tato maay,
Maay,
xe chin̈ej,
yic man̈ ol cotcan dꞌa eyibꞌan̈.
13 Tato ayex van eyabꞌan syail ticnaic,
lesalvan̈ec.
Tato ayex ay e tzalajcꞌolal jun,
bꞌitanan̈ec dꞌa Dios.
14 Tato ayex penaay ex,
avtejec ebꞌ anciano yic iglesia.
A exxo anciano ex,
lesalvan̈ec yuj ebꞌ.
Tze sucanecꞌ aceite dꞌa ebꞌ dꞌa sbꞌi Cajal.
15 Tato tzeyacꞌoch Dios dꞌa e cꞌool ayic tzex lesalvi yuj ebꞌ,
ol colchajel ebꞌ dꞌa syaelal chiꞌ.
Axo Cajalil ol acꞌan bꞌoxoc scꞌool ebꞌ.
Tato ix och smul ebꞌ jun,
ol acꞌjoc lajvoc smul ebꞌ chiꞌ yuj Dios.
16 Yuj chiꞌ,
al-lajec qꞌueta e mul dꞌayex junjun ex.
Tzex lesalvi eyuj junjun ex,
yic vachꞌ ol bꞌoxoc e cꞌool.
A slesal ebꞌ tojol spensar,
tzijtum val tas sbꞌo yuuj.
17 Ayic yecꞌnac vin̈aj Elías dꞌa pecaꞌ,
anima vin̈ icha on̈ tic.
Lesalvinac vin̈ dꞌa smasanil scꞌool yic max yacꞌ n̈abꞌ.
Nan̈al schan̈il abꞌil majxo yacꞌlaj n̈abꞌ dꞌa jun lugar chiꞌ.*
18 Ato yic slesalvinacxi vin̈,
ichato chiꞌ yacꞌanxi n̈abꞌ.
Ichato chiꞌ syaxbꞌinacxi sat lum luum.