A juntzan̈ cꞌaybꞌubꞌal te yel
2
A achxo tic,
tza cꞌaybꞌej ebꞌ anima dꞌa tas smoj scꞌaybꞌaji,
aton dꞌa juntzan̈ cꞌaybꞌubꞌal te yel.
2 Tzal dꞌa ebꞌ ichamtac vinac to tecꞌan val syutej spensar ebꞌ.
Te vachꞌ syutej sbꞌa ebꞌ,
yic vachꞌ ay yelcꞌoch ebꞌ dꞌa sat ebꞌ yetanimail.
Yovalil syil val sbꞌa ebꞌ.
Syacꞌoch val juntzan̈ cꞌaybꞌubꞌal ebꞌ te yel dꞌa scꞌool.
Xajanocabꞌ ebꞌ anima yuj ebꞌ.
Tecꞌanocabꞌ syutej sbꞌa ebꞌ yabꞌan syail.
3 Yedꞌ pax ebꞌ ix chichimtac ix,
tzal dꞌa ebꞌ ix to yovalil vachꞌ syutej sbꞌa ebꞌ ix icha sgana Dios.
Mocabꞌ yal specal ebꞌ anima ebꞌ ix.
Mocabꞌ ucꞌumoc an̈ ebꞌ ix.
Yovalil schꞌox vachꞌ bꞌeybꞌal ebꞌ ix,
4 sec yuj chiꞌ ol yal scꞌaybꞌan ebꞌ ix cobꞌestac ix ebꞌ ix yic xajanej ebꞌ vin̈ yetbꞌeyum ebꞌ ix yedꞌ yuneꞌ.
5 Yujto a ebꞌ ix cobꞌestac ix chiꞌ,
yovalil syil val sbꞌa ebꞌ ix.
Yovalil tojol syutej sbꞌeybꞌal ebꞌ ix.
Yacꞌocabꞌ servil yol spat ebꞌ ix.
Vachꞌ syutej spensar ebꞌ ix dꞌa ebꞌ yetanimail.
Scꞌanabꞌajan ebꞌ ix tas syal vin̈ yetbꞌeyum.
Tato icha chiꞌ syutej sbꞌa ebꞌ ix,
man̈ ol bꞌuchjoc Slolonel Dios.
6 An̈ejtonaꞌ,
tza cham alej pax dꞌa ebꞌ vin̈ quelemtac to yovalil syil val sbꞌa ebꞌ vin̈.
7 A achxo,
te vachꞌ tzutej a bꞌeybꞌal yil ebꞌ taꞌ.
An̈ej juntzan̈ cꞌaybꞌubꞌal te yel tzal dꞌa ebꞌ.
Ayic tza cꞌaybꞌan ebꞌ,
man̈ ton̈ejoc tzach comon loloni.
8 Tojol tzutej a cꞌaybꞌan ebꞌ,
yic vachꞌ max yal yalan ebꞌ to es bꞌaj tza cꞌaybꞌej ebꞌ chiꞌ.
Tato icha chiꞌ,
a ebꞌ schichonoch scꞌool dꞌayon̈ ol qꞌuixvoquel ebꞌ,
yujto malaj junoc tas ol yal yalan ebꞌ dꞌa co patic.
9 Tzalanpax dꞌa ebꞌ creyente ayoch checabꞌoc to yovalil scꞌanabꞌajej spatrón ebꞌ.
Vachꞌ syutej sbꞌa ebꞌ icha sgana spatrón chiꞌ.
Max yal spacan stiꞌ vin̈ ebꞌ.
10 Max yal yelcꞌan junoc tas ebꞌ dꞌa vin̈.
Yovalil te tojol syutej sbꞌa ebꞌ schꞌoxan svachꞌ bꞌeybꞌal.
Tato icha chiꞌ,
ol yil ebꞌ anima to a juntzan̈ cꞌaybꞌubꞌal yic Dios co Columal te vachꞌ.
11 A Dios ix chꞌoxan svachꞌcꞌolal dꞌayon̈,
yic syal tzon̈ colchajel co masanil dꞌa yolyibꞌan̈qꞌuinal tic.
12 Yuj svachꞌcꞌolal chiꞌ snachajel cuuj to yovalil scactejcan masanil tas man̈ vachꞌoc dꞌa yichan̈ Dios yedꞌ masanil tas malaj svachꞌil sco nibꞌej dꞌa yolyibꞌan̈qꞌuinal tic.
Yovalil squil val co bꞌa,
te vachꞌ scutej co bꞌeybꞌal.
An̈ejocabꞌ dꞌa Dios chiꞌ scacꞌoch co pensar.
13 Co tan̈vejec sjavi jun cꞌual tzalajcꞌolal yic ol ja co Diosal te nivan yelcꞌochi,
aton co Columal Jesucristo.
14 A ix yacꞌcham sbꞌa cuuj,
yic tzon̈ scolelta dꞌa yol scꞌabꞌ chucal.
A ix icꞌanel co mul smasanil,
yic vachꞌ an̈ej ayon̈ yicoꞌ,
yic vachꞌ an̈ej juntzan̈ tas vachꞌ sco cꞌulej.
15 Tzalel juntzan̈ tic dꞌa scal ebꞌ creyente taꞌ.
Tza cuchbꞌej ebꞌ.
Tza cachoch vaan ebꞌ malaj svachꞌil sbꞌeybꞌal,
yujto a chiꞌ opisio yaji.
Te vachꞌ tzutej a bꞌa,
yic malaj ebꞌ ol yal yalan dꞌa a patic to malaj opisio.