A sbꞌeybꞌal ebꞌ creyente
3
Tzeccot sna ebꞌ creyente chiꞌ taꞌ to scꞌanabꞌajej ebꞌ vin̈ yajal ebꞌ.
Yovalil scꞌanabꞌajej ebꞌ tas syal ebꞌ vin̈.
Yaln̈ej tas junoc munlajel vachꞌ,
sbꞌoꞌocabꞌ ebꞌ dꞌa tzalajcꞌolal.
2 Mocabꞌ comon bꞌuchvaj ebꞌ dꞌa ebꞌ anima.
Max yal scomon acꞌan oval ebꞌ yedꞌ junocxo mach.
Yovalil vachꞌ syutej spensar ebꞌ,
yovalil emnaquil syutej sbꞌa ebꞌ dꞌa ebꞌ anima smasanil.
3 Yujto a dꞌa yalan̈taxo,
a on̈ tic,
malaj jabꞌoc co pensar.
Maj co cꞌanabꞌajej Dios.
Te satnac on̈to taꞌ.
Ix co cꞌanabꞌajej yalxon̈ej tas chucal ix co nibꞌej.
Te malaj svachꞌil tas ix co bꞌeybꞌalej.
Ix chichonoch co cꞌool dꞌa ebꞌ anima yuj tastac ay dꞌay.
Chacbꞌil on̈ el yuj ebꞌ.
An̈ejtonaꞌ,
ix co chaclaj co bꞌa junjun on̈.
4 Palta ix schꞌox svachꞌcꞌolal Dios co Columal dꞌayon̈ co masanil.
Ix schꞌoxani to xajan on̈ yuuj.
5 Yuj chiꞌ,
ix on̈ scoloꞌ.
Man̈ yujoc junoc tas vachꞌ ix co cꞌulej ix on̈ colchaji,
palta yujn̈ej to ix ocꞌ scꞌool Dios dꞌayon̈.
Ayic ix yicꞌanel co mul,
ichato ix on̈ aljixi dꞌa schaelal.
Yuj Yespíritu ix qꞌuexmaj co pensar.
6 Dꞌa smasanil scꞌool Dios ix yacꞌcot Yespíritu dꞌayon̈ yuj co Columal Jesucristo
7 yic vachꞌ yuj val svachꞌcꞌolal tzon̈ och vachꞌil dꞌa yichan̈.
Yuj chiꞌ,
ol yacꞌ co qꞌuinal dꞌa juneln̈ej,
aton jun scacꞌoch yipoc co cꞌool.
8 A juntzan̈ cꞌaybꞌubꞌal tic,
te yel.
In gana tecꞌan tzutej a bꞌa alaneli,
yic vachꞌ a ebꞌ tzꞌacꞌanoch Dios dꞌa scꞌool,
ol yacꞌ val och spensar ebꞌ scꞌulan juntzan̈ tas vachꞌ.
A juntzan̈ lolonel tic,
te vachꞌ.
Te ay yopisio dꞌayon̈ co masanil.
9 Palta man̈ acꞌoch a bꞌa yedꞌ ebꞌ scomon telaj sbꞌa yuj juntzan̈ tas malaj bꞌaj scꞌanabꞌajaxi,
yedꞌ ebꞌ an̈ej yabꞌixal smam yicham syalaꞌ.
Man̈ acꞌ pax och a bꞌa yedꞌ ebꞌ scomon acꞌan oval yedꞌ pax ebꞌ stelaj sbꞌa yuj ley Moisés.
A juntzan̈ syal ebꞌ chiꞌ,
malaj jabꞌoc yopisio.
Nabꞌan̈ej syixtej sbꞌa ebꞌ yalani.
10 Tato ay ebꞌ sgana yacꞌan spoj sbꞌa ebꞌ creyente,
tza cachoch vaan junel chaeloc ebꞌ.
Tato max scꞌanabꞌajej ebꞌ,
tziqꞌuel ebꞌ dꞌa e cal.
11 Yujto ojtac to a ebꞌ icha chiꞌ syutej sbꞌa,
toxon juvinacxoel ebꞌ.
Munil yojtacxo ebꞌ to ayxo och dꞌa yibꞌan̈ ebꞌ yuj schucal.
Jun checnabꞌil dꞌa vin̈aj Tito
12 Ol in checbꞌat vin̈ cucꞌtac Artemas dꞌayach,
mato a vin̈ cucꞌtac Tíquico ol bꞌatoc.
Ayic scꞌoch vin̈ dꞌayach,
elan̈chamel tzach bꞌat dꞌa chon̈abꞌ Nicópolis in ilaꞌ yujto ataꞌ in gana ay in eqꞌui ayic ol ecꞌ n̈abꞌilqꞌuinal.
13 Ayic sbꞌat vin̈ cucꞌtac Zenas,
aton vin̈ licenciado yedꞌ vin̈ cucꞌtac Apolos bꞌaj sbꞌati,
tzach colvaj val dꞌa ebꞌ vin̈.
Tzacꞌn̈ej dꞌa ebꞌ vin̈ tas tzꞌoch yuj ebꞌ vin̈ dꞌa yoltac bꞌe.
14 Tza cꞌaybꞌej ebꞌ quetcreyenteal taꞌ,
yic te vachꞌ syutej sbꞌa ebꞌ,
slaj colvaj pax ebꞌ dꞌa ebꞌ mebꞌaꞌ,
yic vachꞌ ay yopisio ebꞌ dꞌa sat Dios.
Stzatzil scꞌool ebꞌ creyente
15 A jantacn̈ej ebꞌ ayecꞌ vedꞌ dꞌa tic,
syacꞌbꞌat stzatzil a cꞌool ebꞌ.
Tzacꞌ stzatzil scꞌool masanil ebꞌ creyente xajan on̈ yuj taꞌ.
Yacꞌocabꞌ svachꞌcꞌolal Dios dꞌayex e masanil taꞌ.
Amén.