Schabꞌil Timoteo sbꞌi jun carta tic, aton schabꞌil carta stzꞌibꞌejnacbꞌat vin̈aj apóstol Pablo dꞌa vin̈aj Timoteo yuj juntzan̈xo lolonel syalbꞌat vin̈ dꞌa vin̈, yic scolvaj vin̈ yedꞌ vin̈ dꞌa bꞌajtac tzꞌeqꞌui. Yujto yojtacxo vin̈aj Pablo chiꞌ to toxo ol chamoc, yuj chiꞌ ix yacꞌ val yip vin̈ scꞌaybꞌancan vin̈aj Timoteo chiꞌ, yic syacꞌan techaj juntzan̈ proval vin̈ sjavi dꞌa yibꞌan̈, tecꞌanpax syutej vin̈ yacꞌan testigoal sbꞌa yuj Cristo. Ix yalanpaxbꞌat vin̈ yic vachꞌ syutej sbꞌa vin̈aj Timoteo yedꞌ Slolonel Dios. Yovalil scꞌanabꞌajej vin̈ yilan yopisio, aton alojel vachꞌ abꞌix vachꞌchom ay ebꞌ ayoch ajcꞌolal dꞌa vin̈. Ix yalanpaxbꞌat vin̈ dꞌa vin̈aj Timoteo chiꞌ to max yal yacꞌanoch sbꞌa vin̈ dꞌa juntzan̈ telajbꞌail malaj bꞌaj scꞌanabꞌajaxi, malaj pax jabꞌoc tas vachꞌ syacꞌaꞌ, yujto a ebꞌ tzꞌabꞌan juntzan̈ lolonel chiꞌ, ton̈ej svachꞌ juviel spensar ebꞌ yuuj.

A yuj juntzan̈ tic tzꞌaljibꞌat dꞌa vin̈aj Timoteo chiꞌ, yic vachꞌ snacot vin̈ tastac ix schꞌox vin̈aj Pablo chiꞌ dꞌa vin̈, aton cꞌaybꞌubꞌal, yujto a vin̈aj Pablo chiꞌ, tecꞌan yutejnac sbꞌa vin̈ dꞌa scal juntzan̈ yaelal ix acꞌjioch dꞌa yibꞌan̈.