Bꞌabꞌel Timoteo sbꞌi jun carta tic, aton jun bꞌabꞌel carta stzꞌibꞌejnacbꞌat vin̈aj apóstol Pablo dꞌa jun vin̈ quelem ochnac creyenteal dꞌa yol yic Asia. Yin̈tilal Israel ix snun vin̈, axo vin̈ smam vin̈, griego vin̈. Ayic xidꞌnaquecꞌ vin̈aj Pablo dꞌa Asia chiꞌ dꞌa sbꞌabꞌelal, ataꞌ ochnac vin̈ creyenteal, ecꞌnac vin̈ yedꞌ vin̈aj Pablo chiꞌ bꞌajtac ecꞌnac.

A jun carta bꞌatnac dꞌa vin̈aj Timoteo chiꞌ, ox macan̈ nivac yelcꞌoch yaji: Bꞌabꞌel macan̈, tzꞌel yich dꞌa capítulo 1 masanto dꞌa 2, ataꞌ syal yuj juntzan̈ cꞌaybꞌubꞌal syal ebꞌ scomon alejoch sbꞌa cꞌaybꞌumal. A ebꞌ chiꞌ syal ebꞌ to syal co chaan co colnabꞌil yuj juntzan̈ lolonel elcꞌaltac yaji. Syalanpax ebꞌ to ay juntzan̈ tas ay yovalil svaji. Max yalpax yoch yetbꞌeyum anima yalan ebꞌ.

Axo schabꞌil macan̈, tzꞌilchaj dꞌa capítulo 3, syal yuj tas tzꞌaj co munlaj yedꞌ iglesia, icha yic tzꞌoch culto. Syalanpax tas yovalil sbꞌeybꞌalej ebꞌ anciano, ebꞌ diácono yedꞌ ebꞌ ix ix tzꞌoch yopisio.

Axo yoxil macan̈, tzꞌel yich dꞌa capítulo 4 masanto dꞌa 6, syal yuj tas smoj sbꞌeybꞌalej vin̈aj Timoteo yic syacꞌan servil Jesucristo vin̈. Syalanpax dꞌa vin̈, tas yovalil syutej sbꞌa vin̈ dꞌa scal junjun macan̈ anima dꞌa iglesia.