Lesalvan̈ec cuuj
3
A ticnaic,
lesalvan̈ecn̈ej cuuj,
yic vachꞌ ol pucaxel slolonel Cajal Jesús dꞌa scal ebꞌ anima smasanil dꞌa elan̈chamel,
yic ol scha ebꞌ dꞌa smasanil scꞌool icha eyutejnac e chaani.
2 Cꞌanecn̈ej pax dꞌa Dios cuuj,
yic ol on̈ colchajel dꞌa yol scꞌabꞌ ebꞌ te chuc spensar.
Yujto man̈ masaniloc anima tzꞌacꞌanoch Dios dꞌa scꞌool.
3 Palta a Cajal Jesús,
tzꞌeln̈ejcꞌoch tas syalaꞌ.
A tzꞌacꞌan e tecꞌanil.
Tzex scolanpaxel dꞌa vin̈ chuc.
4 Scacꞌoch Cajal Jesús yipoc co cꞌool to van e cꞌanabꞌajan juntzan̈ checnabꞌil calnaccan dꞌayex to ol e cꞌanabꞌajejn̈ej pax dꞌa masanil tiempo.
5 Sco nibꞌej to a Cajal Jesús tzꞌacꞌan nachajel eyuuj to xajan ex yuj Dios.
Sco nibꞌej tzꞌoch Cristo eyedꞌoc yic tecꞌan tzeyutej e bꞌa icha yutejnac sbꞌa.
Yovalil tzon̈ munlaji
6 A dꞌa sbꞌi Cajal Jesucristo scalbꞌat juntzan̈xo checnabꞌil tic dꞌayex.
Tato ay ebꞌ creyente jaragana,
tato max scꞌanabꞌajej juntzan̈ cꞌaybꞌubꞌal ecꞌ calnaccan dꞌayex ebꞌ,
max yal-laj junn̈ej tzex ecꞌ yedꞌ ebꞌ.
7 Eyojtacxo,
smoj val tze cꞌanabꞌajej co bꞌeybꞌal,
yujto man̈ jaraganaoc ecꞌ cutejnac co bꞌa dꞌa e cal.
8 Eyojtac to malaj bꞌaj co matanejnac va co bꞌa dꞌayex.
Palta cꞌual dꞌacꞌval munlajnac on̈ dꞌa e cal.
Cacꞌnac val quip co munlaji,
yujto malaj co gana ay mach tzꞌabꞌan syail yacꞌan tas tzꞌoch cuuj taꞌ.
9 Vachꞌchom ay calan quic co cꞌanan co gasto dꞌayex,
palta munlaj on̈ yedꞌ co cꞌabꞌ.
Icha chiꞌ cutejnac co chꞌoxan jun vachꞌ bꞌeybꞌal dꞌayex,
yic vachꞌ tze cꞌanabꞌajej co bꞌeybꞌal chiꞌ.
10 Yujto ayic ay on̈ ecꞌ dꞌa e cal,
calannaccan jun checnabꞌil dꞌayex,
aton jun syal icha tic:
Tato ay mach malaj sgana smunlaji,
mocabꞌ vaoc,
xchi.
11 Scalbꞌat juntzan̈ tic dꞌayex yujto ix cabꞌi to ayex mach ex jaragana ex.
Ton̈ej tze comon aqꞌuejoch e bꞌa dꞌa scal juntzan̈ tas bꞌaj malaj eyalan eyicoꞌ.
12 A ex icha chiꞌ tzeyutej e bꞌa,
a dꞌayex scalbꞌat jun checnabꞌil tic.
Yuj Cajal Jesucristo scham val calanbꞌat dꞌayex to tzex munlaj val dꞌa tzalajcꞌolal,
yic vachꞌ ol ilchaj tas yovalil tzꞌoch eyuuj.
13 Man̈ ex tzactzaj e cꞌulan juntzan̈ tas vachꞌ taꞌ.
14 Tato ay ebꞌ max cꞌanabꞌajan tas scalbꞌat dꞌa jun co carta tic,
yovalil tzeyacꞌ checlajel ebꞌ dꞌa e cal,
yic ol qꞌuixvoquel ebꞌ.
An̈ejtonaꞌ,
man̈ junn̈ejoc tzex ecꞌ yedꞌ ebꞌ.
15 Palta max yal eyajcꞌolan e bꞌa yedꞌ ebꞌ.
Tze yec val sna ebꞌ,
yujto creyente ebꞌ eyedꞌoc.
Syacꞌbꞌat stzatzil scꞌool ebꞌ vin̈aj Pablo
16 Aocabꞌ Cajal Jesús,
aton jun acꞌum juncꞌolal syacꞌ val sjuncꞌolal dꞌayex dꞌa masanil tiempo.
Ochocabꞌ pax eyedꞌoc e masanil taꞌ.