Ol checlajel vin̈ yajal chucal
2
A ticnaic,
tzin tzꞌibꞌejbꞌat dꞌayex chajtil ol aj sjavi Cajal Jesucristo,
aton yic ol on̈ molchajoch yedꞌoc.
Tzin tevibꞌat dꞌayex to
2 max e comon aqꞌuej somchajel e pensar tato ay ebꞌ tzꞌalan dꞌayex to janacxo scꞌual Cajal chiꞌ.
Vachꞌchom syal ebꞌ to a Yespíritu Dios ix chꞌoxan dꞌa ebꞌ,
ma munil syal ebꞌ dꞌa yol yicoꞌ,
palta man̈ ex och ilcꞌolal yuj ebꞌ.
Taxon̈ej syal ebꞌ to ix cꞌoch co carta dꞌa ebꞌ,
palta man̈ e cha eyabꞌi.
3 Man̈ eyacꞌ musansatil e bꞌa,
yujto ayic manto ja jun cꞌual chiꞌ,
tzijtum mach ol meltzaj pax och ajcꞌolal dꞌa Dios.
Ato taꞌ ol checlajel vin̈ yajalil chucal.
A vin̈ chiꞌ,
yovalil ol acꞌjoccanbꞌat vin̈ dꞌa syaelal.
4 A jun vin̈ chiꞌ ol yacꞌ oval vin̈ yedꞌ Dios.
Ol chichon scꞌool vin̈ dꞌa jantacn̈ej comon dios yedꞌ dꞌa jantacn̈ej tas bꞌaj syal sbꞌa ebꞌ anima.
Ol em val cꞌojan vin̈ dꞌa yol stemplo Dios,
ol yalanoch sbꞌa vin̈ Diosal.
5 Naeccoti to ix valcan juntzan̈ tic dꞌayex ayic ay in ecꞌ eyedꞌ taꞌ.
6 Eyojtac tas tzato cachanoch vaan vin̈ yic max checlajelta vin̈.
Palta ato yic ol javoc stiempoal,
ato taꞌ ol checlajelta vin̈.
7 A ticnaic,
a chucal vanxo smunlaj dꞌa elcꞌaltac masanto ol icꞌjoc el jun mach scachanoch vaan schꞌoxcꞌabꞌan sbꞌa chiꞌ.
8 Ato val taꞌ ol checlajcanel jun vin̈ yajal chucal chiꞌ.
Palta ayic ol javoc Cajal Jesús ol spucham vin̈ yajal chucal chiꞌ yedꞌ yicꞌ,
axo stziquiquial ol icꞌan satcanel vin̈.
Palta ayic manto satel vin̈ chiꞌ,
a tic ol scꞌulej vin̈:
9 Ayic ol checlajel vin̈ ol yacꞌoch sbꞌa vin̈ Satanás yedꞌ vin̈.
Ol yacꞌoch spoder vin̈ dꞌa vin̈.
Yuj chiꞌ ol yal sbꞌoan juntzan̈ milagro vin̈ yedꞌ juntzan̈xo tas ol chꞌoxanel spoder,
palta es juntzan̈ chiꞌ.
10 Tzijtum tas malaj svachꞌil ol scꞌuloc vin̈,
yic ol yacꞌ musansatil ebꞌ anima satnac vin̈.
Ol satcanel ebꞌ,
yujto malaj sgana ebꞌ syacꞌoch jun cꞌaybꞌubꞌal te yel tic dꞌa scꞌool yic scolchajel ebꞌ.
11 Yuj chiꞌ,
a Dios ol chaan acꞌjoc musansatil ebꞌ,
yic ol yacꞌoch jun es chiꞌ ebꞌ dꞌa scꞌool.
12 Yuj chiꞌ a jantacn̈ej ebꞌ maj acꞌanoch jun cꞌaybꞌubꞌal te yel tic dꞌa scꞌool,
ol acꞌjoccanbꞌat ebꞌ dꞌa syaelal,
yujto ix qꞌuechaan̈ ebꞌ yedꞌ chucal.
Sicꞌbꞌil on̈xo el yuj Dios
13 Ex xajanabꞌil yuj Cajal Jesús,
yovalil scacꞌn̈ej yuj diosal dꞌa Dios eyuuj,
yujto sicꞌbꞌil ex taxoncanel yuj Dios chiꞌ quedꞌoc dꞌa yichbꞌanil,
yic tzex colchaj yuj Yespíritu.
A tzex acꞌanoch yicoc Dios.
Yuj chiꞌ tzex colchaj quedꞌoc,
yujto tzeyacꞌoch jun cꞌaybꞌubꞌal te yel tic dꞌa e cꞌool.
14 Yuj jun vachꞌ abꞌix yic colnabꞌil ecꞌ calnac dꞌayex,
a Dios avtannac ex och yicoc,
yic vachꞌ ay eyalan eyic dꞌa snivanil yelcꞌoch Cajal Jesucristo quedꞌoc.
15 Yuj chiꞌ,
tecꞌan val tzeyutej e bꞌa.
Man̈ eyacꞌ sat e cꞌool dꞌa juntzan̈ cꞌaybꞌubꞌal ecꞌ calnaccan dꞌayex yedꞌ juntzan̈xo co tzꞌibꞌejnacbꞌat dꞌayex.
16 Tzon̈ xajanej Cajal Jesucristo yedꞌ co Mam Dios.
Syacꞌ snivanil co cꞌool dꞌa masanil tiempo yuj svachꞌcꞌolal.
Syacꞌanpax cacꞌoch svachꞌil yipoc co cꞌool.
17 Co gana a svachꞌ acꞌan tzalajcꞌolal dꞌayex.
Syacꞌanpax e tecꞌanil yic vachꞌ a jantacn̈ej tas tzeyalaꞌ,
tze cꞌulej,
vachꞌn̈ej dꞌa yichan̈.