3 Ex vucꞌtac ex vanabꞌ,

yovalil scacꞌn̈ej yuj diosal dꞌa Dios eyuuj.

Smoj ton scal icha chiꞌ,

yujto junjun cꞌu,

tzeyacꞌ val och Dios dꞌa e cꞌool.

An̈ejtonaꞌ,

tze te xajanej val ebꞌ eyetcreyenteal.

4 Yuj chiꞌ scalel e vachꞌil dꞌa scal ebꞌ creyente dꞌa junjun yiglesia Dios.

Yujto tzijtum tas tzꞌacꞌjioch dꞌa eyibꞌan̈,

te nivan syaelal van eyabꞌan taꞌ,

palta tecꞌan val tzeyutej eyacꞌanoch Dios dꞌa e cꞌool.

Van eyacꞌan techaj smasanil.

5 Icha chiꞌ tzꞌaj scheclajeli to tojol syutej Dios on̈ schꞌolbꞌitani.

Yuj chiꞌ syalaꞌ to smoj tzex och bꞌaj ol yacꞌ Yajalil,

yujn̈ej to van eyabꞌan syaelal yuuj.

6 A Dios te tojol toni,

yuj chiꞌ ol yacꞌ syaelal ebꞌ tzex ixtan ticnaic.

7 Van eyabꞌan syaelal quedꞌoc.

Palta ol acꞌjoc snivanil co cꞌool yuj Dios ayic ol cot Cajal Jesús yedꞌ ebꞌ yángel dꞌa satchaan̈,

aton ebꞌ te nivan spoder.

Ayic ol emuloc,

yedꞌnac jun cꞌacꞌ n̈iln̈on sqꞌue scꞌacꞌal.

8 Ataꞌ ol acꞌjoc syaelal ebꞌ man̈ ojtannacoc Dios,

aton ebꞌ max cꞌanabꞌajan vachꞌ abꞌix yic Cajal Jesucristo.

9 A ebꞌ chiꞌ,

ol bꞌatcan ebꞌ dꞌa syaelal dꞌa juneln̈ej.

Ol icꞌjoccanel ebꞌ dꞌa stzꞌey Cajal Jesús,

yic man̈xa bꞌaqꞌuin̈ ol yil svachꞌil ebꞌ yedꞌ spoder.

10 A dꞌa jun cꞌual ayic ol javoc Cajal Jesús chiꞌ,

te nivan ol aj yelcꞌoch dꞌayon̈ a on̈ yic on̈xo tic.

Co masanil a on̈ creyente on̈ tic,

ol caqꞌuem co bꞌa dꞌay.

Locan ex quedꞌoc yujto eyacꞌnac och jun abꞌix ecꞌ calnac dꞌa e cꞌool.

11 Yuj val jun tic junjun cꞌu tzon̈ lesalvi eyuuj.

Sco cꞌan dꞌa co Diosal eyuuj,

yic vachꞌ ex dꞌa yichan̈,

yujto aꞌ avtannac ex och yicoc.

Sco cꞌananpax dꞌay to syacꞌ spoder dꞌayex,

yic tze bꞌeybꞌalej masanil tas vachꞌ icha e gana,

tzex munlaj pax dꞌay,

yujto tzeyacꞌoch dꞌa e cꞌool.

12 Tato icha chiꞌ tzeyutej e bꞌa,

ol aljoc vachꞌ lolonel dꞌa Cajal Jesucristo eyuuj.

Axo ol ex alan pax vachꞌil.

Icha chiꞌ ol ex ajoc,

yujto a co Diosal yedꞌ Cajal Jesucristo chiꞌ ol acꞌan svachꞌcꞌolal dꞌayex.