3 Ayic ix in bꞌat dꞌa yol yic Macedonia,

ix in cꞌan pavor dꞌayach to tzach can dꞌa Éfeso,

yujto in gana scham val alan dꞌa ebꞌ scꞌaybꞌan ebꞌ dꞌa juntzan̈ chꞌoc cꞌaybꞌubꞌal to yovalil syactejcan ebꞌ yalani.

4 Tzal dꞌa ebꞌ to max yixtej stiempo ebꞌ scꞌaybꞌan juntzan̈ abꞌix malaj bꞌaj scꞌanabꞌajaxi yedꞌ dꞌa yabꞌixal smam yicham ebꞌ,

yujto tzijtum juntzan̈ abꞌix chiꞌ yojtac ebꞌ.

Ton̈ej scomon telaj sbꞌa ebꞌ yuuj,

palta malaj yelcꞌochi.

A juntzan̈ abꞌix chiꞌ,

malaj yopisio on̈ scꞌaybꞌan dꞌa tas tzꞌaj cacꞌanoch dꞌa co cꞌool tas nabꞌil yuj Dios dꞌa quibꞌan̈.

5 Svalbꞌat jun checnabꞌil tic dꞌayach yic vachꞌ xajanej val sbꞌa ebꞌ creyente taꞌ.

Tato stojolbꞌitej sbꞌa ebꞌ,

tato syil val sbꞌa ebꞌ yedꞌ spensar,

tato yel syacꞌoch Dios ebꞌ dꞌa scꞌool,

ol xajanej sbꞌa ebꞌ yedꞌ ebꞌ yetanimail.

6 Palta ay ebꞌ tzꞌactancan jun vachꞌ bꞌeybꞌal sval tic.

Yuj chiꞌ,

ton̈ej scomon aqꞌuejoch spensar ebꞌ dꞌa juntzan̈ comon lolonel malaj bꞌaj scꞌanabꞌajaxi.

7 Sgana ebꞌ syacꞌoch sbꞌa cꞌaybꞌumaloc dꞌa ley Moisés.

Palta max nachajel-laj yuj ebꞌ tas syalelcꞌochi.

Vachꞌchom stecꞌbꞌej sbꞌa ebꞌ yalani,

palta max nachajpaxel yuj ebꞌ tas van yalan ebꞌ chiꞌ.

8 Cojtac val to ay yopisio ley Moisés chiꞌ tato yel sco cꞌanabꞌajej icha val tas syalaꞌ.

9 Cojtacpaxi to man̈ yujoc ebꞌ vachꞌ sbꞌeybꞌal ix acꞌjican juntzan̈ ley chiꞌ,

palta aton yuj ebꞌ ol val tic ix acꞌjicani:

Ebꞌ pit syutej sbꞌa dꞌa Dios,

ebꞌ max cꞌanabꞌajan tas syal Dios,

ebꞌ max bꞌeybꞌalan icha sgana Dios,

ebꞌ chuc sbꞌeybꞌal,

ebꞌ malaj tzꞌoch Dios dꞌay,

ebꞌ scomon bꞌuchvaj dꞌa tas vachꞌ,

ebꞌ smacꞌancham smam snun,

ebꞌ macꞌumcham anima,

10 ebꞌ tzꞌemn̈ej dꞌa ajmulal,

ebꞌ vin̈ vinac syicꞌlaj sbꞌa yedꞌ yetvinaquil,

ebꞌ elcꞌum anima,

ebꞌ tzꞌesani,

ebꞌ tzꞌacꞌanoch es dꞌa yibꞌan̈ ebꞌ yetanimail yedꞌ ebꞌ scꞌulan junocxo tas max scha sbꞌa yedꞌ jun cꞌaybꞌubꞌal te yel,

yuj chiꞌ ix can jun ley chiꞌ.

11 A jun cꞌaybꞌubꞌal te yel tic,

aton jun vachꞌ abꞌix yacꞌnac Dios dꞌayin yic svaleli.

A jun vachꞌ abꞌix tic,

te nivan yelcꞌochi.

A tzꞌalan yabꞌixal Dios,

aton jun te tzalajcꞌolal yaji.

12 Svacꞌ yuj diosal dꞌa Cajal Jesucristo,

yujto te ayoch vedꞌ dꞌa vopisio tic,

ix yalaꞌ to cꞌanabꞌajum in dꞌay,

yuj chiꞌ ix yacꞌ vopisio vacꞌan servil.

13 A dꞌa yalan̈taxo,

te bꞌuchumtac in dꞌa Cristo.

Vacꞌnac val chucal dꞌay,

ochnac in val ajcꞌolal dꞌay.

Palta ix ocꞌ val scꞌool Dios dꞌayin,

yujto manto in creyenteoc taꞌ.

Musansatil icꞌan in cꞌulannac juntzan̈ chiꞌ.

14 Te nivan svachꞌcꞌolal Cajal Jesús yacꞌnac dꞌayin.

A acꞌjinac vacꞌoch in cꞌool dꞌay,

xajan in yuuj,

icha chiꞌ syutej yacꞌan dꞌayon̈ junjun on̈,

yujto junxon̈ej caj yedꞌ Cristo Jesús.

15 Ay jun tas ol valaꞌ te yel.

Smoj co chaan cabꞌi:

Ulnaquecꞌ Cristo Jesús dꞌa yolyibꞌan̈qꞌuinal tic,

yic tzon̈ scolcanel a on̈ ajmulon̈ tic.

A in tic,

tzꞌecꞌxo val dꞌa yibꞌan̈ te chuc in dꞌa yichan̈ anima smasanil.

16 Yuj chiꞌ,

ix ocꞌ scꞌool Dios dꞌayin,

yic vachꞌ vuuj scheclajeli to te ay snivancꞌolal Jesucristo.

Yuj chiꞌ a in tic,

chꞌoxnabꞌil vaj dꞌa jantac ebꞌ toto ol acꞌanoch Cajalil chiꞌ dꞌa scꞌool,

yic ol scha sqꞌuinal ebꞌ dꞌa juneln̈ej.

17 A Dios Yajal dꞌa masanil tiempo.

Malaj bꞌaqꞌuin̈ ol chamoc.

Malaj junoc mach syal yilani.

An̈ejton jun Dios tic,

malaj junocxo.

Nivanocabꞌ yelcꞌoch dꞌayon̈.

Calec vachꞌ lolonel dꞌay dꞌa masanil tiempo.

Amén.

18 Ach Timoteo,

tzach in xajanej val icha junoc vuninal.

Svalbꞌat juntzan̈ checnabꞌil tic dꞌayach,

yic tzach munlaj icha yalnaccan juntzan̈ ebꞌ uuj,

ato a ix acꞌji yal ebꞌ yuj Dios.

Yuj chiꞌ icha junoc soldado te vachꞌ syutej sbꞌa dꞌa yopisio,

icha val chiꞌ tzutej a bꞌa acꞌan ip a munlaj dꞌa yic Dios.

Tecꞌan tzutej a bꞌa acꞌanoch Dios chiꞌ dꞌa a cꞌool.

Tzil val a bꞌa yedꞌ a pensar dꞌa masanil tiempo.

19 Ay ebꞌ maxtzac syaꞌilej sbꞌa yedꞌ spensar,

yuj chiꞌ ix vachꞌ juviel ebꞌ dꞌa jun cꞌaybꞌubꞌal ix yacꞌoch dꞌa scꞌool.

20 Icha chiꞌ ix yutej sbꞌa vin̈aj Himeneo yedꞌ vin̈aj Alejandro,

yuj chiꞌ ix vacꞌoch ebꞌ vin̈ dꞌa yol scꞌabꞌ vin̈ Satanás,

yic syojtaquejel ebꞌ vin̈ to max yal-laj co comon bꞌuchvaj dꞌa Dios.