Checnabꞌil yuj lesal
2
A ticnaic,
tzin bꞌabꞌlaj alej val bꞌat jun tic dꞌayach.
Yovalil tzon̈ tevi dꞌa Dios yuj anima smasanil.
Yovalil sco cꞌan dꞌa Dios yic syacꞌ svachꞌcꞌolal dꞌa ebꞌ,
yic scolvajpax yedꞌ ebꞌ.
2 Yovalil tzon̈ lesalvi yuj ebꞌ nivac yajal yedꞌ pax yuj ebꞌ yajal smasanil,
yic vachꞌ juncꞌolal tzon̈ aj yedꞌ ebꞌ,
yic malaj pax tas sqꞌue vaan dꞌa co cal yedꞌ ebꞌ.
Tato icha chiꞌ,
ol yal co cꞌulan icha sgana Dios,
ol yalpax co bꞌeyecꞌ dꞌa acꞌancꞌolal.
3 Tato icha chiꞌ scutej co bꞌa,
te vachꞌ dꞌa sat Dios co Columal.
Ste tzalaj val quedꞌoc.
4 Yujto sgana Dios chiꞌ scolchajcanel ebꞌ anima smasanil.
Sgana syojtaquejel jun cꞌaybꞌubꞌal ebꞌ te yel.
5 Junn̈ej ton Dios ay.
An̈ejtonaꞌ,
junn̈ej pax mach syal yacꞌanoch co tiꞌ dꞌay,
aton Jesucristo,
yujto a ochnac animail.
6 Aꞌ ulnaquecꞌ yacꞌoch sbꞌa dꞌa yol scꞌabꞌ chamel,
yic scolel masanil ebꞌ anima dꞌa jun yaelal ol acꞌjoc och dꞌa yibꞌan̈ ebꞌ yuj smul.
A schamel chiꞌ a val dꞌa stiempoal ix uji yic scheclajeli to sgana Dios scolchajel ebꞌ anima smasanil.
7 Yuj val jun tic,
ix acꞌji vopisio valanel jun abꞌix tic.
Ix in acꞌjioch schecabꞌoc Jesucristo yic tzin cꞌaybꞌej ebꞌ man̈ israeloc dꞌa jun cꞌaybꞌubꞌal te yel tic,
yic syacꞌoch Cristo ebꞌ dꞌa scꞌool.
Te yel svalaꞌ,
man̈ vanoc vesani.
8 Yuj chiꞌ in gana slesalvi ebꞌ vin̈ vinac dꞌa junjun lugar.
A ebꞌ syicꞌchaan̈ scꞌabꞌ slesalvi,*
yovalilocabꞌ vachꞌ sbꞌeybꞌal ebꞌ dꞌa yichan̈ Dios,
malajocabꞌ schichoncꞌolal ebꞌ,
malajocabꞌ bꞌaj stelaj sbꞌa ebꞌ.
9 Axo ebꞌ ix ix,
yovalil vachꞌ syutej ebꞌ ix yacꞌanoch spichul,
tojoln̈ejocabꞌ syutej ebꞌ ix yacꞌanochi.
Mocabꞌ acꞌumtacoc syutej sbꞌa ebꞌ ix spachꞌuchꞌan xil sjolom.
Mocabꞌ acꞌumtacoc syutej sbꞌa ebꞌ ix yuj juntzan̈ oro sveei yilji dꞌa sn̈iꞌ schꞌumil ebꞌ ix.
Mocabꞌ acꞌumtacoc pax syutej sbꞌa ebꞌ ix yuj juntzan̈ pichul te caro stojol syacꞌochi.
10 Aocabꞌ vachꞌ bꞌeybꞌal schꞌoxel ebꞌ ix.
Smoj val icha chiꞌ,
yujto yicxo Dios yaj ebꞌ ix.
11 Yovalil numan tzꞌaj ebꞌ ix yabꞌan scꞌaybꞌubꞌal dꞌa emnaquilal.
12 A in svalaꞌ,
max yal-laj a ebꞌ ix scꞌaybꞌan ebꞌ vin̈ vinac.
Max yal-laj a ebꞌ ix tzꞌacꞌan mandar ebꞌ vin̈.
Yovalil numan tzꞌaj ebꞌ ix yabꞌani.
13 Yujto a vin̈aj Adán,
bꞌabꞌel bꞌobꞌil vin̈ yuj Dios.
Axo ix Eva,
tzacꞌanto bꞌonac ix.
14 Man̈oc vin̈aj Adán chiꞌ acꞌjinac musansatil yuj vin̈ diablo,
palta a ix Eva chiꞌ.
Yuj chiꞌ,
a ix ochnac smul dꞌa Dios.
15 Palta ol colchajel ebꞌ ix,
tato sqꞌuibꞌtzitej yuneꞌ ebꞌ ix,
tato tecꞌtecꞌ yaj yuneꞌ ebꞌ ix chiꞌ yacꞌanoch Dios dꞌa scꞌool.
Tato xajanej ebꞌ anima ebꞌ ix,
tato vachꞌ sbꞌeybꞌal ebꞌ ix dꞌa yichan̈ Dios,
syilan sbꞌa ebꞌ ix.
Tato icha chiꞌ,
ol colchajel ebꞌ ix.*