Sbꞌeybꞌal ebꞌ scuchbꞌan ebꞌ creyente
3
A junxo lolonel svalbꞌat tic dꞌayach,
te yel.
Tato ay ebꞌ snibꞌej tzꞌoch stan̈vumaloc ebꞌ yetcreyenteal,
vachꞌ jun munlajel snibꞌej ebꞌ chiꞌ.
2 Ol valaꞌ tas yovalil sbꞌeybꞌalej ebꞌ tzꞌoch yopisio chiꞌ:
Yovalil max say tas malaj svachꞌil ebꞌ,
yic max yal yacꞌjioch tas dꞌa yibꞌan̈ ebꞌ.
Yovalil junjunn̈ej ix yetbꞌeyum junjun ebꞌ.
Yovalil tecꞌan syutej spensar ebꞌ,
syilan val sbꞌa ebꞌ.
Vachꞌocabꞌ syutej sbꞌeybꞌal ebꞌ dꞌa yichan̈ ebꞌ yetanimail,
vachꞌocabꞌ syutej sbꞌa ebꞌ dꞌa ebꞌ slaj ecꞌ dꞌay.
Yovalil vachꞌ syutej ebꞌ scꞌaybꞌan ebꞌ yetcreyenteal.
3 Mocabꞌ ucꞌumoc an̈ ebꞌ.
Mocabꞌ macꞌvaj pax ebꞌ.
Yovalil nivan syutej scꞌool ebꞌ.
Max yal yacꞌan oval ebꞌ yedꞌ junocxo mach.
Mocabꞌ pecꞌtuminoc ebꞌ.
4 Vachꞌocabꞌ syutej ebꞌ yilan yol spat,
yic vachꞌ cꞌanabꞌajum tzꞌaj ebꞌ yuninal ebꞌ,
yic ay yelcꞌoch ebꞌ dꞌa sat ebꞌ yuninal chiꞌ.
5 Yujto a mach man̈ ojtannacoc yilan yol spat,
¿tas ol yutoc yilan yiglesia Dios?
6 A ebꞌ unin creyente to,
max yal-laj yacꞌjioch yopisio ebꞌ,
yujto ay smay ton̈ej syicꞌchaan̈ sbꞌa ebꞌ.
Yujto ta icha chiꞌ,
ay smay yacꞌji syaelal ebꞌ icha utajnac vin̈ diablo.
7 A ebꞌ ay yopisio,
yovalil vachꞌ syutej sbꞌeybꞌal ebꞌ dꞌa yichan̈ ebꞌ man̈ creyenteoc,
yic vachꞌ man̈ ol bꞌuchjoc ebꞌ,
yic vachꞌ man̈ ol acꞌjoc ganar ebꞌ yuj vin̈ diablo chiꞌ.
A chajtil syutej sbꞌa ebꞌ diácono
8 Svalpaxbꞌat dꞌayach tas yovalil ol sbꞌeybꞌalej ebꞌ diácono:
Yovalil te vachꞌ syutej sbꞌeybꞌal ebꞌ dꞌa yichan̈ ebꞌ anima.
Man̈ chabꞌsatoc syutej sbꞌa ebꞌ.
Mocabꞌ ucꞌumoc an̈ ebꞌ,
mocabꞌ pecꞌtuminoc pax ebꞌ.
9 Yovalil stecꞌbꞌej val sbꞌa ebꞌ dꞌa jun cꞌaybꞌubꞌal acꞌbꞌilcan dꞌayon̈ yuj Dios,
aton jun bꞌaj scacꞌoch co cꞌool.
An̈ejtonaꞌ yovalil syil val sbꞌa ebꞌ yedꞌ spensar.
10 Ayic manto och yopisio ebꞌ diácono chiꞌ,
yovalil sbꞌabꞌlaj bꞌeytzitajcan ebꞌ.
Tato malaj spaltail ebꞌ tzꞌilchaji,
syal yacꞌjioch yopisio ebꞌ chiꞌ.
11 Icha pax chiꞌ ebꞌ ix ix tzꞌoch yopisio,
yovalil te vachꞌ syutej sbꞌeybꞌal ebꞌ ix dꞌa yichan̈ ebꞌ anima.
Max yal-laj tzꞌalvi pecal ebꞌ ix.
Yovalil tecꞌan syutej spensar ebꞌ ix.
An̈ejtonaꞌ cꞌanabꞌajumocabꞌ ebꞌ ix scꞌulan masanil tasi.
12 Axo ebꞌ diácono,
yovalil junjunn̈ejocabꞌ ix yetbꞌeyum junjun ebꞌ.
Vachꞌocabꞌ syutej ebꞌ yilan ebꞌ yuninal yedꞌ yol spat.
13 A ebꞌ diácono chiꞌ,
tato te vachꞌ syutej sbꞌa ebꞌ dꞌa yopisio chiꞌ,
te ay yelcꞌoch ebꞌ dꞌa yichan̈ ebꞌ creyente.
Tato icha chiꞌ,
max xiv ebꞌ yalaneli to ayoch Cristo Jesús dꞌa scꞌool ebꞌ.
Yalnac Dios yuj co cꞌaybꞌubꞌal
14 Tzin naꞌa tecan ol in bꞌat bꞌaj ayach chiꞌ dꞌa yic jayeꞌ cꞌual tic.
15 Tato man̈ ol yal in bꞌat dꞌa elan̈chamel jun,
palta tzin tzꞌibꞌejbꞌat jun in carta tic dꞌayach,
yic vachꞌ tzojtaquejeli tas val sco bꞌeybꞌalej a on̈ yuninal on̈xo Dios tic.
Yujto a on̈ tic yiglesia on̈xo Dios,
aton jun Dios pitzan.
Ay copisio calanel jun cꞌaybꞌubꞌal te yel.
Cuuj tzꞌoch val yip jun cꞌaybꞌubꞌal yel tic dꞌa yichan̈ ebꞌ anima.
16 A Dios acꞌjinac cojtaquejeli chajtil yaj quic bꞌaj ay on̈ ochi.
Val yel,
te nivan yelcꞌoch juntzan̈ schꞌoxnac dꞌayon̈.
Aton juntzan̈ tzꞌalan icha tic:
A Dios yacꞌnacoch sbꞌa animail.
Axo Yespíritu chꞌoxjinaqueli to yel yalnac.
Ochnac pax qꞌuelan ebꞌ ángel dꞌay.
Ix alchajpaxel yabꞌixal dꞌa juntzan̈xo nación.
Ay ebꞌ ay dꞌa yolyibꞌan̈qꞌuinal van yacꞌanoch dꞌa scꞌool.
An̈ejtonaꞌ icꞌjinacpaxqꞌue dꞌa satchaan̈,
xchi co cꞌaybꞌubꞌal tic.