Ay ebꞌ creyente ol meltzaj dꞌa spatic
4
A Yespíritu Dios tzꞌalan sjichanil to ayic vanxo sjavi jun slajvubꞌ tiempoal,
ay ebꞌ ol meltzaj dꞌa spatic.
Axo dꞌa juntzan̈ cꞌaybꞌubꞌal es ol yacꞌoch spensar ebꞌ.
Palta a juntzan̈ cꞌaybꞌubꞌal chiꞌ,
a dꞌa ebꞌ enemigo scoti.
2 A dꞌa juntzan̈ ebꞌ anima tzꞌacꞌan es ol yacꞌoch schiquin ebꞌ.
A ebꞌ anima chiꞌ,
chabꞌ sat ebꞌ.
Toton juneln̈ej te juvinaquel spensar ebꞌ.
3 Ol yalan ebꞌ icha tic:
Ay yovalil tato scacꞌoch quetbꞌeyum.
Ay pax juntzan̈ tas te ay yovalil cabꞌlani,
xcham ebꞌ.
Palta a Dios ix bꞌoancan masanil juntzan̈ chiꞌ,
yic scabꞌlej a on̈ creyente on̈ tic.
Yuj chiꞌ,
ayic scabꞌlani,
scacꞌ yuj diosal dꞌa Dios yuuj,
yujto cojtacxo jun cꞌaybꞌubꞌal te yel.
4 Masanil tas bꞌobꞌil yuj Dios,
te vachꞌ,
yuj chiꞌ max yal-laj calani to chuclaj dꞌa yichan̈.
Syaln̈ej cabꞌlan smasanil,
an̈ej to scacꞌ yuj diosal dꞌa Dios chiꞌ yuuj.
5 Tato tzon̈ lesalvi,
scacꞌan yuj diosal yuj tas sco vaꞌa,
malaj yovalil tas sco va chiꞌ,
yujto icha chiꞌ syal slolonel Dios.
A sbꞌeybꞌal ebꞌ tzꞌacꞌan servil Cristo
6 Tato tza cꞌaybꞌej ebꞌ creyente dꞌa juntzan̈ cꞌaybꞌubꞌal tic taꞌ,
vachꞌ tzutej acꞌan servil Jesucristo syal chiꞌ.
Ol vachꞌ och a tecꞌanil ayic ol a cꞌaybꞌan a bꞌa alan juntzan̈ lolonel scacꞌoch dꞌa co cꞌool yedꞌ dꞌa juntzan̈xo cꞌaybꞌubꞌal te vachꞌ bꞌaj ayoch co pensar.
7 Palta man̈ acꞌoch a pensar dꞌa juntzan̈ abꞌix malaj bꞌaj scꞌanabꞌajaxi.
An̈ej dꞌa Dios tzacꞌoch a pensar dꞌa masanil tiempo.
8 Tato sco cꞌaybꞌej co bꞌa co pacubꞌtan̈an co nivanil yic ay quip,
vachꞌ toni.
Palta a val jun ecꞌal vachꞌ to scacꞌoch co pensar dꞌa Dios yic ol co cha svachꞌil dꞌa yolyibꞌan̈qꞌuinal tic yedꞌ dꞌa satchaan̈.
9 A jun cꞌaybꞌubꞌal tic te yel.
Smoj co chaanec cabꞌ dꞌa smasanil co cꞌool.
10 Yuj jun tic,
scacꞌ val quip co munlaj dꞌa yic Dios,
scabꞌanpax syail yuuj.
Yujto aton jun Dios pitzan scacꞌoch yipoc co cꞌool.
A Dios,
Scolumal ebꞌ anima smasanil.
Aton val ebꞌ tzꞌacꞌanoch scꞌool dꞌay ol colchaj yuuj.
11 A juntzan̈ svalbꞌat tic dꞌayach,
scham val alan dꞌa ebꞌ creyente taꞌ,
tza cꞌaybꞌej ebꞌ dꞌay.
12 Vachꞌ tzutej a bꞌa,
yic malaj mach ol alanoc to quelem unin ach.
Más vachꞌ tza chꞌox vachꞌ bꞌeybꞌal dꞌa ebꞌ creyente smasanil.
Vachꞌ tzutej a lolon yabꞌ ebꞌ.
Vachꞌ tzutej a bꞌa yil ebꞌ.
Vachꞌ pax tzutej a xajanan ebꞌ taꞌ.
An̈ej dꞌa Cajal Jesús tzacꞌoch a cꞌool.
Tojoln̈ej tzutej a pensar yil ebꞌ.
Icha chiꞌ tzutej a chꞌoxan jun vachꞌ bꞌeybꞌal dꞌa ebꞌ taꞌ.
13 Yacbꞌan manto in cꞌoch taꞌ,
tzacꞌ val ip avtan slolonel Dios dꞌa scal ebꞌ.
Man̈ actejcan ecan snaꞌ ebꞌ,
tza cꞌaybꞌejn̈ej ebꞌ.
14 Ayic yacꞌannacqꞌue scꞌabꞌ ebꞌ anciano dꞌa a jolom,
ataꞌ yacꞌnac opisio Dios,
yic snachajel uuj tas tzutej acꞌan servil.
A acꞌjinac nachajel yuj ebꞌ to icha chiꞌ ol ach yutoc.
Yuj chiꞌ,
man̈ actejcan jun opisio chiꞌ.
15 Tzacꞌ val och a pensar dꞌa juntzan̈ svalbꞌat tic dꞌayach,
yic ol yil ebꞌ smasanil taꞌ to ipan yoch a tecꞌanil dꞌa junjun cꞌu.
16 Tzil val a bꞌa yuj tas tza bꞌeybꞌalej taꞌ.
An̈ejtonaꞌ,
cham tza na yuj juntzan̈ cꞌaybꞌubꞌal tzacꞌ scꞌaybꞌej ebꞌ taꞌ.
Tecꞌan tzutej a bꞌa dꞌa masanil tiempo,
yic ol ach colchajeloc,
yic ol colchajpaxel ebꞌ tzꞌabꞌan tas tzal chiꞌ.