A sbꞌeybꞌal ebꞌ creyente smasanil
5
Ayic tza chꞌolbꞌitan tas yaj ebꞌ ichamtac vinac,
man̈ a tumej ebꞌ,
ec sna ebꞌ dꞌa emnaquilal,
icha tzutej alan junoc tas dꞌa a mam.
Yedꞌ pax dꞌa ebꞌ quelemtac,
vachꞌn̈ej tzutej alan dꞌa ebꞌ,
icha tzutej alan dꞌa junoc ucꞌtac.
2 Icha pax chiꞌ tzutej alan dꞌa ebꞌ ix chichimtac ix,
icha tzutej alan dꞌa ix a nun.
An̈ejtonaꞌ dꞌa ebꞌ ix cobꞌestac,
vachꞌ tzutej alan dꞌa ebꞌ ix,
yujto icha anabꞌ yaj ebꞌ ix.
Man̈oc dꞌa chabꞌsatil tzal dꞌa ebꞌ ix.
3 Svalanpaxbꞌat juntzan̈ checnabꞌil tic yuj ebꞌ ix chamnac yetbꞌeyum.
A ebꞌ ix chiꞌ,
tato dꞌa val yel schꞌocoj ebꞌ ix,
yovalil tzon̈ colvaj dꞌa ebꞌ ix.
4 Palta tato ay yuneꞌ ebꞌ ix jun,
ma ay yixchiquin ebꞌ ix,
yovalil tza cꞌaybꞌej ebꞌ uninabꞌil chiꞌ to yibꞌan̈ ebꞌ yaj sbꞌabꞌlaj colvaj dꞌa smam snun,
spactzitan ebꞌ yuj tas ix acꞌji dꞌay.
Tato icha chiꞌ syutej sbꞌa ebꞌ,
a dꞌa yichan̈ Dios,
te vachꞌ,
ste tzalaj val yedꞌ ebꞌ.
5 Ay ebꞌ ix chamnac yetbꞌeyum dꞌa val yel aycan schꞌocoj.
A ebꞌ ix chiꞌ,
an̈ej Dios syacꞌoch ebꞌ ix yipoc scꞌool.
Cꞌual dꞌacꞌval slesalvi ebꞌ ix yuj scꞌanan ebꞌ ix jantacn̈ej tas ay tzꞌoch yuuj.
6 Palta ay pax ebꞌ ix chamnac yetbꞌeyum chiꞌ an̈ej val tas sgana scꞌulej.
Yuj chiꞌ vachꞌchom pitzan ebꞌ ix dꞌa yichan̈ ebꞌ anima,
palta a dꞌa yichan̈ Dios chamnacxo ebꞌ ix.
7 Scham val alan juntzan̈ checnabꞌil tic dꞌa ebꞌ ix taꞌ,
yic malaj mach ol alanqꞌue tas dꞌa spatic ebꞌ ix.
8 Tato ay ebꞌ creyente max colvaj dꞌa smam snun,
ma dꞌa ebꞌ ay dꞌa yol spat ebꞌ,
a ebꞌ chiꞌ,
malaj yelcꞌoch scꞌaybꞌubꞌal Cristo dꞌa ebꞌ.
Ecꞌalxo schucal ebꞌ dꞌa yichan̈ ebꞌ man̈ creyenteoc.
9 A ebꞌ ix chamnac yetbꞌeyum sval tic,
syal yoch ebꞌ ix scuentaoc iglesia.
An̈ej ebꞌ ix 60 abꞌilxo sqꞌuinal,
ebꞌ ix junn̈ej vin̈ yetbꞌeyum yicꞌnac.
10 An̈ej ebꞌ ix chequel yaj dꞌa yichan̈ ebꞌ yetcreyenteal to vachꞌ sbꞌeybꞌal ebꞌ ix,
ebꞌ ix vachꞌ yutejnac sqꞌuibꞌtzitan yuneꞌ,
ebꞌ ix vachꞌ yutejnac sbꞌa dꞌa ebꞌ slaj ecꞌ dꞌay,
ebꞌ ix acꞌjinac servil ebꞌ yetcreyenteal dꞌa emnaquilal,
ebꞌ ix ocꞌnac scꞌool dꞌa ebꞌ ayoch dꞌa syaelal,
ebꞌ ix vachꞌn̈ej yutejnac sbꞌa dꞌa masanil tiempo.
An̈ej ebꞌ ix chiꞌ syal yoch scuentaoc iglesia chiꞌ.
11 Axo ebꞌ ix unintac ix to scham yetbꞌeyum jun,
man̈ a chaoch ebꞌ ix scuentaoc iglesia.
Yujto ay bꞌaj an̈ej sgana ebꞌ ix scꞌulej,
yuj chiꞌ syactejcan Cristo ebꞌ ix,
axo yetbꞌeyum ebꞌ ix syacꞌxiochi.
12 Elta ul dꞌa yibꞌan̈ ebꞌ ix,
yujto maxtzac scꞌanabꞌajej stiꞌ ebꞌ ix syacꞌcani.
13 An̈ejtonaꞌ an̈ej lolonel tzecꞌ yal ebꞌ ix dꞌa caltac pat,
yuj chiꞌ te jaragana tzꞌaj ebꞌ ix.
Man̈ ton̈ejoc jaragana ebꞌ ix,
palta syal pax pecal ebꞌ ix.
Ton̈ej scomon aqꞌuejoch sbꞌa ebꞌ ix dꞌa juntzan̈ bꞌaj malaj yalan yicoꞌ.
Syalanpax juntzan̈ malaj svachꞌil ebꞌ ix.
14 Yuj chiꞌ,
tzin nibꞌej to a ebꞌ ix unintac ix to scham yetbꞌeyum,
más vachꞌ syacꞌxioch yetbꞌeyum ebꞌ ix.
Aljocabꞌ yuneꞌ ebꞌ ix.
Munlajocabꞌ ebꞌ ix dꞌa yol spat,
yic a ebꞌ ayoch ajcꞌolal dꞌayon̈,
maxtzac yal sbꞌuchvaj ebꞌ dꞌayon̈ yuj ebꞌ ix.
15 Svalanbꞌat juntzan̈ tic dꞌayach,
yujto ay ebꞌ ix chamnac yetbꞌeyum toxo ix meltzajpax dꞌa spatic.
Axo ticnaic,
a vin̈ Satanás syacꞌ servil ebꞌ ix.
16 A ebꞌ creyente taꞌ,
tato ay junoc ix chamnac yetbꞌeyum dꞌa yol spat ebꞌ,
yovalil scolvaj ebꞌ dꞌa ix.
Yujto man̈ smojoc tato a iglesia tzꞌacꞌan sgasto ix.
A ebꞌ ix dꞌa val yel schꞌocoj,
an̈ej ebꞌ ix bꞌaj syal scolvaj iglesia,
yujto max tzacꞌvan iglesia yacꞌan sgasto ebꞌ ix smasanil.
17 A ebꞌ anciano vachꞌ syutej yilan ebꞌ yetcreyenteal,
vachꞌ pax syutej ebꞌ yacꞌan cꞌaybꞌajoc yedꞌ yalanel slolonel Dios,
yovalil te ay yelcꞌoch ebꞌ dꞌa yichan̈ ebꞌ creyente smasanil.
18 Yujto a Slolonel Dios Tzꞌibꞌabꞌilcani,
a tzꞌalan icha tic:
Man̈ eyacꞌoch spail stiꞌ nocꞌ nocꞌ stecꞌvi trigo,
xchi.
Syalanpax junxo icha tic:
A ebꞌ smunlaji,
ay yalan yic ebꞌ schaan stojol,
xchi.
19 Tato ay mach tzꞌacꞌanoch tas dꞌa yibꞌan̈ junoc anciano,
yovalil ay chavan̈oc,
ma oxvan̈oc testigo.
Tato malaj jun,
man̈ a cha abꞌ dꞌay.
20 Tato ay junoc anciano max actancan scꞌulan chucal,
tza cachoch vaan dꞌa yichan̈ ebꞌ creyente smasanil,
yic ol xiv ebꞌ creyente chiꞌ yoch smul dꞌa Dios.
21 Scham val valanbꞌat dꞌayach dꞌa yichan̈ Dios,
dꞌa yichan̈ Cajal Jesucristo yedꞌ dꞌa yichan̈ ebꞌ ángel sicꞌbꞌilcanel yuuj to tza cꞌanabꞌajej val juntzan̈ checnabꞌil tic dꞌa stojolal,
mocabꞌa sqꞌuexan̈il tzutej a bꞌoan yaj ebꞌ.
22 Man̈ a comon aqꞌuejoch yopisio junoc mach dꞌa elan̈chamel,
yacbꞌan manto a bꞌeytzitej,
yujto talaj tzꞌoch smul,
locan ach yedꞌoc dꞌa smul chiꞌ dꞌa yichan̈ Dios.
Tziqꞌuel a bꞌa dꞌa junoc tas malaj svachꞌil.
23 Svalanbꞌat dꞌayach yuj a cꞌool,
yujto an̈ejaꞌ yacꞌan syail.
Man̈ocn̈ej a aꞌ tzuqꞌuej.
Syal ucꞌan jabꞌoc vino,
yic ol bꞌoxoc a cꞌool chiꞌ.