6
An̈ejtonaꞌ svalanbꞌat dꞌayach yuj ebꞌ creyente ay spatrón.
Ayocabꞌ yelcꞌoch spatrón ebꞌ chiꞌ dꞌay,
yic man̈ ol bꞌuchjoc Dios yuj sbꞌeybꞌal ebꞌ.
Yedꞌ juntzan̈ cꞌaybꞌubꞌal bꞌaj scacꞌoch co pensar,
man̈ ol bꞌuchjoc pax yuj ebꞌ.
2 Tato ay ebꞌ yetcreyenteal sbꞌa yedꞌ spatrón,
vachꞌchom creyente spatrón ebꞌ chiꞌ,
ayocabꞌ yelcꞌoch dꞌa ebꞌ.
Ecꞌalxo val vachꞌ syutej ebꞌ smunlaj dꞌay,
yujto creyente jun van schaan svachꞌil smunlajel ebꞌ chiꞌ,
xajanabꞌil vin̈ yuj Dios yedꞌ ebꞌ.
Scham val alan juntzan̈ cꞌaybꞌubꞌal tic dꞌa ebꞌ taꞌ,
tza cꞌaybꞌan ebꞌ dꞌay.
Max yal scacꞌoch co pensar dꞌa bꞌeyumal
3 A juntzan̈ scꞌaybꞌubꞌal Cajal Jesucristo,
te yel,
palta ay ebꞌ max yacꞌoch spensar dꞌay.
Chꞌoc cꞌaybꞌubꞌal syal ebꞌ.
Malaj sgana ebꞌ dꞌa juntzan̈ cꞌaybꞌubꞌal tzꞌalani tas scutej cacꞌanoch co pensar dꞌa Dios.
4 A ebꞌ icha chiꞌ syutej sbꞌa,
malaj jabꞌoc tas yojtac ebꞌ,
ton̈ej syicꞌchaan̈ sbꞌa ebꞌ.
Sgana ebꞌ syacꞌ oval yedꞌ junocxo mach.
Sgana ebꞌ stelaj sbꞌa yuj juntzan̈ lolonel.
An̈ej val juntzan̈ tic scꞌulej ebꞌ dꞌa masanil tiempo.
Palta yuj juntzan̈ scꞌulej ebꞌ chiꞌ,
spitzvi chichoncꞌolal dꞌa scal ebꞌ,
oval,
bꞌuchval,
chuc pensaril yedꞌ ajcꞌolal.
5 Icha chiꞌ syutej ebꞌ sjuanel spensar ebꞌ max yacꞌoch spensar dꞌa jun cꞌaybꞌubꞌal yel.
A snaan ebꞌ to ol yacꞌ ganar stumin ebꞌ dꞌa spatic co cꞌaybꞌubꞌal tic.
6 Yel toni,
te nivan svachꞌil sco cha dꞌa spatic co cꞌaybꞌubꞌal,
tato sco naꞌa to cꞌocbꞌil syabꞌ juntzan̈ tastac ay dꞌayon̈ junjun on̈.
7 Ayic caljinac,
malaj jabꞌoc tas quedꞌnac.
An̈ejtonaꞌ malaj jabꞌoc tas ol quicꞌbꞌat quedꞌoc ayic ol on̈ chamoc.
8 An̈ej tato cꞌocbꞌil schax tas sco va dꞌa junjun cꞌu,
tato ay pax co pichul,
con̈ tzalajec.
9 Palta ay ebꞌ creyente an̈ej bꞌeyumal sgana.
Yuj chiꞌ,
cꞌun sjuviel ebꞌ yuj chucal.
Ichato scan ebꞌ dꞌa junoc yaal,
yujto tzijtum juntzan̈ tas malaj yopisio snibꞌejoch ebꞌ.
Te ay smay sjuviel ebꞌ yuuj.
Yuj juntzan̈ bꞌaj syiloch scꞌool ebꞌ,
svachꞌ juviel spensar ebꞌ dꞌa juneln̈ej.
Yuj chiꞌ,
ichn̈ej taꞌ ol satixcanem ebꞌ.
10 A dꞌa pecꞌ tuminal,
a taꞌ scot yaln̈ej tas chucalil.
Ay ebꞌ snibꞌan qꞌuen tumin,
yuj chiꞌ ix laj yactejcan jun cꞌaybꞌubꞌal ebꞌ yacꞌnac och dꞌa scꞌool.
Man̈xo jantacoc cuscꞌolal ix yicꞌcot ebꞌ dꞌa yibꞌan̈.
Scacꞌoch co cꞌool dꞌa Jesucristo
11 A achxo tic ach Timoteo,
yicxo Dios aji.
Man̈ a cꞌulej juntzan̈ malaj svachꞌil ix val tic.
Te tojol tzutej a bꞌeybꞌal.
An̈ej Dios bꞌaj tzacꞌoch a cꞌool yedꞌ a pensar.
Tza xajanej ebꞌ anima.
Tecꞌan tzutej a bꞌa abꞌan syail.
Emnaquil tzutej a bꞌa.
12 Icha junoc mach syacꞌ yip,
tecꞌtecꞌ syutej sbꞌa,
icha chiꞌ tzutej acꞌan ip och tzacꞌan yuj Cajal Jesús,
yic tza cha a qꞌuinal dꞌa juneln̈ej,
yujto yuj a chaan a qꞌuinal chiꞌ ix ach yavtejoch Dios yicoc ayic te vachꞌ ix utej alan dꞌa yichan̈ juntzan̈ ebꞌ ix abꞌan alani to a Jesucristo Cajal toni.
13 Scham val valanbꞌat dꞌayach dꞌa yichan̈ Dios,
aton jun tzꞌacꞌan sqꞌuinal masanil tastac yedꞌ dꞌa yichan̈ Jesucristo,
aton jun te vachꞌ yutejnac yacꞌan testigoal sbꞌa dꞌa yichan̈ vin̈aj Poncio Pilato,
14 tza cꞌanabꞌajej val juntzan̈ checnabꞌil tic sicꞌlabꞌil.
Vachꞌn̈ej tzutej a bꞌeybꞌal masanto ol javoc Cajal Jesucristo.
15 Ayic ol javoc jun tiempoal icha sgana Dios,
ato taꞌ ol elcꞌoch jun tic yuuj.
Yujto an̈ej ay spoder.
Te tzalajcꞌolal yaji.
A sReyal ebꞌ rey.
Yajal pax yaj dꞌa ebꞌ yajal.
16 An̈ej malaj bꞌaqꞌuin̈ schami.
Saquilqꞌuinaln̈ej bꞌaj ay.
Malaj junoc mach syal scꞌoch dꞌa stzꞌey.
Malaj junoc mach ilannac,
yujto man̈ chequeloc.
Te nivanocabꞌ yelcꞌoch dꞌa co sat.
Ayocabꞌ spoder dꞌa masanil tiempo.
Amén.
17 Axo ebꞌ creyente bꞌeyum dꞌa yolyibꞌan̈qꞌuinal tic,
tzal juntzan̈ checnabꞌil tic dꞌa ebꞌ.
Scham val alan dꞌa ebꞌ to max yal yicꞌanchaan̈ sbꞌa ebꞌ.
Max yal yacꞌanoch sbꞌeyumal ebꞌ chiꞌ yipoc scꞌool,
yujto elan̈chamel slajvieli.
Tzalanpax dꞌa ebꞌ to an̈ej Dios pitzan syacꞌoch ebꞌ yipoc scꞌool.
Yujto a Dios chiꞌ tzꞌacꞌan masanil tas dꞌayon̈ yic tzon̈ tzalaj yedꞌ juntzan̈ chiꞌ.
18 Yovalil vachꞌ syutej sbꞌeybꞌal ebꞌ,
man̈ jantacoc tas vachꞌ syal scꞌulan ebꞌ.
Yovalil scolvaj ebꞌ dꞌa ebꞌ mebꞌaꞌ,
sian pax ebꞌ tastac ay dꞌay.
19 Tato sbꞌeybꞌalej ebꞌ icha sval tic,
ol smolbꞌej sbꞌeyumal ebꞌ ol scha bꞌaqꞌuin̈,
ol schaan jun sqꞌuinal ebꞌ dꞌa val yel.
Slajvubꞌ schecnabꞌil vin̈aj Pablo
20 Ach Timoteo,
tan̈vej val tas ix acꞌchajoch abꞌenal dꞌa yol a cꞌabꞌ.
Ay ebꞌ comon tzꞌalan tastac,
palta nabꞌan̈ej.
Malaj yelcꞌoch tas syal ebꞌ syaloch sbꞌa jelanil chiꞌ.
Bꞌesel a bꞌa dꞌa scal ebꞌ.
21 Yujto ay ebꞌ syacꞌoch spensar dꞌa juntzan̈ es syal ebꞌ chiꞌ.
Yuj chiꞌ syactejcan juntzan̈ cꞌaybꞌubꞌal ebꞌ yacꞌnac och dꞌa scꞌool.
Aocabꞌ Dios tzꞌacꞌan svachꞌcꞌolal dꞌayex taꞌ.