A Schabꞌil Carta San Pablo
DꞌA VIN̈AJ TIMOTEO
Tzꞌel yich scarta vin̈aj Pablo
1
A in Pablo in,
schecabꞌ in Jesucristo,
yujto icha chiꞌ ix el dꞌa scꞌool Dios.
A Dios yacꞌnaccan stiꞌ to ol yacꞌ co qꞌuinal dꞌa juneln̈ej,
yujto junxon̈ej caj yedꞌ Cristo Jesús.
2 Ach Timoteo,
tzin tzꞌibꞌejbꞌat jun carta tic dꞌayach.
Te xajanabꞌil ach vuuj,
icha vuninal aji.
Yacꞌocabꞌ svachꞌcꞌolal co Mam Dios yedꞌ Cajal Jesucristo dꞌayach.
Ocꞌocabꞌ scꞌool dꞌayach,
syacꞌanpax sjuncꞌolal dꞌayach.
Max yal co qꞌuixvi calanel slolonel Cristo
3 Cꞌual dꞌacꞌval in lesalvi uuj.
Ayic tzin lesalvi dꞌa juntac el,
svacꞌpax yuj diosal dꞌa Dios uuj.
Te tojol svutej in pensar vacꞌan servil Dios chiꞌ icha yutejnac ebꞌ in mam vicham.
4 Tzin naancoti to ocꞌnac ach ayic a cannac vuuj.
In gana tzach vil junelxo,
yic ol vachꞌ javoc in tzalajcꞌolal.
5 Vojtac to tzacꞌval och Cajal Jesús dꞌa a cꞌool,
icha yutejnac sbꞌa ix a nun chichim ix Loida yedꞌ ix a nun ix Eunice.
Vojtac to icha yutejnac sbꞌa ebꞌ ix chiꞌ,
icha pax chiꞌ tzutej a bꞌa.
6 Ayic vacꞌannacqꞌue in cꞌabꞌ dꞌa a jolom,
ataꞌ yacꞌnac opisio Dios,
yic snachajel uuj tas tzutej acꞌan servil.
A ticnaic,
svalbꞌat dꞌayach to tzacꞌ val ip a munlaj dꞌa opisio chiꞌ.
7 Man̈oc xivcꞌolal ix yacꞌ Dios dꞌayon̈,
palta a spoder ix yacꞌaꞌ,
yic tecꞌan scutej co bꞌa.
Ix yacꞌan co xajanej co bꞌa.
Ix yacꞌanpax tas scutej quilan co bꞌa.
8 Yuj chiꞌ,
man̈ ach qꞌuixvoc alanel yabꞌixal Cajal Jesús.
An̈ejtonaꞌ man̈ ach qꞌuixvoc pax vuuj,
yujto a ticnaic preso vaj yuj Cajal Jesús chiꞌ.
Man̈ ach xiv abꞌan pax syail yuj jun vachꞌ abꞌix yic colnabꞌil,
yujto a Dios van yacꞌan spoder dꞌayach vedꞌoc.
9 A Dios yacꞌnac co colnabꞌil.
Aꞌ avtannac on̈,
yic tzon̈ och yicoc.
Man̈ yujoc juntzan̈ tas vachꞌ sco cꞌulej ix on̈ colchaji,
palta ix el dꞌa scꞌool Dios to icha chiꞌ tzon̈ aji,
yujto junxon̈ej caj yedꞌ Cristo.
Atax yic manto sbꞌo jun yolyibꞌan̈qꞌuinal tic,
toxonton ay svachꞌcꞌolal dꞌayon̈.
10 Axo yic ix ulecꞌ co Columal Jesucristo,
ix checlajel svachꞌcꞌolal Dios dꞌayon̈.
A Jesucristo chiꞌ ix acꞌan lajvoc spoder chamel.
Yuj jun vachꞌ abꞌix yic colnabꞌil,
ix checlajeli to a Cajal Jesús chiꞌ tzꞌacꞌan co qꞌuinal dꞌa juneln̈ej.
11 A Dios acꞌannac vopisio yic svalel vachꞌ abꞌix yic colnabꞌil.
Aꞌ acꞌannac in och schecabꞌoc Jesucristo,
yic vachꞌ tzin ecꞌ in cꞌaybꞌej ebꞌ man̈ israeloc.
12 Yuj chiꞌ svabꞌ syail yuj juntzan̈ sjavi dꞌa vibꞌan̈ tic.
Palta max in qꞌuixvilaj,
yujto vojtac mach ayoch yipoc in cꞌool,
aton Dios.
Vojtac to ay spoder stan̈van tas ix vacꞌoch abꞌenal dꞌa yol scꞌabꞌ,*
masanto ol javoc scꞌual sjavi Jesucristo.
13 A juntzan̈ cꞌaybꞌubꞌal valnaccan dꞌayach,
te yel,
yuj chiꞌ tza cꞌanabꞌajej val.
A ticnaic,
junxon̈ej caj yedꞌ Cristo Jesús,
yuj chiꞌ tzacꞌ val och Cajal chiꞌ dꞌa a cꞌool.
Tza xajanej paxi.
14 A juntzan̈ cꞌaybꞌubꞌal ix acꞌjioch abꞌenal dꞌa yol a cꞌabꞌ yuj Dios,
tza tan̈vej yuj spoder Yespíritu,
aton jun ix acꞌjioch cajan dꞌayon̈ junjun on̈.
15 Ojtactaxoni to a masanil ebꞌ creyente ay dꞌa yol yic Asia,
ix in yactejcan ebꞌ in chꞌocoj.
An̈ejtonaꞌ vin̈aj Figelo yedꞌ vin̈aj Hermógenes,
ix in yactejpaxcan ebꞌ vin̈.
16 Palta tzin nibꞌej to tzꞌocꞌ scꞌool Cajal Jesús dꞌa ebꞌ ay dꞌa yol spat vin̈aj Onesíforo,
yujto tzijtum el ix yacꞌ snivanil in cꞌool vin̈.
Vachꞌchom preso vaji,
palta maj qꞌuixvoc vin̈ sjavi dꞌayin.
17 Ayic ix javi vin̈ dꞌa Roma tic,
ix ecꞌ vin̈ in say dꞌa smasanil scꞌool,
masanto ix in ilchaj yuj vin̈.
18 A dꞌa scꞌual sjaubꞌal Cajal Jesucristo,
comonoc ol ocꞌ scꞌool Cajalil dꞌa vin̈aj Onesíforo chiꞌ.
Ojtac jantac ix on̈ yacꞌ servil vin̈ dꞌa chon̈abꞌ Éfeso,
aton bꞌaj ayach ecꞌ chiꞌ.