Tecꞌan scutej co bꞌa
2
A ach tic,
icha val to vuninal ach.
Tecꞌan val tzutej a bꞌa yuj svachꞌcꞌolal Dios syacꞌ dꞌayon̈,
yujto junxon̈ej caj yedꞌ Cristo Jesús.
2 Ay juntzan̈ cꞌaybꞌubꞌal ix abꞌ valan dꞌa scal ebꞌ tzijtumal creyente,
tza cꞌaybꞌej ebꞌ creyente cꞌanabꞌajum dꞌay,
aton ebꞌ syal pax scꞌaybꞌan ebꞌ yetcreyenteal.
3 Icha junoc soldado te vachꞌ,
icha chiꞌ tzutej a bꞌa acꞌan techaj abꞌan syail,
yujto van acꞌan servil Jesucristo.
4 Qꞌuinaloc ay junoc soldado ayoch dꞌa yopisio ticnaic,
max yal-laj yacꞌanbꞌat sbꞌa dꞌa junocxo comon munlajel,
yujto an̈ej jun yajalil ix icꞌan och soldadoal chiꞌ bꞌaj snibꞌej vachꞌ scan dꞌa sat.
5 Qꞌuinaloc ay junoc ayoch dꞌa junoc tajnel ticnaic,
sgana syacꞌ ganar.
Palta tato max scꞌanabꞌajej juntzan̈ sleyal yic jun tajnel chiꞌ,
max yacꞌlaj ganar schaan spac.
6 A ebꞌ smunlaj dꞌa sat sluum,
ay yalan yic ebꞌ sbꞌabꞌlaj yaman sat smunlajel chiꞌ.
7 A juntzan̈ svalbꞌat tic dꞌayach,
tza na val sicꞌlabꞌil.
Axo Cajal Jesús ol acꞌan nachajel uuj smasanil.
8 Tza navalcot Jesucristo,
aton yin̈tilal vin̈aj rey David,
ix pitzvixi dꞌa scal ebꞌ chamnac.
Icha chiꞌ syal jun vachꞌ abꞌix yic colnabꞌil svalel tic.
9 A ticnaic van vabꞌan syail,
yujn̈ej to svalel jun vachꞌ abꞌix tic.
Ayoch qꞌuen cadena dꞌayin,
ichato te nivan in mul dꞌa yichan̈ ley.
Palta a slolonel Dios,
man̈ ayoc och qꞌuen cadena dꞌay icha vaj a in tic.
10 Ay juntzan̈xo ebꞌ sicꞌbꞌiltaxonel yuj Dios.
In gana ol scha svachꞌil Dios chiꞌ ebꞌ quedꞌoc,
yuj chiꞌ svacꞌ techaj masanil juntzan̈ yaelal sja dꞌa vibꞌan̈,
yic ol scha scolnabꞌil ebꞌ te nivan yelcꞌochi,
aton jun tzꞌacꞌji dꞌayon̈ dꞌa juneln̈ej,
yujto junxon̈ej caj yedꞌ Cristo Jesús.
11 A juntzan̈ lolonel svalbꞌat dꞌayach tic,
te yel:
Tato chamnac on̈ yedꞌ Cristo,
ol on̈ aj yedꞌ dꞌa juneln̈ej.
12 Tato scacꞌ techaj syaelal yedꞌoc,
ol on̈ och yajalil yedꞌoc.
Tato ay on̈ scalaꞌ to man̈ on̈ yicoc,
ol yal paxi to man̈ on̈ yicoclaj.
13 Tato ay on̈ max caqꞌuelcꞌoch icha tas scalaꞌ,
palta axo,
tzꞌeln̈ejcꞌoch tas syalaꞌ.
Yujto max yal sqꞌuexan spensar dꞌa tas syalaꞌ.
A tas sgana Dios scꞌulej ebꞌ tzꞌacꞌan servil
14 Eccot juntzan̈ svalbꞌat dꞌayach tic sna ebꞌ.
Scham val alan dꞌa ebꞌ dꞌa yichan̈ Dios Cajal to max yal-laj scomon telan sbꞌa ebꞌ yuj juntzan̈ lolonel malaj jabꞌoc yopisio.
Axo ebꞌ smaclan yabꞌ tas syal ebꞌ,
ste juviel ebꞌ yuuj.
15 Tzacꞌ val ip a munlaj dꞌa yic Dios,
yic ol yilaꞌ to vachꞌ a munlajel,
te tojol tzutej alanel slolonel te yel.
Tato icha chiꞌ tzutej a bꞌa,
man̈ ol ach qꞌuixvoclaj dꞌa yichan̈.
16 Man̈ a comon aqꞌuejoch a bꞌa yedꞌ ebꞌ scomon loloni,
aton ebꞌ malaj yelcꞌoch tas syalaꞌ.
Yuj juntzan̈ comon lolonel chiꞌ,
ton̈ej svachꞌ bꞌat ebꞌ dꞌa scal chucal.
17 Icha junoc yabꞌil yaxcꞌa,
ste xacchajbꞌati,
icha chiꞌ tzꞌaj spucaxbꞌat juntzan̈ comon lolonel syal ebꞌ chiꞌ.
Icha chiꞌ ix yutej sbꞌa vin̈aj Himeneo yedꞌ vin̈aj Fileto.
18 Yuj chiꞌ,
ix spatiquejcanel jun cꞌaybꞌubꞌal te yel ebꞌ vin̈.
Slaj yalan ebꞌ vin̈ to toxo ix pitzvixi ebꞌ chamnac.
Yuj tas syal ebꞌ vin̈ chiꞌ,
ay ebꞌ somchajel spensar,
maxtzac yacꞌoch Cajal Jesucristo ebꞌ dꞌa scꞌool.
19 Icha yipumal yich junoc pat man̈ jabꞌoc tzꞌibꞌxi,
icha chiꞌ yutejnac Dios yacꞌanem yipumal yich yiglesia.
A dꞌa yiglesia chiꞌ ayoch jun sello,
aton jun tzꞌalan icha tic:
A Cajal Jesús toxonton yojtac mach ebꞌ yictaxoni,
xchi.
Syalanpax icha tic:
A mach tzꞌalani to yic Cristo,
yovalil syactejcan masanil chucal,
xchi jun sello chiꞌ.
20 A dꞌa junoc pat nivaquil,
man̈ jantacoc yamcꞌabꞌ ay dꞌa yool.
Ay juntzan̈ qꞌuen yamcꞌabꞌ chiꞌ,
nabꞌa oro yedꞌ plata,
te chꞌoc yel yopisio.
Palta ay juntzan̈xo yamcꞌabꞌ chiꞌ,
nabꞌa teꞌ yedꞌ lum luum,
a juntzan̈ chiꞌ,
comonn̈ej yaji.
21 Icha juntzan̈ yamcꞌabꞌ chiꞌ,
icha chiꞌ caji.
Tato scactejcan masanil chucal,
a dꞌa yichan̈ Cajal Jesús,
te ay quelcꞌochi.
An̈ej ay on̈ yicoꞌ.
Te ay copisio yuuj,
yujto a tas sgana,
lista caj co cꞌulani.
22 Iqꞌuel a bꞌa dꞌa scal chucal scꞌulej ebꞌ etquelemal.
Te tojol tzutej a bꞌeybꞌal.
An̈ej Cajal Jesús tzacꞌoch dꞌa a cꞌool.
Tza xajanan ebꞌ anima.
Juncꞌolal tzutej a bꞌa.
Junxon̈ej pax tzutej a bꞌa yedꞌ ebꞌ malaj jabꞌoc spaltail dꞌa yichan̈ Cajal Jesús,
ayic syalan sbꞌa ebꞌ dꞌay.
23 Iqꞌuel a bꞌa dꞌa scal ebꞌ scomon telaj sbꞌa,
aton ebꞌ malaj jabꞌoc yelcꞌoch tas syalaꞌ.
Ina ojtac,
ton̈ej spitzvi oval yuj tas syal ebꞌ chiꞌ.
24 A mach tzꞌacꞌan servil Cajal Jesús,
max yal scomon acꞌanoch sbꞌa dꞌa scal oval.
Yovalil emnaquil syutej sbꞌa dꞌa masanil anima.
Yovalil vachꞌ syutej scꞌaybꞌan ebꞌ anima,
nivanocabꞌ pax syutej scꞌool.
25 An̈ejtonaꞌ,
emnaquil syutej ebꞌ yalan dꞌa ebꞌ schichonoch scꞌool dꞌay,
yic talaj icha chiꞌ ol acꞌjoc sna sbꞌa ebꞌ yuj Dios,
axo yojtacanel jun cꞌaybꞌubꞌal te yel ebꞌ.
26 Yujto a ebꞌ chiꞌ,
ichato yambꞌil ebꞌ yuj vin̈ diablo yic scꞌulej ebꞌ icha tas sgana vin̈.
Palta tato sna sbꞌa ebꞌ,
ol colchajcanel ebꞌ dꞌa yol scꞌabꞌ vin̈.