A tas ol bꞌeybꞌalaj dꞌa lajvubꞌ cꞌual
3
Yovalil tzojtaquejeli to ayic manto javi jun lajvubꞌ cꞌual,
ol javoc jun tiempoal te ay smay.
2 Yujto ay ebꞌ anima munil ol xajanej sbꞌa schꞌocoj.
An̈ej dꞌa qꞌuen tumin ol yacꞌoch spensar ebꞌ.
Ol yacꞌ acꞌumtaquil ebꞌ.
Ol yicꞌchaan̈ sbꞌa ebꞌ.
Ol comon bꞌuchvaj ebꞌ dꞌa Dios.
Man̈ ol scꞌanabꞌajej ebꞌ tas syal smam snun.
Chabꞌcꞌolal ol scha junoc tas ebꞌ.
Te chuc ol yutoc sbꞌeybꞌal ebꞌ.
3 Man̈ ol xajanej jabꞌoc sbꞌa ebꞌ,
man̈ junoc mach bꞌaj ol ocꞌ scꞌool ebꞌ.
Ol yal chuc ebꞌ dꞌa spatic ebꞌ quetanimail.
Man̈ ol syaꞌilej snivanil ebꞌ.
Icha junoc nocꞌ nocꞌ te ov,
icha chiꞌ ol yutoc sbꞌa ebꞌ.
Ol chichonoch scꞌool ebꞌ dꞌa jantacn̈ej tas vachꞌ.
4 Ayic ol javoc jun tiempoal chiꞌ,
ol yacꞌoch es ebꞌ dꞌa yibꞌan̈ ebꞌ svachꞌcꞌool.
Man̈ ol xiv jabꞌoc ebꞌ scꞌulan chucal.
Ol laj yaloch sbꞌa ebꞌ jelanil.
An̈ej dꞌa tas sgana snivanil ebꞌ bꞌaj ol yacꞌoch spensar.
Man̈ xajanoc Dios yuj ebꞌ.
5 Ol laj yal ebꞌ icha tic:
A dꞌa Dios van cacꞌanoch co pensar,
xcham ebꞌ,
palta a sbꞌeybꞌal ebꞌ ol chꞌoxaneloc to man̈oc Dios ayoch yedꞌ ebꞌ.
A achxo jun,
tziqꞌuel a bꞌa dꞌa ebꞌ icha chiꞌ syutej sbꞌa.
Man̈ junn̈ejoc tzach ecꞌ yedꞌ ebꞌ.
6 A dꞌa scal ebꞌ chiꞌ,
ataꞌ ay ebꞌ ton̈ej smontan och ebꞌ ix ix malaj spensar dꞌa yoltac pat,
syacꞌan musansatil ebꞌ ix ebꞌ.
A ebꞌ ix chiꞌ,
juvinacxoel spensar ebꞌ ix yuj chucal.
Tzijtum val juntzan̈ malaj svachꞌil snibꞌejoch ebꞌ ix,
an̈ej pax taꞌ ayoch spensar ebꞌ ix.
7 A ebꞌ ix chiꞌ,
masanil tiempo syacꞌlej ebꞌ ix scꞌaybꞌan sbꞌa,
palta malaj bꞌaqꞌuin̈ ol yojtaquejel jun cꞌaybꞌubꞌal te yel ebꞌ ix chiꞌ.
8 Icha ajnac schichonoch scꞌool vin̈aj Janes yedꞌ vin̈aj Jambres* dꞌa vin̈aj Moisés,
icha pax chiꞌ schichonoch scꞌool ebꞌ anima sval tic dꞌa jun cꞌaybꞌubꞌal te yel.
Toxonton juvinaquel spensar ebꞌ.
A sbꞌeybꞌal ebꞌ schꞌoxaneli to man̈oc dꞌa Dios ayoch spensar ebꞌ.
9 Palta a ebꞌ chiꞌ,
ol checlajel ebꞌ dꞌa yichan̈ ebꞌ anima smasanil to malaj spensar ebꞌ,
yuj chiꞌ man̈ ol yacꞌlaj ganar ebꞌ.
Icha ajnac scheclajel ebꞌ vin̈ chichonnac och scꞌool dꞌa vin̈aj Moisés chiꞌ,
icha chiꞌ ol aj scheclajel ebꞌ.
Slajvubꞌ schecnabꞌil vin̈aj Pablo
10 A ach tic,
ojtac in cꞌaybꞌubꞌal,
in bꞌeybꞌal yedꞌ tas ix vutej in pensar.
Ix ilaꞌ tas ix vutej vacꞌanoch Cajal Jesús dꞌa in cꞌool.
Ix il jantac in nivancꞌolal yedꞌ pax tas ix vutej in xajanan ebꞌ anima.
11 An̈ejtonaꞌ ix ilaꞌ tas ix vutej in tecꞌbꞌan in bꞌa dꞌa scal juntzan̈ tas ix acꞌjioch dꞌa vibꞌan̈ dꞌa chon̈abꞌ Antioquía,
dꞌa Iconio yedꞌ dꞌa Listra.
Te nivan yaelal ix vabꞌ dꞌa juntzan̈ chon̈abꞌ chiꞌ,
palta a Cajal Jesús ix in colanel dꞌa yol scꞌabꞌ masanil.
12 A mach snibꞌan stojolbꞌitej sbꞌeybꞌal yujto junxon̈ej tzꞌajcan yedꞌ Cristo Jesús,
val yel ol acꞌjococh yaelal dꞌa yibꞌan̈ yuj ebꞌ anima.
13 Axo ebꞌ te chuc sbꞌeybꞌal yedꞌ ebꞌ tzꞌacꞌan musansatil ebꞌ anima,
ol vachꞌ bꞌatcan ebꞌ dꞌa scal chucal chiꞌ.
Tzꞌacꞌvi musansatil ebꞌ,
tzꞌacꞌjipax musansatil ebꞌ.
14 Palta a ach tic,
tecꞌan val tzutej acꞌanoch a pensar dꞌa juntzan̈ cꞌaybꞌubꞌal a cꞌaybꞌejnac.
Acꞌn̈ej och juntzan̈ cꞌaybꞌubꞌal chiꞌ dꞌa a cꞌool,
yujto ojtac mach cꞌaybꞌannac ach.
15 Atax yic ix ach cotoch uninal,
atax taꞌ ix a yamoch a cꞌaybꞌan Slolonel Dios Tzꞌibꞌabꞌilcani.
Aton Slolonel chiꞌ tzꞌacꞌan jelanbꞌoc co pensar yic tzon̈ colchaji,
yuj cacꞌanoch Cristo Jesús dꞌa co cꞌool.
16 A masanil Slolonel chiꞌ,
a Dios chiꞌ ix acꞌan tzꞌibꞌchajoc,
yuj chiꞌ ay yopisio on̈ scꞌaybꞌani.
Ay yopisio on̈ scachanoch vaan.
Ay yopisio yacꞌan bꞌo co pensar.
Ay pax yopisio on̈ scꞌaybꞌan dꞌa tas scutej co tojolbꞌitan co bꞌeybꞌal.
17 Icha chiꞌ yopisio Slolonel chiꞌ,
yic a on̈ yic on̈xo Dios,
tzꞌacan snachajel cuuj,
syaln̈ej pax co cꞌulan jantacn̈ej tas vachꞌ.