4
Ayic ol javoc Cajal Jesucristo dꞌa schaelal,
ato taꞌ ol vachꞌ och yajalil.
Aꞌ ol chꞌolbꞌitan tas yaj masanil ebꞌ anima chamnacxo yedꞌ ebꞌ pitzanto.
Yuj chiꞌ,
dꞌa yichan̈ Dios yedꞌ dꞌa yichan̈ Cajal Jesucristo,
scham val valanbꞌat dꞌayach:
2 Tzalel Slolonel Dios dꞌa scal ebꞌ anima.
Taxon̈ej sgana ebꞌ syabꞌi,
mato maay,
palta tzaln̈ej dꞌa ebꞌ,
tza montan ebꞌ.
Tza cachan ebꞌ dꞌa chucal,
tzecan sna ebꞌ.
Te nivan tzutej a cꞌool dꞌa ebꞌ,
tza cꞌaybꞌej pax ebꞌ dꞌa Slolonel Dios chiꞌ.
3 Yujto a dꞌa jun tiempoal ol javoc,
ay ebꞌ man̈xo ol chaan alchaj juntzan̈ cꞌaybꞌubꞌal yel dꞌa ebꞌ.
Man̈ jantacoc juntzan̈ comon lolonel sgana ebꞌ ol yabꞌi,
yuj chiꞌ tzijtum ebꞌ cꞌaybꞌum ol smolbꞌejcot ebꞌ.
Palta a ebꞌ cꞌaybꞌum chiꞌ,
an̈ej juntzan̈ comon lolonel ol yal ebꞌ icha sgana ebꞌ anima.
4 Yuj chiꞌ man̈xo ol yacꞌoch schiquin ebꞌ dꞌa jun cꞌaybꞌubꞌal te yel.
A dꞌa juntzan̈ comon abꞌix ol yacꞌoch spensar ebꞌ.
5 A ach xo,
tecꞌan tzutej a pensar dꞌa masanil tiempo.
Tzacꞌ val techaj abꞌan syail.
Tzalel vachꞌ abꞌix yic colnabꞌil dꞌa scal ebꞌ anima.
Munlajan̈ sicꞌlabꞌil,
yic vachꞌ malaj tas ol yacꞌ palta dꞌa opisio chiꞌ.
6 A inxo tic,
van sja stiempoal in chami.
Icha junoc tas siaj dꞌa Dios to smiljichamoc,
icha chiꞌ ol in ajoc.
7 Icha junoc mach syacꞌ yip dꞌa junoc tajnel,
icha chiꞌ ix vutej in bꞌa in munlaj dꞌa yic Dios.
Axo ticnaic,
ix vacꞌ ganar slajvi vopisio dꞌa svachꞌil.
Dꞌa masanil tiempo ix in cꞌanabꞌajej juntzan̈ cꞌaybꞌubꞌal bꞌaj scacꞌoch co cꞌool.
8 Axo ticnaic,
ay jun spac vic sicꞌanxo,
yujto tojol ix vutej in bꞌeybꞌal.
A Cajal Jesús,
te tojol spensar,
Aꞌ ol chꞌolbꞌitan yaj anima smasanil.
A dꞌa jun cꞌual chiꞌ,
ol in cha spac vic dꞌay.
Man̈oc inn̈ej ol in cha spac vicoꞌ,
palta ol scha pax yic ebꞌ snibꞌan sjaubꞌal Cajal Jesús dꞌa schaelal.
Juntzan̈xo schecnabꞌil vin̈aj Pablo
9 In gana tzach cot in il dꞌa elan̈chamel
10 yujto ix in yactejcan vin̈aj Demas in chꞌocoj.
Ix bꞌat vin̈ dꞌa Tesalónica,
yujto an̈ej tas ay dꞌa yolyibꞌan̈qꞌuinal tic bꞌaj syacꞌoch spensar vin̈.
Axo vin̈ cucꞌtac Crescente,
a dꞌa yol yic Galacia ix bꞌat vin̈.
Yedꞌ vin̈ cucꞌtac Tito,
ix bꞌat vin̈ dꞌa yol yic Dalmacia.
11 Axon̈ej vin̈ cucꞌtac Lucas ayecꞌ vedꞌoc.
Ayic tzach coti,
tza say vin̈aj Marcos,
yic tzicꞌcot vin̈ edꞌoc,
yujto te ay yopisio vin̈ smunlaj vedꞌoc dꞌa yic Cajal Jesús.
12 Axo vin̈aj Tíquico,
a dꞌa Éfeso ix in checbꞌat vin̈.
13 Ayic tzach coti,
comonoc tzecꞌ icꞌ jun in pichul jucan vactejnaccan dꞌa vin̈aj Carpo dꞌa chon̈abꞌ Troas.
Tzicꞌanpaxcot juntzan̈ chꞌan̈ in libro.
A val juntzan̈xo chꞌan̈ uum te vachꞌ,
yovalil tzicꞌcot chꞌan̈.
14 A vin̈aj Alejandro,
vin̈ bꞌoum qꞌueen,
te chuc ix yutej sbꞌa vin̈ dꞌayin.
Palta a Cajal Jesús ol pactzitan dꞌa vin̈.
15 An̈ejtonaꞌ tzil pax a bꞌa dꞌa vin̈ a ach tic,
yujto ste chichonoch scꞌool vin̈ dꞌa jun abꞌix scalel tic.
16 Ayic ix in cꞌoch dꞌa yichan̈ ebꞌ yajal dꞌa sbꞌabꞌelal yuj valani tas vaji,
malaj junoc mach ix och vedꞌoc.
Ix laj bꞌat ebꞌ,
ix in yactejcan ebꞌ in chꞌocoj.
Comonoc man̈ ol yacꞌcot spac jun chiꞌ Dios dꞌa ebꞌ.
17 Palta axo Cajal Jesús ix och vedꞌoc.
Ix colvaj vedꞌoc,
yuj chiꞌ ix in vachꞌ alejel vachꞌ abꞌix yic colnabꞌil.
A val ebꞌ man̈ israeloc,
ix yabꞌ ebꞌ smasanil.
A junel,
ichato yamchajnac in yuj jun nocꞌ choj,*
ijan schinac in bꞌat nocꞌ,
palta a Cajal Jesús colannac in elta dꞌa yol stiꞌ nocꞌ choj chiꞌ.
18 A Cajalil chiꞌ ol in colanel dꞌa yol scꞌabꞌ masanil chucal.
Ol in svachꞌ tan̈vani,
yic ol in cꞌoch dꞌa yol scꞌabꞌ dꞌa satchaan̈.
Nivanocabꞌ yelcꞌoch Cajalil chiꞌ dꞌa masanil tiempo.
Amén.
Tzꞌacꞌjibꞌat stzatzil scꞌool ebꞌ
19 Svacꞌbꞌat stzatzil scꞌol ix canabꞌ Prisca yedꞌ vin̈ cucꞌtac Aquila yedꞌ pax ebꞌ ay dꞌa yol spat vin̈ cucꞌtac Onesíforo.
20 A vin̈ cucꞌtac Erasto,
a dꞌa Corinto ix can vin̈.
Axo vin̈ cucꞌtac Trófimo,
a dꞌa Mileto ix vacꞌcan vin̈,
yujto penaay vin̈.
21 In gana tzach cotcan dꞌa elan̈chamel,
yacbꞌan manto ja n̈abꞌilqꞌuinal.
A vin̈ cucꞌtac Eúbulo tic,
syacꞌbꞌat stzatzil a cꞌool vin̈.
Icha pax chiꞌ vin̈ cucꞌtac Pudente,
vin̈ cucꞌtac Lino,
ix canabꞌ Claudia yedꞌ ebꞌ creyente smasanil,
syacꞌpaxbꞌat stzatzil a cꞌool ebꞌ taꞌ.
22 Ayocabꞌ och Cajal Jesucristo edꞌoc.
Yacꞌocabꞌpax svachꞌcꞌolal Dios dꞌayex e masanil taꞌ.
Amén.