A Scarta San Pablo
DꞌA VIN̈AJ TITO
Tzꞌel yich scarta vin̈aj Pablo
1
A in Pablo in tic,
svacꞌ servil Dios.
An̈ejtonaꞌ schecabꞌ in pax Jesucristo,
yic vachꞌ a ebꞌ sicꞌbꞌiltaxonel yuj Dios ol svachꞌ aqꞌuejoch Cristo ebꞌ dꞌa scꞌool.
Ay vopisio in cꞌaybꞌan ebꞌ dꞌa jun cꞌaybꞌubꞌal te yel,
aton jun tzon̈ cꞌaybꞌan dꞌa vachꞌil.
2 A yuj jun cꞌaybꞌubꞌal chiꞌ scacꞌoch yipoc co cꞌool to ol co cha co qꞌuinal dꞌa juneln̈ej.
A Dios malaj bꞌaj syesej juneloc.
Ayic manto sbꞌo jun yolyibꞌan̈qꞌuinal tic,
ix yacꞌcan stiꞌ to ol yacꞌ co qꞌuinal.
3 A ticnaic,
ix javi stiempoal yacꞌan ojtacajel Slolonel.
Yuj chiꞌ ix acꞌjioch Slolonel chiꞌ abꞌenal dꞌa yol in cꞌabꞌ,
axo yuj schecnabꞌil Dios co Columal svaleli.
4 Tic svacꞌbꞌat jun in carta tic dꞌayach ach Tito.
Yel ichato vuninal ach,
yujto junn̈ej scutej cacꞌanoch Cristo dꞌa co cꞌool.
Aocabꞌ co Mam Dios yedꞌ Cajalil Jesucristo co Columal syacꞌ svachꞌcꞌolal yedꞌ sjuncꞌolal dꞌayach taꞌ.
Yopisio vin̈aj Tito dꞌa Creta
5 Vacꞌnac ach can dꞌa yol yic Creta chiꞌ,
yic tza vachꞌ bꞌoej juntzan̈ tas ayto sbꞌoi.
Tza sicꞌanpaxelta ebꞌ tzꞌoch ancianoal dꞌa junjun chon̈abꞌ.
Tza siqꞌuelta ebꞌ icha vutejnac valancan dꞌayach.
6 Tic svalbꞌat dꞌayach tas yovalil sbꞌeybꞌalej ebꞌ tzꞌoch ancianoal chiꞌ:
Yovalil malaj bꞌaj say junoc chucal ebꞌ,
yic max yal yacꞌjioch junoc tas dꞌa yibꞌan̈ ebꞌ.
Yovalil junn̈ej ix yetbꞌeyum junjun ebꞌ.
Axo yuninal ebꞌ,
yovalil creyente ebꞌ smasanil.
Man̈ comonoc say chucal ebꞌ.
Man̈ acꞌumtacoc syutej sbꞌa ebꞌ.
7 Yujto a ebꞌ tzꞌoch yilumaloc ebꞌ yetcreyenteal,
yovalil te vachꞌn̈ej syutej sbꞌa ebꞌ,
yujto yilumal smunlajel Dios tzꞌaj ebꞌ.
Max yal axon̈ej ebꞌ sgana syal yicoꞌ.
Max yal utzin syutej scꞌool ebꞌ.
Man̈ ucꞌumoc an̈ ebꞌ.
Mocabꞌ comon macꞌvaj pax ebꞌ.
An̈ejtonaꞌ,
mocabꞌ yacꞌ ganar stumin ebꞌ dꞌa spatic chucal.
8 A ebꞌ ay yopisio chiꞌ,
yovalil vachꞌ syutej sbꞌa ebꞌ dꞌa ebꞌ slaj ecꞌ dꞌay.
Yovalil an̈ej tas vachꞌ scꞌulej ebꞌ,
syilan val sbꞌa ebꞌ.
Te tojol syutej sbꞌa ebꞌ.
An̈ej dꞌa Dios syacꞌoch spensar ebꞌ.
Yovalil scachoch vaan snivanil ebꞌ.
9 Yovalil a dꞌa jun cꞌaybꞌubꞌal te yel syacꞌoch spensar ebꞌ,
aton jun scꞌaybꞌejnac ebꞌ.
Yovalil icha chiꞌ syutej sbꞌa ebꞌ yic vachꞌ syal stojolbꞌitan spensar ebꞌ yetcreyenteal ebꞌ yedꞌ jun cꞌaybꞌubꞌal te vachꞌ,
yic pax syal schꞌoxanel ebꞌ bꞌaj ay spaltail ebꞌ chuc yalan dꞌa spatic co cꞌaybꞌubꞌal tic.
10 Yujto tzijtum ebꞌ an̈ejaꞌ yacꞌan acꞌumtaquil.
An̈ej juntzan̈ tas malaj yelcꞌoch scomon alej ebꞌ.
Nan̈al val ebꞌ somchajel yuj ebꞌ.
A dꞌa scal ebꞌ israel,
tzijtum ebꞌ icha chiꞌ syutej sbꞌa.
11 Yovalil scachjioch vaan ebꞌ,
yic maxtzac yal ebꞌ,
yujto yaln̈ej mach junoc pat bꞌaj tzꞌecꞌ ebꞌ,
tzꞌecꞌ ebꞌ yacꞌ somchaj spensar ebꞌ creyente chiꞌ.
Slaj ecꞌ ebꞌ scꞌaybꞌej ebꞌ anima dꞌa juntzan̈ chucal,
yic vachꞌ syacꞌ ganar stumin ebꞌ dꞌa spatic ebꞌ.
12 Ay jun vin̈ aj Creta chiꞌ te jelan dꞌa scal ebꞌ.
Ix yal vin̈ icha tic:
A ebꞌ vetchon̈abꞌ tic,
te esalvum ebꞌ.
Lajan val ebꞌ icha junoc nocꞌ nocꞌ te ov.
Te jaragana ebꞌ,
an̈ej vael sgana ebꞌ syacꞌaꞌ,
xchi vin̈.
13 Yel ton val syal vin̈.
Yuj chiꞌ a ach tic yovalil tza cachoch vaan ebꞌ,
yic vachꞌ a jun cꞌaybꞌubꞌal yel syacꞌoch ebꞌ dꞌa scꞌool.
14 Tzal dꞌa ebꞌ yic vachꞌ maxtzac yacꞌoch spensar ebꞌ dꞌa juntzan̈ comon abꞌix syal ebꞌ israel yedꞌ pax dꞌa juntzan̈ schecnabꞌil ebꞌ malaj yelcꞌoch jun cꞌaybꞌubꞌal yel dꞌa sat.
15 A on̈ tojolbꞌitabꞌilxo co pensar,
vachꞌ masanil tas dꞌayon̈.
Palta axo ebꞌ max acꞌanoch dꞌa scꞌool,
ebꞌ malaj svachꞌiltaxon spensar,
malaj junoc tas vachꞌ dꞌa ebꞌ.
Yujto a spensar ebꞌ chiꞌ,
toxonton chuc.
Man̈ jabꞌoc syil sbꞌa ebꞌ yedꞌ spensar chiꞌ.
16 Slaj yal ebꞌ to yojtac val Dios ebꞌ,
palta a dꞌa sbꞌeybꞌal ebꞌ scheclajeli to man̈ yojtacoc Dios chiꞌ ebꞌ.
Bꞌalaj malaj svachꞌil ebꞌ dꞌa yichan̈ Dios chiꞌ,
yujto max scꞌanabꞌajej ebꞌ tas syalaꞌ.
Yuj chiꞌ toxon max yal scꞌulan junoc tas vachꞌ ebꞌ.