—Ach cajal Félix,

yuj val dios dꞌayach,

uuj juncꞌolal caji.

Te vachꞌ yaj jantacn̈ej tas dꞌa yol a cꞌabꞌ,

yujto te jelan ach.

3 Te vachꞌ ach.

A dꞌa junjun lugar chequel yaji to vachꞌn̈ej tas tza cꞌulej.

Yuj val dios dꞌayach.

4 Palta yic max quiqꞌuecꞌ nivanoc tiempo dꞌayach,

¿ma max acꞌ pavor abꞌan jay bꞌelan̈ lolonel co gana scal tic dꞌayach?

5 A vin̈aj Pablo tic,

scabꞌ val syail yuj vin̈.

Ijan max techaj cuuj.

Slaj ecꞌ vin̈ stzuntzej chaan̈ oval dꞌa scal ebꞌ quetisraelal dꞌa junjun lugar.

Yajal yaj vin̈ dꞌa junxo macan̈ cꞌaybꞌubꞌal,

aton ebꞌ syacꞌoch spensar dꞌa jun vin̈ aj Nazaret.

6 Ix yacꞌlej vin̈ yicꞌanoch ebꞌ man̈ israeloc dꞌa yol yamaqꞌuil stemplo Dios yic tzꞌixtaxel dꞌa yichan̈ Dios.

Yuj chiꞌ ix co yam vin̈.

Co gana ix co chꞌolbꞌitej yaj vin̈,

icha syal chꞌan̈ ley aycan dꞌa yol co cꞌabꞌ,

7 palta axo vin̈aj Lisias,

vin̈ coronel ix yecoch sbꞌa dꞌa co cal.

Ix bꞌat vin̈ yiqꞌuelta vin̈ dꞌa yol co cꞌabꞌ.

8 Ix yalan vin̈ dꞌa ebꞌ tzꞌacꞌanoch dꞌa yibꞌan̈ vin̈aj Pablo tic to yovalil scot ebꞌ dꞌayach.

A ach tic,

syal a cꞌanbꞌan abꞌ dꞌa vin̈aj Pablo tic.

Ichato chiꞌ ol ilanelta to yel,

man̈ nabꞌan̈ejoc squicꞌcot dꞌa yibꞌan̈ vin̈,

xchi vin̈aj Tértulo chiꞌ.

9 Axo ebꞌ vin̈ israel ajun yedꞌ vin̈,

ix yal pax ebꞌ vin̈:

—Te yel syal vin̈aj Tértulo tic,

xchi ebꞌ vin̈.

10 Ix lajvi chiꞌ,

ix yacꞌan yechel vin̈ yajal chiꞌ yic slolon vin̈aj Pablo chiꞌ.

Yuj chiꞌ ix yal yic vin̈ icha tic:

—Mamin Félix,

a ach tic,

vojtac to nivanxo tiempo ayach och juezal dꞌa co nación tic.

Yuj chiꞌ tzin tzalaji svalan tas vaj dꞌayach.

11 Syal ojtacaneli to yel juntzan̈ ol val tic dꞌayach.

Manto cꞌochlaj slajchavil cꞌual in cꞌoch dꞌa Jerusalén,

yic sval in bꞌa dꞌa Dios.

12 Malaj junoc anima tzin telaj in bꞌa yedꞌoc.

Malaj pax junoc lugar bꞌaj tzecꞌ vacꞌqꞌue somnaj ebꞌ anima.

Man̈oc dꞌa yamaqꞌuil stemplo Dios,

man̈oc dꞌa yol spatil culto,

man̈oc pax dꞌa junocxo lugar dꞌa Jerusalén chiꞌ.

Malaj jabꞌoc in mul ix ilchaj yuj ebꞌ.

13 A ebꞌ tzꞌacꞌanoch tic dꞌa vibꞌan̈,

malaj jabꞌoc tas schꞌox ebꞌ tato yel juntzan̈ tas syacꞌoch ebꞌ tic dꞌa vibꞌan̈.

14 Yel toni,

a Dios,

aton sDiosal ebꞌ in mam vicham,

a dꞌay svacꞌ em in bꞌa,

icha syal co cꞌaybꞌubꞌal,

aton jun macan̈xo cꞌaybꞌubꞌal tic syal ebꞌ.

Palta a in tic,

svacꞌoch dꞌa in cꞌol jantac tas tzꞌibꞌabꞌilcan dꞌa ley Moisés yedꞌ jantac tas tzꞌibꞌabꞌilcan yuj ebꞌ schecabꞌ Dios.

15 Svacꞌ val och Dios yipoc in cꞌool to ol pitzvocxi ebꞌ chamnac smasanil,

jantacn̈ej ebꞌ tojol spensar yedꞌ pax ebꞌ man̈ tojoloc.

Icha pax chiꞌ sna ebꞌ tic vedꞌoc.

16 Yuj chiꞌ svil val in bꞌa,

yic max och in mul dꞌa Dios,

yic max och pax in mul dꞌa ebꞌ vetanimail.

17 Ay xom sjayiloc abꞌil man̈xo in ayoc ecꞌ dꞌa Jerusalén chiꞌ.

Yuj chiꞌ in cꞌochxi,

yic svacꞌ jabꞌoc in colval dꞌa ebꞌ mebꞌaꞌ dꞌa scal ebꞌ vetchon̈abꞌ tic,

yic svacꞌan pax jabꞌoc in silabꞌ dꞌa Dios.

18 Ayinecꞌ dꞌa yol yamaqꞌuil stemplo Dios,

yic svacꞌan in silabꞌ chiꞌ.

Toxo ix in bꞌo in bꞌa ichataxon co ley.

Jayvan̈n̈ej anima ayoch vedꞌoc,

malaj mach n̈ilanochi.

Malaj jabꞌoc oval ix in sayaꞌ.

Palta ataꞌ ix in syam juntzan̈ ebꞌ israel aj Asia.

19 Tato ay val in mul ix yil ebꞌ,

cotocabꞌ ebꞌ dꞌa ichan̈ tic,

ul yalocabꞌ ebꞌ tas in mul chiꞌ.

Octom a val ebꞌ ix javi.

20 A ebꞌ tzꞌacꞌanoch dꞌa vibꞌan̈ ayecꞌ tic,

yalocabꞌ ebꞌ,

tato ay in mul ix ilchaj yuj ebꞌ vin̈ sat yajal yaj dꞌa scal ebꞌ israel ayic ix in schꞌolbꞌitan ebꞌ.

An̈ej tato mul jun tic:

21 Ayic ay in ecꞌ dꞌa yichan̈ ebꞌ vin̈ yajal chiꞌ,

te chaan̈ ix val icha tic:

Van in chꞌolbꞌitaji yujto svacꞌoch dꞌa in cꞌool to ol pitzvocxi ebꞌ chamnac,

xin chi,

xchi vin̈aj Pablo chiꞌ dꞌa vin̈.

22 Axo vin̈aj Félix chiꞌ yojtac vin̈ sicꞌlabꞌil tas yaj scꞌaybꞌubꞌal ebꞌ creyente.

Yuj chiꞌ ayic ix yabꞌan juntzan̈ chiꞌ vin̈,

ix yalan vin̈:

—Cotocabꞌ vin̈aj Lisias,

vin̈ coronel chiꞌ.

Ol ul yalan vin̈ dꞌayin tas val yaj jun eyoval tic.

Ichn̈ejocabꞌ taꞌ scan bꞌela,

xchi vin̈.

23 Ix lajvi chiꞌ,

ix yalan vin̈ dꞌa vin̈ capitán to an̈ejaꞌ stan̈vaj vin̈aj Pablo chiꞌ.

Palta libre val tzꞌaj vin̈.

Syal slolon vin̈ yedꞌ ebꞌ svachꞌcꞌool,

syal pax yacꞌan ebꞌ tas yovalil tzꞌoch yuj vin̈.

24 Ayxom jayeoc cꞌual chiꞌ,

ix jax vin̈aj Félix dꞌa Cesarea chiꞌ junelxo.

Ajun ix yetbꞌeyum vin̈ scuch Drusila yedꞌoc,

israel ix.

Axo vin̈ ix avtancot vin̈aj Pablo chiꞌ yic scꞌanbꞌej yabꞌ vin̈ dꞌa vin̈ tas scutej cacꞌanoch Jesucristo dꞌa co cꞌool.

25 Ix yalan vin̈aj Pablo chiꞌ dꞌa vin̈ to yovalil vachꞌ scutej co bꞌeybꞌal,

sco cachanoch vaan co bꞌa yic max co cꞌulej chucal.

Ix yalanpax vin̈ to ol chꞌolbꞌitaj yaj ebꞌ anima smasanil.

Ayic ix yabꞌan juntzan̈ chiꞌ vin̈,

ix te xiv vin̈.

Ix yalan vin̈ dꞌa vin̈:

—Cꞌocbꞌilxo chiꞌ tzalaꞌ.

Tato ay bꞌaj ol och in colanil,

ol ach vavtejxicoti,

xchi vin̈.

26 A vin̈aj Félix chiꞌ,

sgana vin̈ to ix yacꞌ jabꞌoc tumin vin̈aj Pablo chiꞌ dꞌa vin̈ dꞌa elcꞌaltac,

yic tzꞌactajel vin̈ yuj vin̈.

Yuj chiꞌ tzijtum el ix avtajcot vin̈ yuj vin̈ yic slolon vin̈ yedꞌ vin̈.

27 Chabꞌ abꞌil ix yacꞌ vin̈ icha chiꞌ yedꞌ vin̈aj Pablo chiꞌ.

Ix lajvi chiꞌ,

ix el vin̈ dꞌa yopisio.

Axo vin̈aj Porcio Festo ix ochcan sqꞌuexuloc vin̈.

Axo yic ix el vin̈aj Félix chiꞌ dꞌa yopisio chiꞌ,

ix cann̈ej vin̈aj Pablo chiꞌ dꞌa yol preso chiꞌ yuj vin̈ yic vachꞌ stzalaj ebꞌ israel yedꞌ vin̈.