Ayecꞌ vin̈aj Pablo dꞌa Corinto
18
Ix lajvi slolon vin̈aj Pablo dꞌa Areópago chiꞌ,
ix elxi vin̈ dꞌa chon̈abꞌ Atenas chiꞌ,
axo dꞌa chon̈abꞌ Corinto ix cꞌoch vin̈.
2 Ataꞌ ay jun vin̈ israel scuch Aquila.
A dꞌa yol yic Ponto aljinac vin̈.
Axo ix yetbꞌeyum vin̈,
Priscila sbꞌi ix.
Ecꞌnac vin̈ dꞌa yol yic Italia yedꞌ ix yetbꞌeyum chiꞌ,
palta a vin̈ yajal scuchan Claudio,
a vin̈ pechjinaquel jantac ebꞌ israel ayecꞌ dꞌa chon̈abꞌ Roma dꞌa yol yic Italia chiꞌ.
Yuj chiꞌ ix elxi ebꞌ taꞌ,
ix cꞌochcan ebꞌ dꞌa Corinto chiꞌ.
Axo vin̈aj Pablo ix cꞌoch dꞌa spat ebꞌ.
3 Ataꞌ ix can vin̈ yedꞌ ebꞌ yujto lajan smunlajel vin̈ yedꞌ ebꞌ schavan̈il.
A juntzan̈ mantiado sbꞌo ebꞌ,
yuj chiꞌ junn̈ej ix munlaj vin̈ yedꞌ ebꞌ taꞌ.
4 Axo dꞌa junjun scꞌual icꞌoj ip,
sbꞌat vin̈aj Pablo chiꞌ yalel yabꞌixal Jesús dꞌa scal ebꞌ,
syacꞌan vin̈ yojtaquejel ebꞌ israel yedꞌ ebꞌ man̈ israeloc yic syacꞌoch ebꞌ dꞌa scꞌool.
5 Axo vin̈aj Silas yedꞌ vin̈aj Timoteo,
ix cotxi ebꞌ vin̈ dꞌa yol yic Macedonia.
Ayic ix cꞌoch ebꞌ vin̈ dꞌa Corinto chiꞌ,
a vin̈aj Pablo,
axon̈ej slolonel Dios ix yalel vin̈.
Ix ste acꞌan val vin̈ yojtaquejel ebꞌ israel to a Jesús aton Cristo,
jun tan̈vabꞌiltaxon sja yuj ebꞌ.
6 Palta ton̈ej ix cot yoval ebꞌ dꞌa vin̈.
Ix laj te bꞌuchvaj ebꞌ.
Yuj chiꞌ ix stzicubꞌtan̈ej spichul vin̈ yil ebꞌ,
yic schꞌoxanel vin̈ to man̈xalaj yalan yic vin̈ dꞌa ebꞌ.
Ix yalancan vin̈ dꞌa ebꞌ icha tic:
—A ex tic,
munil tzeyicꞌcot eyaelal dꞌa eyibꞌan̈ dꞌa juneln̈ej.
A in xo tic man̈xa valan vic dꞌayex.
A ticnaic ol in bꞌat valel dꞌa ebꞌ man̈ israeloc,
xchi vin̈ dꞌa ebꞌ.
7 Ix lajvi chiꞌ ix elta vin̈ bꞌaj tzꞌoch culto chiꞌ,
ix bꞌat vin̈ dꞌa spat jun vin̈ scuch Ticio Justo.
A jun vin̈ chiꞌ syacꞌ val och Dios vin̈ dꞌa scꞌool.
A spat vin̈ a dꞌa stzꞌey spatil culto chiꞌ ay.
8 Ay jun vin̈ scuch Crispo cuchbꞌum yaj dꞌa culto.
Ix yacꞌoch Cajal Jesús vin̈ dꞌa scꞌool yedꞌ jantac ebꞌ junn̈ej yaj yedꞌ vin̈ dꞌa yol spat.
Tzijtum ebꞌ aj Corinto chiꞌ ayic ix yabꞌan slolonel Dios ebꞌ,
ix yacꞌoch ebꞌ dꞌa scꞌool,
ix acꞌjipax bautizar ebꞌ.
9 Axo dꞌa jun acꞌval,
icha vayich ix yutej Cajal Jesús yalan dꞌa vin̈aj Pablo chiꞌ:
—Man̈ ach xivoc.
Man̈ ach och vaan alanel in lolonel,
10 yujto ay in ecꞌ edꞌoc.
Malaj junoc mach ol yal scot jucnaj dꞌayach,
yujto tzijtum mach sicꞌbꞌiltaxonel vuuj dꞌa jun chon̈abꞌ tic,
xchi dꞌa vin̈.
11 Yuj chiꞌ nan̈al schabꞌil abꞌil ix aj vin̈ dꞌa Corinto chiꞌ.
Ix scꞌaybꞌan ebꞌ anima vin̈ dꞌa slolonel Dios taꞌ.
12 Ayic ayoch vin̈aj Galión yajalil dꞌa yol yic Acaya,
ix slajtiej sbꞌa ebꞌ israel dꞌa spatic vin̈aj Pablo chiꞌ,
ix syaman vin̈ ebꞌ,
ix yicꞌanbꞌat vin̈ ebꞌ dꞌa yichan̈ vin̈ yajal.
13 Ix yalan ebꞌ dꞌa vin̈ yajal chiꞌ:
—A jun vin̈ tic tzecꞌ acꞌan scꞌool ebꞌ anima,
yic vachꞌ nivanoc syal sbꞌa ebꞌ dꞌa Dios,
palta man̈ ichaoc yaj ley,
xchi ebꞌ.
14 Vanxo val yalan yic vin̈aj Pablo chiꞌ,
palta ix yalan vin̈aj Galión chiꞌ dꞌa ebꞌ israel chiꞌ:
—Man̈ ex avajochta dꞌayin.
Qꞌuinaloc ay junoc chucal scꞌulej vin̈ tic,
mato ay junoc smul vin̈ te chuc dꞌa yichan̈ ley,
tato icha chiꞌ tzam in cha vabꞌ tas tzeyalaꞌ.
15 Palta ina ton̈ej e gana tzeyacꞌ oval yuj juntzan̈ lolonel syal vin̈,
yuj juntzan̈ mach tzꞌacꞌan bꞌinaj vin̈ yedꞌ pax yuj e ley.
Yuj chiꞌ ixiquec,
bꞌat bꞌoec yaj jun tic e chꞌocoj.
Xal in tic,
max yal in cꞌol tzin bꞌo juntzan̈ tic,
xchi vin̈ dꞌa ebꞌ.
16 Ix lajvi yalan juntzan̈ chiꞌ vin̈,
ix spechanelta ebꞌ vin̈ dꞌa yol sdespacho chiꞌ.
17 Axo vin̈aj Sóstenes ix syam ebꞌ,
aton jun vin̈ scuchbꞌan ebꞌ dꞌa culto.
Ix smacꞌan vin̈ ebꞌ dꞌa stiꞌ sdespacho vin̈ yajal chiꞌ.
Palta ton̈ej ix och qꞌuelan vin̈ yajal chiꞌ,
malaj jabꞌoc tas ix yal vin̈ dꞌa ebꞌ.
Cꞌochnacxi vin̈aj Pablo dꞌa Antioquía
18 Axo vin̈aj Pablo chiꞌ,
nivanto tiempo ix ecꞌ vin̈ dꞌa Corinto chiꞌ.
Ix lajvi chiꞌ ix yalancan quil co bꞌa vin̈ dꞌa ebꞌ creyente chiꞌ.
Ix bꞌat ix Priscila yedꞌ vin̈aj Aquila yedꞌ vin̈.
Ix cꞌoch ebꞌ dꞌa chon̈abꞌ Cencrea.
Axo taꞌ ix och ebꞌ dꞌa yol jun barco van sbꞌat dꞌa Siria.
Ayic manto och ebꞌ dꞌa yol barco chiꞌ,
ix joxchajcanel vin̈aj Pablo chiꞌ taꞌ.
A jun chiꞌ yechel yaji to ay jun stiꞌ vin̈ ix yacꞌ dꞌa Dios.*
19 Axo ix cꞌoch ebꞌ dꞌa chon̈abꞌ Éfeso bꞌaj ix can ix Priscila yedꞌ vin̈aj Aquila chiꞌ,
ix bꞌat vin̈aj Pablo chiꞌ dꞌa spatil culto.
Axo taꞌ ix lolon vin̈ yedꞌ ebꞌ yetisraelal.
20 Ix scꞌan val ebꞌ dꞌa vin̈ to scan jayeoc cꞌual vin̈ yedꞌ ebꞌ,
palta maj yal-laj scꞌol vin̈.
21 Axo yic van yalancan quil co bꞌa vin̈ dꞌa ebꞌ,
ix yalan vin̈:
—Tato ol el dꞌa scꞌol Dios,
ol in ecꞌ dꞌayex junelxo,
xchican vin̈ dꞌa ebꞌ.
Ix lajvi chiꞌ,
ix bꞌatxi vin̈ dꞌa yol teꞌ barco.
22 Ix cꞌoch vin̈ dꞌa chon̈abꞌ Cesarea.
Ix lajvi chiꞌ,
ix elxi vin̈ taꞌ.
Ix qꞌue vin̈ dꞌa Jerusalén bꞌat scꞌumej ebꞌ creyente.
Ix lajvi yecꞌ vin̈ taꞌ,
ix em vin̈ dꞌa chon̈abꞌ Antioquía.
23 Ataꞌ ix ecꞌ jun tiempoal vin̈.
Ix lajvi chiꞌ ix bꞌatxi vin̈.
Ix ecꞌ vin̈ dꞌa junjun chon̈abꞌ dꞌa yol yic Galacia yedꞌ dꞌa yol yic Frigia.
Ix laj ecꞌ yacꞌcan stecꞌanil ebꞌ creyente vin̈ bꞌaj ix laj eqꞌui.
Yalnaquel slolonel Dios vin̈aj Apolos dꞌa Éfeso
24 Axo dꞌa jun tiempoal chiꞌ,
ay jun vin̈ israel scuchan Apolos.
Aj chon̈abꞌ Alejandría vin̈,
ix cꞌoch vin̈ dꞌa chon̈abꞌ Éfeso.
Te vachꞌ ix yutej vin̈ yalaneli,
yujto yojtac val slolonel Dios tzꞌibꞌabꞌilcani.
25 Cꞌaybꞌabꞌil vin̈ dꞌa scꞌaybꞌubꞌal Jesús.
Ix yal val el vachꞌ abꞌix vin̈ dꞌa smasanil scꞌool.
Te vachꞌ ix yutej vin̈ yalanel yabꞌixal Jesús chiꞌ,
vachꞌchom an̈ejanto juntzan̈ scꞌaybꞌubꞌal vin̈aj Juan,
vin̈ acꞌannac bautizar yojtac vin̈.
26 Axo junel,
ix bꞌat yalel slolonel Dios vin̈ dꞌa yol spatil culto.
Te tecꞌan ix yutej sbꞌa vin̈ yalaneli.
Axo yic ix yabꞌan ix Priscila yedꞌ vin̈aj Aquila,
ix yicꞌanbꞌat vin̈ ebꞌ yedꞌoc.
Ix svachꞌ cꞌaybꞌan vin̈ ebꞌ dꞌa scꞌaybꞌubꞌal Dios.
27 Ix lajvi chiꞌ,
ix el dꞌa scꞌool vin̈aj Apolos chiꞌ sbꞌat dꞌa yol yic Acaya.
Yuj chiꞌ,
axo ebꞌ creyente ix colvaj yedꞌ vin̈.
Ix stzꞌibꞌan jun carta ebꞌ,
yic syicꞌbꞌat vin̈ dꞌa ebꞌ creyente,
yic vachꞌ schaji vin̈ yuj ebꞌ scꞌochi.
Ayic ix cꞌoch vin̈ taꞌ,
a ebꞌ yacꞌnacoch Jesús dꞌa scꞌool yuj svachꞌcꞌolal Dios,
ix te cuchbꞌaj ebꞌ yuj vin̈.
28 Ix yacꞌ val yip vin̈ schꞌoxaneli to yelcꞌolal satnac scꞌool ebꞌ israel.
A slolonel Dios tzꞌibꞌabꞌilcani,
aꞌ ix yacꞌlabꞌej vin̈ yalan dꞌa ebꞌ anima yic vachꞌ snachajel yuj ebꞌ to a Jesús aton Cristo,
jun tan̈vabꞌiltaxon sja yuj ebꞌ.