Qꞌuenac somnaj ebꞌ anima dꞌa Tesalónica
17
Ix ecꞌ vin̈aj Pablo yedꞌ vin̈aj Silas chiꞌ dꞌa chon̈abꞌ Anfípolis yedꞌ dꞌa chon̈abꞌ Apolonia.
Ix lajvi chiꞌ,
ix cꞌoch ebꞌ vin̈ dꞌa chon̈abꞌ Tesalónica bꞌaj ay jun spatil culto.
2 Axo vin̈aj Pablo chiꞌ ix och vin̈ yedꞌ ebꞌ taꞌ ichataxon smodo vin̈.
Oxeꞌ cꞌual icꞌoj ip ix yacꞌ vin̈ yacꞌlabꞌan Slolonel Dios yalan dꞌa ebꞌ israel
3 chajtil to a Cristo yovalil ix yabꞌ syail,
ix miljichamoc.
Yovalil pax ix pitzvixi dꞌa scal ebꞌ chamnac.
Ix yalanpax vin̈ dꞌa ebꞌ icha tic:
—A Jesús van valan yabꞌixal tic dꞌayex,
aton Cristo,
xchi vin̈ dꞌa ebꞌ.
4 Ay jayvan̈ ebꞌ israel ix acꞌanoch Cristo dꞌa scꞌool.
Yuj chiꞌ ix och ebꞌ yetbꞌeyumoc vin̈aj Pablo yedꞌ vin̈aj Silas chiꞌ.
Tzijtum ebꞌ griego ochnac dꞌa scꞌaybꞌubꞌal ebꞌ israel ix acꞌanpaxoch dꞌa scꞌool.
Tzijtum pax ebꞌ ix ix ojtacabꞌil yuj ebꞌ anima ix acꞌanoch dꞌa scꞌool.
5 Palta axo ebꞌ israel maj acꞌanochlaj dꞌa scꞌool,
ayic ix yilan ebꞌ,
ix te cot yoval ebꞌ.
Ix smolbꞌan juntzan̈ ebꞌ chuc spensar ebꞌ.
A ebꞌ chiꞌ,
an̈ej chucal tzecꞌ sayecꞌ ebꞌ dꞌa yol chon̈abꞌ chiꞌ.
Ix lajvi yacꞌji scꞌool ebꞌ yuj ebꞌ,
ix ecꞌ smolbꞌan ebꞌ anima ebꞌ smasanil.
Ix qꞌue somnaj ebꞌ anima chiꞌ ste cot yoval.
Ix yacꞌan yip ebꞌ yecanoch sbꞌa dꞌa yol spat jun vin̈ scuch Jasón,
yujto a snaan ebꞌ to ataꞌ ayecꞌ vin̈aj Pablo yedꞌ vin̈aj Silas chiꞌ,
yujto sgana ebꞌ syiqꞌuelta ebꞌ vin̈ yic syacꞌanoch ebꞌ vin̈ ebꞌ dꞌa yichan̈ ebꞌ chon̈abꞌ.
6 Palta malaj ebꞌ vin̈ ayecꞌ dꞌa yol pat chiꞌ.
Yuj chiꞌ,
ix syam vin̈aj Jasón ebꞌ yedꞌ jayvan̈xo ebꞌ creyente.
Ix icꞌjibꞌat ebꞌ yuj ebꞌ vin̈ dꞌa ebꞌ vin̈ yajal.
Axo taꞌ ix yal chaan̈ ebꞌ:
—A vin̈aj Pablo yedꞌ vin̈aj Silas,
tzꞌecꞌ ebꞌ vin̈ yacꞌ somchajel ebꞌ anima dꞌa yolyibꞌan̈qꞌuinal tic.
Axo ticnaic ix ja ebꞌ vin̈ dꞌayon̈.
7 A vin̈aj Jasón tic ix chaanoch ebꞌ vin̈ dꞌa yol spat.
A ebꞌ vin̈ tic toxon max scꞌanabꞌajej sley vin̈ cajal dꞌa Roma ebꞌ vin̈,
yujto syal ebꞌ vin̈ to ay junxo rey scuchan Jesús,
xchi ebꞌ dꞌa ebꞌ vin̈ yajal chiꞌ.
8 Ayic ix yabꞌan jun chiꞌ ebꞌ vin̈ yajal yedꞌ ebꞌ chon̈abꞌ chiꞌ,
ix qꞌue somnaj ebꞌ scot yoval.
9 Axo qꞌuen tumin ix scꞌan ebꞌ yajal chiꞌ dꞌa vin̈aj Jasón yedꞌ dꞌa ebꞌ ajun yedꞌ vin̈ chiꞌ.
Ichato chiꞌ,
ix actajel ebꞌ.
Ecꞌnac vin̈aj Pablo yedꞌ vin̈aj Silas dꞌa Berea
10 Axo yic ix qꞌuicꞌbꞌi,
ix checjibꞌat vin̈aj Pablo yedꞌ vin̈aj Silas chiꞌ yuj ebꞌ creyente dꞌa chon̈abꞌ Berea.
Axo ix cꞌoch ebꞌ vin̈ taꞌ,
ix och ebꞌ vin̈ dꞌa yol spatil culto.
11 A ebꞌ israel aj Berea chiꞌ más vachꞌ spensar ebꞌ dꞌa yichan̈ ebꞌ aj Tesalónica chiꞌ,
yujto ix smaclej val yabꞌ slolonel Dios ebꞌ.
Axo dꞌa junjun cꞌu,
scꞌaybꞌan ebꞌ tas tzꞌibꞌabꞌilcan dꞌa Slolonel Dios yic syil ebꞌ tato yel syal vin̈aj Pablo chiꞌ.
12 Yuj chiꞌ tzijtum ebꞌ israel yedꞌ ebꞌ griego ix acꞌanoch Cristo dꞌa scꞌool.
A dꞌa scal ebꞌ chiꞌ ay ebꞌ ix ix ojtacabꞌil yuj ebꞌ anima yedꞌ pax ebꞌ vin̈ vinac.
13 Palta axo ebꞌ israel aj Tesalónica,
ayic ix yabꞌan ebꞌ to van yalanel slolonel Dios vin̈aj Pablo dꞌa Berea chiꞌ,
ix bꞌat ebꞌ taꞌ.
Ayic ix cꞌoch ebꞌ,
ix yacꞌqꞌue somnaj ebꞌ chon̈abꞌ chiꞌ ebꞌ scot yoval.
14 Palta elan̈chamel ix checjibꞌat vin̈aj Pablo chiꞌ dꞌa stiꞌ aꞌ mar yuj ebꞌ creyente.
Axo vin̈aj Silas yedꞌ vin̈aj Timoteo ix can ebꞌ vin̈ dꞌa chon̈abꞌ Berea chiꞌ.
15 A ebꞌ creyente ix bꞌat yedꞌ vin̈aj Pablo chiꞌ,
ix bꞌatn̈ej ebꞌ yedꞌ vin̈ masanto dꞌa chon̈abꞌ Atenas.*
Ayic ix cꞌoch ebꞌ taꞌ ix yalan vin̈ dꞌa ebꞌ:
—Tzeyal dꞌa vin̈aj Silas yedꞌ dꞌa vin̈aj Timoteo to scot ebꞌ vin̈ dꞌa elan̈chamel,
xchi vin̈ dꞌa ebꞌ.
Ix lajvi chiꞌ ix meltzajxi ebꞌ.
Ayecꞌ vin̈aj Pablo dꞌa Atenas
16 Ayic van stan̈van vin̈aj Pablo scꞌoch vin̈aj Silas yedꞌ vin̈aj Timoteo chiꞌ dꞌa chon̈abꞌ Atenas,
ix yilan vin̈,
man̈ jantacoc juntzan̈ tas syaloch ebꞌ anima sdiosaloc.
Yuj chiꞌ ix te cus vin̈ yilani.
17 Ichato chiꞌ ix och vin̈ dꞌa yol spatil culto.
Ix stelan sbꞌa vin̈ yedꞌ ebꞌ israel yedꞌ ebꞌ ochnac dꞌa scꞌaybꞌubꞌal ebꞌ.
Axo dꞌa junjun cꞌu ix laj yalubꞌtan̈ej pax vin̈ yedꞌ ebꞌ anima ayecꞌ dꞌa mercado.
18 Ay juntzan̈ ebꞌ vin̈ vinac te jelan scꞌaybꞌan sjelanil ebꞌ scuch epicúreo yedꞌ juntzan̈ ebꞌ scuch estoico.*
Ix och ijan ebꞌ vin̈ slolon yedꞌ vin̈aj Pablo chiꞌ.
Axo nan̈alxo ebꞌ vin̈ ix alubꞌtan̈an icha tic:
—A jun vin̈ te jelan slolon tic,
¿tastaxlaj ol yal vin̈ dꞌayon̈?
xchi ebꞌ vin̈.
Axo juntzan̈xo ebꞌ vin̈ ix alan icha tic:
—A co naani to tzul yal yabꞌixal juntzan̈xo chꞌoc diosal vin̈,
xchi ebꞌ vin̈.
Icha chiꞌ ix aj yalan ebꞌ vin̈ yujto ix yalel yabꞌixal Jesucristo vin̈aj Pablo chiꞌ.
Ix yalanpax vin̈ to ol pitzvocxi ebꞌ chamnac.
19 Axo ebꞌ vin̈ jelan chiꞌ ix icꞌanbꞌat vin̈aj Pablo chiꞌ dꞌa jun yuneꞌ tzalan scuch Areópago,
aton jun bꞌaj smolbꞌejtaxon sbꞌa ebꞌ vin̈ yic syacꞌan slajtiꞌ ebꞌ vin̈.
Ayic ix cꞌoch ebꞌ vin̈ taꞌ ix scꞌanbꞌan ebꞌ vin̈ dꞌa vin̈:
—A jun acꞌ cꞌaybꞌubꞌal tzalel tic,
¿tzam yal cabꞌan smasanil?
20 Yujto manta bꞌaj scabꞌ juntzan̈ tic,
yuj chiꞌ co gana scojtaquejeli tas syalelcꞌochi,
xchi ebꞌ vin̈ dꞌa vin̈.
21 Icha chiꞌ ix aj yalan ebꞌ yujto masanil ebꞌ anima dꞌa Atenas chiꞌ yedꞌ pax ebꞌ chꞌoc chon̈abꞌil ayecꞌ taꞌ,
chꞌoc smodo ebꞌ.
Tato ay junoc acꞌ cꞌaybꞌubꞌal tzꞌalji,
sgana ebꞌ syabꞌ smasanil,
syalan paxel ebꞌ junelxo.
An̈ej taꞌ syacꞌoch spensar ebꞌ.
22 Axo vin̈aj Pablo chiꞌ,
ix qꞌue lin̈an vin̈ dꞌa scal ebꞌ dꞌa Areópago chiꞌ,
ix yalan vin̈:
—Ex yajal dꞌa Atenas tic,
ix vilaꞌ to te ay val och e pensar dꞌa juntzan̈ e diosal.
23 Yujto ayic ix in bꞌeyecꞌ dꞌa yol e chon̈abꞌ tic,
ix in ecꞌ vil bꞌajtac slaj eyaqꞌuem e bꞌa dꞌa juntzan̈ e diosal chiꞌ.
Ix vilan pax jun sbꞌachnubꞌ silabꞌ bꞌajtil tzꞌibꞌabꞌilcan och eyuj icha tic:
A dꞌa tic scaqꞌuem co bꞌa dꞌa jun Dios man̈ ojtacabꞌiloc,
xchi.*
A jun Dios chiꞌ,
nivanoc tzeyaqꞌuem e bꞌa dꞌay,
palta man̈ eyojtacoc.
Aton jun Dios chiꞌ tzul val yabꞌixal dꞌayex.
24 A jun Dios sval tic,
a bꞌojinac yolyibꞌan̈qꞌuinal tic yedꞌ masanil tas ay dꞌay.
Aton yajal yaj dꞌa satchaan̈,
yajal pax yaj dꞌa yolyibꞌan̈qꞌuinal tic.
A jun Dios chiꞌ,
max cajnaj dꞌa junoc pat bꞌobꞌil yuj ebꞌ anima.
25 Man̈ yovaliloc ay tas tzꞌacꞌji dꞌay yuj ebꞌ anima.
Yujto aton tzꞌacꞌan co qꞌuinal co masanil.
A tzꞌacꞌan quicꞌ quicꞌ,
a tzꞌacꞌanpax masanil tas ay dꞌayon̈.
26 Aton bꞌojinac jun vin̈ bꞌabꞌel vinac ochnac smam yichamoc junjun nación,
yic ayn̈ej anima dꞌa masanil sat luum tic.
A tzꞌalani jantac tiempoal tzꞌecꞌ junjun nación.
A tzꞌalanpaxi bꞌajtil scꞌoch cꞌaman smacbꞌen junjun.
27 Icha chiꞌ syutej yic vachꞌ tzꞌilchaj yuj ebꞌ anima.
Vachꞌchom ton̈ej tzꞌecꞌ machmon ebꞌ sayeqꞌui yic tope val tzꞌilchaj yuj ebꞌ.
Palta sval dꞌayex,
man̈ najatoc ayecꞌ Dios chiꞌ.
Lacꞌan ayecꞌ dꞌa co tzꞌey junjun on̈.
28 Yel,
yujn̈ej Dios chiꞌ pitzan on̈.
Yuuj ay co qꞌuinal.
Yuuj ay on̈ ecꞌ dꞌa yolyibꞌan̈qꞌuinal tic.
Ay juntzan̈ ebꞌ eyetchon̈abꞌ jelan sloloni.
Syalan ebꞌ icha tic:
Yuninal on̈ Dios co masanil,
xchi ebꞌ.
29 Yel ton syal ebꞌ,
yuninal on̈ Dios.
Yuj chiꞌ man̈xo smojoc sco naꞌa to Dios juntzan̈ yechel bꞌobꞌil tic yedꞌ qꞌuen oro,
qꞌuen plata yedꞌ juntzan̈xo qꞌuen qꞌueen.
A juntzan̈ yechel tic yujn̈ej sjelanil ebꞌ anima sbꞌoi.
30 A dꞌa pecaꞌ man̈ yojtacoc ebꞌ anima chajtil yaj Dios.
Yuj chiꞌ nivan yutejnac scꞌool dꞌa ebꞌ.
Palta a tzꞌalan ticnaic to yovalil sna sbꞌa ebꞌ anima smasanil dꞌa yolyibꞌan̈qꞌuinal tic.
31 Yujto yalnaccani to ay jun cꞌual ol schꞌolbꞌitej tas yaj ebꞌ anima smasanil.
Tojol ol yutoc schꞌolbꞌitan tas yaj ebꞌ,
icha tas tzꞌel scꞌulan junjun ebꞌ.
Axo jun sicꞌbꞌilcanel yuuj,
aton jun chiꞌ ol chꞌolbꞌitan tas yaj ebꞌ.
Ix schꞌox Dios dꞌa ebꞌ anima smasanil to te yel jun tic ayic ix icꞌjiqꞌue vaan jun sicꞌbꞌilcanel yuuj chiꞌ dꞌa scal ebꞌ chamnac,
xchi vin̈aj Pablo chiꞌ dꞌa ebꞌ.
32 Palta ayic ix yabꞌan ebꞌ to ol pitzvocxi ebꞌ chamnac,
ay ebꞌ ix laj bꞌuchvaj dꞌa vin̈.
Palta ay juntzan̈xo ebꞌ ix alani:
—Olto co cꞌanbꞌejxi cabꞌ juntzan̈ tic dꞌayach,
xchi ebꞌ vin̈ dꞌa vin̈.
33 Ix lajvi yalan juntzan̈ chiꞌ ebꞌ,
ix el vin̈ dꞌa scal ebꞌ.
34 Palta ay jayvan̈ ebꞌ ix acꞌanoch Cristo dꞌa scꞌool.
Ix och ebꞌ yetbꞌeyumoc vin̈aj Pablo chiꞌ.
A dꞌa scal ebꞌ chiꞌ,
ataꞌ ayecꞌ vin̈aj Dionisio,
vin̈ yetyajalil sbꞌa yedꞌ ebꞌ smolbꞌej sbꞌa dꞌa Areópago chiꞌ.
Ay pax jun ix ix scuchan Dámaris yedꞌ juntzan̈xo ebꞌ.