A jun cꞌumlajbꞌail ochnac dꞌa Jerusalén
15
A dꞌa yic jun tiempoal chiꞌ,
ay juntzan̈ ebꞌ vin̈ ix cot dꞌa yol yic Judea,
ix cꞌoch ebꞌ vin̈ dꞌa chon̈abꞌ Antioquía.
Ix och ijan ebꞌ vin̈ yalan dꞌa ebꞌ creyente icha tic:
—Tato maj e cha jun yechel circuncisión dꞌa e nivanil,
icha yalnaccan vin̈aj Moisés,
man̈ ol ex colchajlaj,
xchi ebꞌ vin̈.
2 Axo vin̈aj Pablo yedꞌ vin̈aj Bernabé,
ix stelaj sbꞌa ebꞌ vin̈ yedꞌ ebꞌ vin̈,
palta maj bꞌolaj yaj yuj ebꞌ vin̈.
Yuj chiꞌ ix yal ebꞌ creyente to sbꞌat ebꞌ vin̈ chavan̈ chiꞌ dꞌa Jerusalén.
Sbꞌatpax juntzan̈xo ebꞌ creyente yedꞌ ebꞌ vin̈.
Ix bꞌat ebꞌ scꞌanbꞌej razón dꞌa ebꞌ vin̈ schecabꞌ Jesús yedꞌ dꞌa ebꞌ vin̈ anciano dꞌa jun iglesia chiꞌ.
3 Ix lajvi schecjibꞌat ebꞌ vin̈ yuj ebꞌ creyente chiꞌ,
ix ecꞌ ebꞌ vin̈ dꞌa yol yic Fenicia yedꞌ dꞌa Samaria.
Ataꞌ ix ecꞌ ebꞌ vin̈ yalel dꞌa ebꞌ creyente to ay ebꞌ man̈ israeloc ix sqꞌuex sbꞌeybꞌal,
ix yacꞌanoch spensar ebꞌ dꞌa Dios.
A ix yabꞌan jun chiꞌ ebꞌ creyente,
ix te tzalaj ebꞌ smasanil.
4 Ayic ix cꞌoch ebꞌ vin̈ dꞌa Jerusalén chiꞌ,
ix chaji scꞌoch ebꞌ vin̈ yuj ebꞌ creyente smasanil,
ebꞌ vin̈ schecabꞌ Jesús yedꞌ ebꞌ vin̈ anciano.
Ix laj yalan ebꞌ vin̈ jantac tas ix scꞌulej Dios yedꞌ ebꞌ vin̈.
5 Palta ay jayvan̈ ebꞌ vin̈ fariseo acꞌannacoch Cristo dꞌa scꞌool.
Ix qꞌue van ebꞌ vin̈,
ix yalan ebꞌ vin̈ icha tic:
—A ebꞌ man̈ israeloc tzꞌacꞌanoch Cristo dꞌa scꞌool,
yovalil tzꞌacꞌji circuncidar ebꞌ.
Yovalil scal dꞌa ebꞌ to scꞌanabꞌajej ley Moisés ebꞌ,
xchi ebꞌ vin̈.
6 Axo ebꞌ vin̈ schecabꞌ Jesús,
ix smolbꞌej sbꞌa ebꞌ vin̈ yedꞌ ebꞌ vin̈ anciano yic snaan ebꞌ vin̈ tas tzꞌaj jun chiꞌ.
7 Axo ix lajvi ste telan sbꞌa ebꞌ vin̈,
ix qꞌue lin̈an vin̈aj Pedro,
ix yalan vin̈:
—Ex vucꞌtac,
eyojtactaxoni,
ayxo stiempoal in sicꞌjicanel yuj Dios yic svalanel vachꞌ abꞌix yic colnabꞌil dꞌa ebꞌ man̈ israeloc,
yic vachꞌ syacꞌoch Cristo ebꞌ dꞌa scꞌool.
8 Yujto yojtac Dios tas ay dꞌa spensar junjun anima,
yuj chiꞌ ix yacꞌ Yespíritu dꞌa ebꞌ man̈ israeloc chiꞌ,
icha ix yutej yacꞌan dꞌayon̈,
yic scheclaji to vachꞌ ebꞌ dꞌa yichan̈.
9 A dꞌa yichan̈ Dios lajann̈ej ebꞌ quedꞌoc,
yujto aꞌ ix tojolbꞌitan sbꞌeybꞌal ebꞌ ayic ix yacꞌanoch Cristo ebꞌ dꞌa scꞌool.
10 A ticnaic,
¿tas yuj malaj e gana tze cha tas van scꞌulan Dios?
A ley Moisés,
lajan yedꞌ junoc icatz te al max qꞌue co cuchani.
Maj techaj scꞌanabꞌajan ebꞌ co mam quicham.
An̈ejtonaꞌ,
max techaj pax co cꞌanabꞌajan a on̈ tic.
Yuj chiꞌ,
¿tas yuj e gana tzeyacꞌoch jun chiꞌ dꞌa yibꞌan̈ ebꞌ creyente man̈ israeloc?
11 Man̈ e cꞌulej jun chiꞌ,
yujto cojtac to yujn̈ej svachꞌcꞌolal Cajal Jesús tzon̈ colchaji.
An̈ejtonaꞌ,
icha pax chiꞌ ebꞌ man̈ israeloc chiꞌ,
xchi vin̈aj Pedro chiꞌ.
12 A ix yabꞌan juntzan̈ chiꞌ ebꞌ,
ix em numnaj ebꞌ smasanil.
Ix lajvi chiꞌ,
ix smaclan yabꞌ ebꞌ tas syal vin̈aj Bernabé yedꞌ vin̈aj Pablo.
Ix yalan ebꞌ vin̈ to tzijtum milagro ix sbꞌo Dios,
ayic ix ecꞌ ebꞌ vin̈ dꞌa scal ebꞌ man̈ israeloc.
13 Ayic ix lajvi yalan juntzan̈ chiꞌ ebꞌ vin̈,
ix yalan vin̈aj Jacobo icha tic:
—Ex vucꞌtac,
abꞌec tas ol val dꞌayex.
14 Ix yal vin̈aj Simón Pedro dꞌayon̈ tas ix aj yel yich schꞌoxan svachꞌil Dios dꞌa ebꞌ man̈ israeloc.
Ix sicꞌjielta jayvan̈ ebꞌ yic vachꞌ tzꞌoch ebꞌ yicoc.
15 A jun ix uji tic,
lajan icha tas tzꞌibꞌabꞌilcan yuj ebꞌ schecabꞌ Dios dꞌa pecaꞌ,
aton bꞌaj syal icha tic:
16 A dꞌa yic junxo tiempoal ol in jaxoc.
Ol ul vacꞌancanpaxoch jun yin̈til vin̈aj rey David sqꞌuexuloc dꞌa yopisio.
Yujto icha junoc pat ix em lan̈najoc,
icha chiꞌ ajnaccan yopisio vin̈ chiꞌ.
Palta ol in bꞌoqꞌue junelxo,
17 yic vachꞌ a ebꞌ man̈ israeloc ol yacꞌoch spensar ebꞌ dꞌayin,
a in Yajal in,
aton jantac ebꞌ vic sicꞌbꞌiltaxonel vuuj dꞌa junjun nación.
18 Icha chiꞌ yutejnac Dios Cajal yalani.
A acꞌjinac cojtaquejel juntzan̈ tic yictax dꞌa pecaꞌ,
xchi dꞌa Slolonel Dios Tzꞌibꞌabꞌilcani.
19 Yuj chiꞌ tzin na a in tic,
max yal cacꞌanoch junoc icatz ajaltac dꞌa yibꞌan̈ ebꞌ man̈ israeloc van yacꞌanoch spensar dꞌa Dios.
20 An̈ejocabꞌ co carta scacꞌbꞌat dꞌa ebꞌ,
scalanbꞌati to maxtzac schilaj ebꞌ juntzan̈ tas tzꞌacꞌji silabꞌoc dꞌa comon dios.
Maxtzac scꞌulej ajmulal ebꞌ.
Maxtzac schi schiqꞌuil nocꞌ nocꞌ ebꞌ.
Maxtzac schi nocꞌ nocꞌ ebꞌ sudꞌjichamoc yujto ayto schiqꞌuil nocꞌ.
21 Sval icha chiꞌ,
yujto atax dꞌa pecaꞌ ay ebꞌ tzꞌavtan ley Moisés dꞌa yoltac spatil culto.
An̈ejtonaꞌ ticnaic,
an̈ejaꞌ yalanel ebꞌ dꞌa junjun scꞌual icꞌoj ip,
xchi vin̈aj Jacobo chiꞌ dꞌa ebꞌ.
22 Yuj chiꞌ,
a ebꞌ vin̈ schecabꞌ Jesús yedꞌ ebꞌ vin̈ anciano ix smol alej ebꞌ vin̈ yedꞌ ebꞌ creyente smasanil.
Ix snaan ebꞌ to ol siqꞌuel jayvan̈oc ebꞌ creyente ebꞌ,
yic sbꞌat ebꞌ dꞌa chon̈abꞌ Antioquía yucꞌlevoc vin̈aj Pablo yedꞌ vin̈aj Bernabé.
Ix lajvi chiꞌ,
ix sicꞌchajel vin̈aj Judas,
scuchan pax Barsabás yedꞌ vin̈aj Silas yuj ebꞌ.
A chavan̈ ebꞌ vin̈ chiꞌ,
chequel yaj ebꞌ vin̈ dꞌa yichan̈ ebꞌ creyente.
23 Ix checjibꞌat ebꞌ vin̈ yacꞌ jun carta chiꞌ.
Axo dꞌa yol chꞌan̈ carta chiꞌ,
icha tic tas ix yal ebꞌ:
A on̈ schecabꞌ on̈ Jesús,
ebꞌ anciano yedꞌ ebꞌ creyente smasanil,
tic scacꞌbꞌat stzatzil e cꞌool a ex man̈ ex israeloc dꞌa chon̈abꞌ Antioquía,
dꞌa yol yic Siria yedꞌ dꞌa Cilicia.
24 Ix cabꞌi to ay juntzan̈ ebꞌ munil ix bꞌat dꞌa co cal,
ix cꞌoch ebꞌ dꞌayex.
Palta man̈oc on̈ ix co checbꞌat ebꞌ.
Ix cabꞌi to tzex ixtax yuj tas syal ebꞌ dꞌayex taꞌ,
to ijan somchajel e pensar yuj ebꞌ.
25 Yuj chiꞌ ix co mol alej,
ix co sicꞌanel jayvan̈ ebꞌ vin̈ dꞌa co cal tic,
yic sbꞌat ebꞌ vin̈ dꞌayex taꞌ.
Junn̈ej ol bꞌat ebꞌ vin̈ yedꞌ vin̈ cucꞌtac aj Bernabé yedꞌ vin̈ cucꞌtac aj Pablo.
A ebꞌ vin̈ tic,
xajanabꞌil ebꞌ vin̈ cuuj.
26 Toxo ix yacꞌoch sbꞌa ebꞌ vin̈ dꞌa yol scꞌabꞌ yaelal yuj Cajal Jesucristo.
Ay bꞌaj ijan ix miljicham ebꞌ vin̈.
27 Axo vin̈aj Judas yedꞌ vin̈aj Silas tic,
aton ebꞌ vin̈ sco checbꞌat dꞌayex.
Ol bꞌat yal ebꞌ vin̈ dꞌayex dꞌa val sjichanil,
tas ix co cꞌulej dꞌa tic.
28 Sco naꞌa,
to man̈ nivanoc co checnabꞌil scalbꞌat dꞌayex.
Icha chiꞌ sna pax Yespíritu Dios quedꞌoc.
Yuj chiꞌ,
a juntzan̈ checnabꞌil scalbꞌat tic dꞌayex,
an̈ej val yovalil tze cꞌanabꞌajej taꞌ:
29 Man̈ e chi nocꞌ chibꞌej tzꞌacꞌjioch silabꞌoc dꞌa juntzan̈ comon dios.
Man̈ e chi schiqꞌuil nocꞌ nocꞌ.
Man̈ e chi nocꞌ nocꞌ ton̈ej sudꞌjichamoc.
Man̈ e cꞌulej ajmulal.
Tato tze cꞌanabꞌajej juntzan̈ tic,
vachꞌ ol eyutoc e bꞌa.
An̈ej jay bꞌelan̈ tic scalbꞌat dꞌayex.
30 A ebꞌ vin̈ ix checjibꞌat chiꞌ,
ix bꞌat ebꞌ vin̈ dꞌa chon̈abꞌ Antioquía.
Ayic ix cꞌoch ebꞌ vin̈,
ix smolbꞌej ebꞌ creyente chiꞌ ebꞌ vin̈ smasanil.
Ix yacꞌan entregar chꞌan̈ carta chiꞌ ebꞌ vin̈.
31 Ayic ix yavtan chꞌan̈ ebꞌ creyente chiꞌ,
ix te tzalaj ebꞌ,
yujto ix acꞌji snivanil scꞌool ebꞌ yuj chꞌan̈.
32 Axo vin̈aj Judas yedꞌ vin̈aj Silas chiꞌ,
aton ebꞌ vin̈ yalumalel slolonel Dios,
ix yacꞌ snivanil scꞌool ebꞌ creyente ebꞌ vin̈.
Tzijtum tas ix yal ebꞌ vin̈ dꞌa scal ebꞌ,
ix yacꞌancan stecꞌanil ebꞌ creyente chiꞌ ebꞌ vin̈.
33-34 Ix lajvi yecꞌ jayeꞌ cꞌual ebꞌ vin̈ taꞌ,
ix stacꞌlancan sbꞌa ebꞌ vin̈ yedꞌ ebꞌ creyente chiꞌ.
Juncꞌolal ix meltzaj ebꞌ vin̈ bꞌaj aycan ebꞌ vin̈ checancot ebꞌ vin̈ chiꞌ.
35 An̈ejtonaꞌ,
vin̈aj Pablo yedꞌ vin̈aj Bernabé,
ix can ebꞌ vin̈ dꞌa jun chon̈abꞌ chiꞌ.
Ix scꞌaybꞌej ebꞌ creyente ebꞌ vin̈.
Tzijtum pax ebꞌ ix cꞌaybꞌan ebꞌ yedꞌ ebꞌ vin̈ taꞌ.
Ix yalanel slolonel Cajal Jesús ebꞌ vin̈.
Ix bꞌatxi vin̈aj Pablo yalel slolonel Dios
36 Axo ix ecꞌbꞌat jayexo semana,
ix yalan vin̈aj Pablo dꞌa vin̈aj Bernabé chiꞌ:
—Con̈,
bꞌat quil ebꞌ creyente dꞌa junjun chon̈abꞌ bꞌajtac ecꞌnac on̈ calel slolonel Cajal Jesús.
Bꞌat quilxi ebꞌ,
tato an̈ejaꞌ tecꞌan ebꞌ,
xchi vin̈.
37 Axo vin̈aj Bernabé chiꞌ,
sgana vin̈ syicꞌbꞌat vin̈aj Juan Marcos.
38 Palta ix sna vin̈aj Pablo chiꞌ to man̈ smojoc sbꞌat vin̈ yedꞌ ebꞌ vin̈,
yujto actajcan ebꞌ vin̈ yuj vin̈ junel dꞌa yol yic Panfilia.
Maj yacꞌ lajvoc yopisio vin̈ smunlaj yedꞌ ebꞌ vin̈.
39 Ix stelaj sbꞌa ebꞌ vin̈ yuj vin̈.
Palta maj scha sbꞌa yalan ebꞌ vin̈.
Yuj chiꞌ chꞌocchꞌoc bꞌaj ix bꞌatcan ebꞌ vin̈.
A vin̈aj Bernabé chiꞌ ix och vin̈ dꞌa yol barco.
Ix bꞌatcan vin̈ dꞌa yol yic Chipre.
Ix yicꞌanbꞌat vin̈aj Marcos chiꞌ vin̈ yedꞌoc.
40 Axo vin̈aj Pablo ix sicꞌanelta vin̈aj Silas dꞌa scal ebꞌ creyente,
yic sbꞌat vin̈ yedꞌoc.
Axo ebꞌ creyente chiꞌ,
ix scꞌan svachꞌcꞌolal Dios ebꞌ dꞌa yibꞌan̈ ebꞌ vin̈.
Ix lajvi chiꞌ,
ix bꞌat ebꞌ vin̈.
41 Ix ecꞌ ebꞌ vin̈ dꞌa yol yic Siria yedꞌ dꞌa Cilicia.
Ix ecꞌ ebꞌ vin̈ yacꞌ stecꞌanil ebꞌ creyente dꞌa junjun iglesia.