2
Icha yajoch junoc stan̈vumal chon̈abꞌ, icha chiꞌ ol aj in tan̈van vabꞌ tas ol yal Jehová dꞌayin, yic snachajel vuuj tas ol yutej spacan tas ix in cꞌanbꞌej dꞌay, xin chi.A spac ix yacꞌ Jehová
2 Ix yalan Jehová dꞌayin icha tic: Tzꞌibꞌejcan juntzan̈ tas ol in chꞌox il tic dꞌa junoc lechan̈ lum tzꞌacbꞌil luum, yic a mach ol avtanoc, ol bꞌat yalel dꞌa elan̈chamel.
3 A jun tas van ilan tic, manto cꞌochlaj stiempoal yelcꞌochi, palta yovalil ol elcꞌochoc, man̈ esoclaj. Tan̈vej, vachꞌchom olto ebꞌoc, palta ol eln̈ejcꞌochoc.
4 Tzꞌibꞌej to a ebꞌ te chuc, te acꞌumtac syutej sbꞌa ebꞌ, palta a ebꞌ tojol sbꞌeybꞌal, ol ajn̈ej ecꞌ ebꞌ yujto tzin yacꞌoch ebꞌ dꞌa scꞌool, xchi Jehová.
A tas ol aj ebꞌ ixtum anima
5 A ebꞌ aj Babilonia te acꞌumtac ebꞌ, smusej sat ebꞌ anima ebꞌ icha an̈ an̈ smusan sat ebꞌ tzꞌucꞌani. Max och vaan ebꞌ sayan tas snibꞌej. Slaj smaccanecꞌ slum masanil nación ebꞌ. Lajan ebꞌ icha chamel, ma jul bꞌaj smucchaj ebꞌ chamnac max tzactzaj schaan ebꞌ chamnac chiꞌ.
6 Palta masanil ebꞌ anima dꞌa juntzan̈ nación tzꞌacꞌji ganar chiꞌ, ol bꞌuchvaj ebꞌ dꞌa ebꞌ chiꞌ, ol yalan ebꞌ icha tic: Obꞌiltac ex, yujto ix ex och bꞌeyumal yuj tastac man̈ eyicoc. ¿Bꞌaqꞌuin̈ ol eyactej e molbꞌanqꞌue bꞌulan masanil tas tze cha yuj eyixtan ebꞌ quetanimail? xcham ebꞌ.
7 Ex aj Babilonia, ayic man̈ naanoc eyuuj, ol cꞌoch ebꞌ van sqꞌuecan sbꞌoc chiꞌ dꞌayex, ol bꞌat ex xibꞌtej ebꞌ, masanil tastac ay dꞌayex ol yicꞌbꞌat ebꞌ, man̈xa jabꞌoc ol yactejcan ebꞌ.
8 Ix eyicꞌcanecꞌ tastac ay dꞌa ebꞌ anima dꞌa juntzan̈xo nación, palta a ebꞌ ixto cani, a ebꞌ ol icꞌanecꞌ tastac ay dꞌayex. Icha chiꞌ ol ex yutej ebꞌ, yujto tzijtum mach ix e milchamoc, maj ocꞌlaj jabꞌoc e cꞌool dꞌa ebꞌ anima dꞌa juntzan̈ nación chiꞌ yedꞌ dꞌa schon̈abꞌ ebꞌ.
9 Obꞌiltac ex, yujto ix e bꞌudꞌ e pat yuj masanil tas ix eyelqꞌuej chiꞌ, yic syal e colan e bꞌa dꞌa tas ay smay e naani.
10 Icha chiꞌ ix aj eyicꞌancot qꞌuixvelal dꞌa yibꞌan̈ e chon̈abꞌ chiꞌ. A ex ix eyicꞌcot dꞌa eyibꞌan̈, yujto tzijtum nación ix e sateli.
11 A ebꞌ ix bꞌoanoch yichtac e pat yedꞌ spatzabꞌil, ol avaj ebꞌ yuj yalan sbꞌa yuj syaelal munlajel ix sbꞌo chiꞌ.
12 Obꞌiltac ex sicꞌlabꞌil, ix laj e bꞌo e chon̈abꞌ yuj masanil tas ix eyacꞌ ganar dꞌa chucal ix e cꞌulej, ix ex qꞌuechaan̈ e milancham anima.
13 Masanil munlajel bꞌaj ix cꞌunbꞌi juntzan̈ nación ix eyacꞌ ganar chiꞌ, te nabꞌan̈ej. A cꞌacꞌ ol satanel masanil tas ix sbꞌo ebꞌ chiꞌ. Icha chiꞌ ix aj snaan Jehová Yajal dꞌa Smasanil.
14 Tzꞌacan ol aj yojtacajel stziquiquial Jehová yuj ebꞌ anima smasanil, icha tzꞌaj sbꞌudꞌjiel bꞌaj molanecꞌ aꞌ mar yuj a aꞌ.
15 Obꞌiltac ebꞌ tzꞌacꞌan an̈ an̈ yuqꞌuej ebꞌ yetanimail ay dꞌa slacꞌanil spat yic syil sqꞌuixvelal ebꞌ ebꞌ. Icha ex pax taꞌ a ex tic, obꞌiltac ex, yujto a yedꞌ yoval e cꞌol ix eyacꞌ qꞌuixvelal juntzan̈ nación ay dꞌa e lacꞌanil.
16 A ticnaic, man̈xo ol ex icꞌjocchaan̈, palta to ol iljoc e qꞌuixvelal, icha ix eyutej eyilan sqꞌuixvelal juntzan̈xo nación ayecꞌ dꞌa e lacꞌanil. A Jehová ol ex acꞌan qꞌuixvelal. Icha junoc ucꞌum an̈ tzꞌecꞌ yibꞌan̈ yucꞌan an̈, icha chiꞌ ol ex ajoc. Ol eyabꞌ syail yuj Jehová, icha yaelal ix eyacꞌoch dꞌa yibꞌan̈ juntzan̈xo nación. Yuj chiꞌ qꞌuixvelal ol ex ajcan yuj eyacꞌumtaquil.
17 A ex tic, ix e chꞌaquel teꞌ nivac teꞌ dꞌa Líbano, yuj chiꞌ a ticnaic, van eyabꞌan syail. Ix e milcham nocꞌ nocꞌ taꞌ, palta axo ticnaic a nocꞌ ol ex acꞌanoch dꞌa xivcꞌolal. Icha chiꞌ ol ex utajoc, yujto man̈ jantacoc anima ix e milchamoc. Man̈ jantacoc chucal ix eyacꞌoch dꞌa snación ebꞌ, dꞌa schon̈abꞌ ebꞌ yedꞌ dꞌa ebꞌ anima cajan dꞌa schon̈abꞌ ebꞌ chiꞌ.
18 Malaj vachꞌ yoch junoc comon dios sbꞌo ebꞌ anima. A juntzan̈ chiꞌ, ton̈ej tzex satbꞌeyecꞌ yuuj, max yal-laj sloloni. ¿Tas yuj a ebꞌ sbꞌoan chiꞌ syacꞌoch juntzan̈ sbꞌo ebꞌ chiꞌ yipoc scꞌool?
19 Obꞌiltac ex mach ex tzeyal icha tic dꞌa juntzan̈ yechel bꞌobꞌil dꞌa te teꞌ: Aqꞌuec el e vayan̈, xe chi dꞌa teꞌ. Qꞌuean̈ec lin̈an, xe chi pax dꞌa qꞌuen qꞌueen toxonton max lolonlaj. ¿Tom syal ex scuchbꞌan juntzan̈ chiꞌ? Vachꞌchom copopi yilji juntzan̈ chiꞌ yuj qꞌuen oro, ma yuj qꞌuen plata, palta malaj tas syal yuuj, yujto malaj spixan.
20 Palta a Jehová, ayecꞌ dꞌa yol stemplo yicn̈ej yaji, yuj chiꞌ numanocabꞌ tzꞌaj masanil tas ay dꞌa yolyibꞌan̈qꞌuinal tic dꞌa yichan̈.