A slesal vin̈aj Habacuc
3
Aton in lesal a in Habacuc in, schecabꞌ in Dios.2 Mamin Jehová, ayic svabꞌan yabꞌixal masanil tas a bꞌonac, ste sat in cꞌol yuuj. Bꞌo icha tas a bꞌonac dꞌa pecaꞌ chiꞌ dꞌa co tiempoal tic. Vachꞌchom dꞌa scal yoval a cꞌool, chꞌox oqꞌuelcꞌolal dꞌayon̈.
3 A Dios Axon̈ej Ochi, scot dꞌa lum tzalan Parán dꞌa yol yic Temán. Smacchajel masanil satchaan̈ yuj stziquiquial, axo masanil yolyibꞌan̈qꞌuinal tzꞌalan vachꞌ lolonel dꞌay.
4 Sjavi dꞌa scal stziquiquial. Tzꞌelta copoljoc cꞌacꞌ dꞌa yol scꞌabꞌ, schꞌoxanel spoder cꞌubꞌanel yuuj.
5 A ilya bꞌabꞌel sbꞌat yuuj, a dꞌa spatic tzacꞌan sbꞌat chamel.
6 Ayic tzꞌoch vaan, tzꞌibꞌxiqꞌue lum luum tic smasanil. Masanil juntzan̈ nación slaj ibꞌxiqꞌue yuj xivelal ayic tzꞌoch qꞌuelan dꞌa ebꞌ. A juntzan̈ lum vitz aytaxon dꞌa pecaꞌ, slaj qꞌue tamaljoc luum, slaj em lan̈aljoc luum. Yujto a Jehová van sbꞌoan icha tas sbꞌonac dꞌa pecaꞌ,
7 yuj chiꞌ svil yochcan ebꞌ anima cajan dꞌa chon̈abꞌ Cusán dꞌa ilcꞌolal. Svilpax yochcan ebꞌ cajan dꞌa chon̈abꞌ Madián dꞌa xivcꞌolal.
8 Mamin Jehová, man̈oc dꞌa aꞌ nivac aꞌ ix cot oval. Man̈oc pax dꞌa aꞌ mar ix cot yoval a cꞌool. Ayic ix ach bꞌat dꞌa oval yic tza satel ebꞌ ajcꞌool, ichato ix ach qꞌue dꞌa yibꞌan̈ a chej, mato ach qꞌue dꞌa yol a carruaje yic oval.
9 Ichato ix laj icꞌqꞌueta a jul-labꞌ dꞌa yol yedꞌtal, yic tzach julvaj yedꞌoc.
A aꞌ nivac aꞌ, ix teꞌ qꞌue aꞌ, ix el aꞌ dꞌa smelemal uuj.
10 Ayic ix a chꞌoxan a bꞌa, ix te ibꞌxiqꞌue lum nivac vitz, ix cot nivac yaxn̈abꞌ dꞌa satchaan̈, ix cꞌan̈ sqꞌue chulnaj aꞌ mar, ayxo smay ix aj sqꞌue vaan aꞌ ayic ix a chꞌoxan a bꞌa chiꞌ.
11 Ix och vaan cꞌu yedꞌ qꞌuen uj ayic copoljubꞌ yel scꞌacꞌal a jul-labꞌ yedꞌ a lanza ayic sbꞌati.
12 Yedꞌ yoval a cꞌool ix a tecꞌcanem lum luum tic. Yedꞌ pax a cꞌacꞌalcꞌolal ix a tecꞌcanem juntzan̈ nación.
13 Ix ach elta yic tzach colvaj dꞌa a chon̈abꞌ yedꞌ dꞌa vin̈ rey sicꞌbꞌilel uuj. Axo vin̈ yajalil ebꞌ anima te chuc, ix a tecꞌcanem vin̈. Ix a satel schon̈abꞌ vin̈, masanto ix checlaj yich.
14 A ebꞌ yajal yaj dꞌa scal ebꞌ ajcꞌol chiꞌ, a yedꞌ syamcꞌabꞌ ebꞌ yic oval, a yedꞌoc ix a milcham ebꞌ ayic ix ja ebꞌ dꞌayon̈ yic tzon̈ satanel ebꞌ yalani.
15 Ichato ix ach bꞌey dꞌa yibꞌan̈ aꞌ mar yedꞌ nocꞌ a chej, yuj chiꞌ ix qꞌue chulnaj aꞌ mar chiꞌ.
16 Ayic ix vabꞌan masanil tas ol javoc dꞌa quibꞌan̈, ix in xivqꞌuei. Ix ibꞌxiqꞌue in tiꞌ. Masanil in nivanil ix el yip, ix el pax yip in xubꞌ. Vachꞌchom icha chiꞌ ol ajoc, palta nivan ol vutoc in cꞌol in tan̈van jun cꞌual ayic ol javoc yaelal dꞌa yibꞌan̈ ebꞌ tzꞌacꞌan oval quedꞌoc.
17-18 Tzin te tzalaj val uuj ach Jehová in Columal, vachꞌchom man̈ ol xumacan teꞌ higo, man̈ ol satan teꞌ uva yedꞌ teꞌ olivo, man̈ ol yacꞌ sat tas tzꞌavchaji, vachꞌchom ol satel masanil nocꞌ calnel yedꞌ nocꞌ vacax dꞌa yol macteꞌ, palta ol valn̈ej vachꞌ lolonel dꞌayach.
19 Mamin Jehová, a ach tzacꞌ vip, tzacꞌan yip voc yic syal in bꞌey icha nocꞌ cꞌultaquil chej, tzin icꞌanqꞌue bꞌaj chaan̈, bꞌaj ol in colchajoc.
Bꞌitajocabꞌ jun bꞌit tic yuj vin̈ scuchbꞌan ebꞌ sbꞌitan yedꞌ juntzan̈ yamcꞌabꞌ ayoch schꞌan̈al.