A Slolonel Dios Dꞌa Vin̈aj
HABACUC
Ix yal vin̈aj Habacuc yuj tas man̈ tojoloc
1
Aton lolonel tic ix yal Jehová dꞌayin Habacuc in tic, a in ton schecabꞌ in.2 Ix val dꞌa Jehová icha tic: Mamin Jehová, ¿bꞌaqꞌuin̈to ol a cha abꞌ tas svalaꞌ? Ina jantac yel vav tzin cꞌanan a colval. ¿Tom man̈ ol ach colvaj dꞌayon̈? Jantac vavaj dꞌayach yuj ebꞌ anima sqꞌuechaan̈ yixtan ebꞌ anima dꞌa co cal tic.
3 ¿Tas yuj tzacꞌ vil juntzan̈ chucal scꞌulej ebꞌ anima yedꞌ juntzan̈ tas man̈ tojoloc scꞌulej ebꞌ? Axon̈ej chucal, miloj anima, oval yedꞌ telajbꞌail scꞌulej ebꞌ anima svilaꞌ.
4 Maxtzac yacꞌochlaj yopisio a ley ebꞌ yajal, maxtzac chꞌolbꞌitajlaj ebꞌ anima dꞌa stojolal. A ebꞌ vachꞌ sbꞌeybꞌal, tzꞌixtaj ebꞌ yuj ebꞌ scꞌulan chucal. Sqꞌuexan tojolal ebꞌ dꞌa chucal, xin chi dꞌay.
A spac syal Jehová
5 Ix tacꞌvi Jehová, ix yalan icha tic: Ilecnabꞌ juntzan̈xo nación, satocabꞌ e cꞌool, yujto toxo ix in naꞌ tas juntzan̈ ol in cꞌulej dꞌa e cal dꞌa jun tiempoal tic. Ayic ol ujoc juntzan̈ chiꞌ, vachꞌchom ay mach ol alan dꞌayex, palta ijan val man̈ ol e chalaj.
6 Ol vicꞌcot ebꞌ caldeo yic syacꞌ oval ebꞌ eyedꞌoc. A juntzan̈ anima chiꞌ, juneln̈ej malaj jabꞌoc yoqꞌuelcꞌolal ebꞌ. An̈ej oval sgana ebꞌ. Tzecꞌ yoymitej yolyibꞌan̈qꞌuinal tic ebꞌ yic syicancan lum luum ebꞌ man̈ yicoc.
7 A juntzan̈ anima chiꞌ, te ay smay ebꞌ, ste xiv ebꞌ anima dꞌa ebꞌ. Syicꞌvalchaan̈ sbꞌa ebꞌ. An̈ej dꞌa spensar ebꞌ scot tas snibꞌej scꞌulej, yujto nivan yelcꞌoch ebꞌ snaani.
8 Ecꞌto sjelanil sbꞌey nocꞌ schej ebꞌ dꞌa yichan̈ nocꞌ tzꞌibꞌchoj. Axo ebꞌ soldado ayqꞌue dꞌa yibꞌan̈ nocꞌ chej chiꞌ, ecꞌto te ov ebꞌ dꞌa yichan̈ nocꞌ oques tzꞌecꞌ dꞌacꞌvalil. Man̈xo bꞌischajbꞌenoc nocꞌ schej ebꞌ, najatto ay nocꞌ scot lemnaj nocꞌ dꞌa oval chiꞌ, icha nocꞌ chꞌacbꞌa ayic syaman schibꞌej nocꞌ.
9 Satcanel masanil tastac ebꞌ bꞌaj tzꞌeqꞌui, ste qꞌuechaan̈ xivcꞌolal yuj jantac tas scꞌulej ebꞌ. Icha sbꞌisul yarenail stiꞌ aꞌ mar, icha chiꞌ sbꞌisul ebꞌ anima syicꞌbꞌat ebꞌ dꞌa schon̈abꞌ.
10 Ton̈ej sbꞌuchvaj ebꞌ dꞌa ebꞌ rey yedꞌ dꞌa ebꞌ anima nivac yelcꞌoch yalani. Ton̈ej stzetzej juntzan̈ chon̈abꞌ ebꞌ ayoch smuroal. Sbꞌoqꞌue bꞌulan lum luum ebꞌ stecꞌnubꞌoc dꞌa spatictac juntzan̈ smuroal chiꞌ yic syacꞌ ganar juntzan̈ chon̈abꞌ chiꞌ ebꞌ.
11 Tzan̈ej yacꞌ ganar junoc chon̈abꞌ ebꞌ, sbꞌat ebꞌ dꞌa junxo. Icha yecꞌ chacxuxum icꞌ, icha chiꞌ yecꞌ ebꞌ. Tzꞌoch smul ebꞌ dꞌa vichan̈, yujto a yip ebꞌ syacꞌoch sdiosaloc, xchi Jehová.
A tas ix yalxi vin̈aj Habacuc
12 Ix valanxi icha tic: Mamin Jehová, Dios ach taxoni, tojol ach toni. Man̈ ol on̈ a cha satel dꞌa juneln̈ej. Ach Jehová co Columal, a ach ix acꞌ yip ebꞌ caldeo yuj acꞌanoch yaelal dꞌa quibꞌan̈.
13 A ach tic, man̈ jabꞌoc scha a cꞌol chucal, max a nibꞌej il co chucal a on̈ anima on̈ tic. Palta, ¿tas yuj ton̈ej tzach och qꞌuelan dꞌa ebꞌ anima te chuc chiꞌ? Ina a ebꞌ chuc van satanel ebꞌ vachꞌtacto sbꞌeybꞌal.
14 ¿Tas yuj icha nocꞌ chay ay dꞌa yol aꞌ mar tzon̈ utej a on̈ anima on̈ tic, ma icha nocꞌ nocꞌ malaj yajal tzon̈ utej?
15 A ebꞌ caldeo tzꞌicꞌanecꞌ juntzan̈xo nación, icha scꞌulej ebꞌ yamum chay ayic syaman nocꞌ chay ebꞌ yedꞌ qꞌuen anzuelo yedꞌ pax chꞌan̈ chimpa, axo yic syilan ebꞌ sqꞌueul bꞌulnaj nocꞌ chay chiꞌ, ste tzalaj ebꞌ.
16 Yuj chiꞌ, a ebꞌ yamum chay chiꞌ, tzꞌoch ebꞌ ejmelal dꞌa qꞌuen yanzuelo yedꞌ dꞌa schimpa, syacꞌan silabꞌ ebꞌ dꞌay, sn̈usanpax incienso ebꞌ dꞌa juntzan̈ syamcꞌabꞌ chiꞌ. Ste tzalaj ebꞌ yujto vachꞌ sva ebꞌ yuj syamcꞌabꞌ chiꞌ.
17 ¿Tom ol syamn̈ej juntzan̈ nación ebꞌ caldeo yedꞌ syamlabꞌ, yic satel ebꞌ anima ebꞌ dꞌa man̈xa oqꞌuelcꞌolal?