Habacuc sbꞌi jun libro tic, yujto a slolonel Dios yalnac dꞌa vin̈aj Habacuc tzꞌibꞌabꞌilcan dꞌay. Ayic satbꞌilxoel ebꞌ aj Asiria yuj ebꞌ aj Babilonia, ataꞌ syamoch ebꞌ yicꞌanecꞌ juntzan̈xo nación ayoch dꞌa yalan̈ smandar ebꞌ aj Asiria chiꞌ. A vin̈aj Nahum syal vin̈ tas ajnac chon̈abꞌ Nínive sateli. Axo vin̈aj Habacuc chiꞌ, tzꞌoch val vin̈ ilcꞌolal yuj chucal scꞌulej ebꞌ schon̈abꞌ Dios sicꞌbꞌilel yuuj. Scꞌanbꞌan vin̈aj Habacuc chiꞌ dꞌa Dios, jantac to val tiempo stechaj yilanoch ebꞌ anima chiꞌ yuj schucal. Yalan Dios to a ebꞌ aj Babilonia ol yacꞌlabꞌej yic ol yacꞌanoch syaelal ebꞌ schon̈abꞌ. Yuj chiꞌ scꞌanbꞌanpax vin̈aj Habacuc chiꞌ icha tic: ¿Tas yuj a juntzan̈ anima te chuc chiꞌ tzacꞌlabꞌej yic syacꞌanoch syaelal ebꞌ anima quenn̈ej val smul tic? xchi vin̈. Yuj chiꞌ spacanpax Dios dꞌa vin̈, yalani to yovalil ol yacꞌpaxoch syaelal ebꞌ aj Babilonia chiꞌ ayic ol javoc stiempoal. Yacbꞌan mantzac elcꞌoch jun chiꞌ, a ebꞌ scꞌanabꞌajan Dios, svachꞌ cꞌanabꞌajejocabꞌ ebꞌ, ayocabꞌ och Dios chiꞌ yipoc scꞌool ebꞌ. Axo dꞌa slajvubꞌ jun libro tic, ataꞌ syalaꞌ tas ol aj satjiel ebꞌ aj Babilonia chiꞌ. Aypaxoch jun bꞌit yic aloj vachꞌ lolonel dꞌa Dios yic sbꞌitaji. Syalanpaxi to a Dios ayoch yipoc scꞌol vin̈ schecabꞌ Dios chiꞌ, vachꞌchom ayecꞌ vin̈ dꞌa scal syaelal.