3
Obꞌiltac ex ex aj Nínive, ixtum anima ex, macꞌumcham anima ex paxi. Malaj slajvubꞌ tas elcꞌabꞌil eyuuj.2 A ticnaic, a dꞌa yol e chon̈abꞌ tzꞌabꞌchaj scꞌan̈ spajanoch stzꞌuum ebꞌ ajcꞌol dꞌa nocꞌ schej. N̈ilili scꞌan̈ carruaje, slaj qꞌue cheneljoc. Chꞌocxo scꞌan̈ yem yoc nocꞌ chej n̈erjinac carruaje chiꞌ.
3 Tzꞌilchaj yecꞌ nocꞌ chej. Toxon̈ej copoljubꞌ yecꞌ scꞌacꞌal qꞌuen espada tzꞌeqꞌui. Scopoljubꞌ yilji sn̈iꞌ qꞌuen lanza. Man̈xo bꞌischajbꞌenoc ebꞌ soldado schami. Toxon̈ej cuchcumbꞌa yajcan snivanil ebꞌ chamnac chiꞌ. Toxon̈ej sloc sbꞌa yoc ebꞌ anima dꞌay.
4 Icha chiꞌ ix aj sjavi yaelal dꞌa yibꞌan̈ e chon̈abꞌ, yujto ix ixtaj val juntzan̈xo chon̈abꞌ yuuj, icha junoc ix ajmul ix smontejoch ebꞌ vin̈ vinac dꞌa spatic, icha junoc ix ix te vachꞌ yilji te nibꞌabꞌil, icha chiꞌ ix yutej sbꞌa. A ebꞌ eyajalil, te jelan ebꞌ dꞌa ajbꞌaalil yedꞌ dꞌa montoj chon̈abꞌ yic syacꞌ yajalil ebꞌ dꞌa yibꞌan̈.
5 A Jehová Yajal dꞌa Smasanil tzꞌalan icha tic: Ayinoch ajcꞌolal dꞌayex ex aj Nínive. Ol in chꞌoxel sqꞌuixvelal e chon̈abꞌ dꞌa scal masanil nación. Icha tzꞌaj yicꞌchajel spichul junoc ix ajmul ix dꞌa yichan̈ anima yuj schꞌoxjiel sqꞌuixvelal,
6 sjulchajpaxoch masanil tas mictac dꞌa ix yic schꞌoxchaji to yajbꞌilel ix, icha chiꞌ ol aj in chꞌoxanel sqꞌuixvelal e chon̈abꞌ Nínive chiꞌ.
7 Masanil anima ol ilanoc, ol snitzel sbꞌa ebꞌ dꞌay, ol yalan ebꞌ icha tic: A chon̈abꞌ Nínive, toxo ix can tzꞌinan. ¿Machto ol ocꞌ scꞌol dꞌay? ¿Bꞌajto val ol quicꞌcot mach ol nivanan scꞌool? xcham ebꞌ.
8 ¿Tocval te ecꞌbꞌal stecꞌanil e chon̈abꞌ chiꞌ dꞌa yichan̈ chon̈abꞌ Tebas ay dꞌa stiꞌ aꞌ Nilo, aton jun oybꞌilqꞌue yuj aꞌ tzijtumal aꞌ? A aꞌ ayoch smuroaloc, aꞌ pax aꞌ ayoch scolnabꞌiloc.
9 Maxtzac bꞌischaj ebꞌ soldado yic Etiopía yedꞌ ebꞌ yic Egipto ix colvaj yedꞌoc. A ebꞌ aj Fut yedꞌ ebꞌ aj Libia ayoch ebꞌ yedꞌoc.
10 Palta, a ebꞌ aj Tebas chiꞌ, ix icꞌchajbꞌat ebꞌ dꞌa chꞌoc chon̈abꞌil. A ebꞌ yuninal ebꞌ, ix macꞌchaj vecchaj ebꞌ dꞌa schiquintac calle. Ix acꞌchajoch suerte dꞌa yibꞌan̈ ebꞌ nivac vinac cuchbꞌum dꞌa scal ebꞌ, yic tzꞌilchaji mach tzꞌican ebꞌ, ix ochpax qꞌuen cadena dꞌa ebꞌ.
11 Yedꞌ ex pax ex aj Nínive, icha ucꞌum an̈ ol ex ajcanoc. Ol eyacꞌlej e cꞌubꞌanel e bꞌa dꞌa ebꞌ eyajcꞌool, palta nabꞌan̈ej ol eyixtej e bꞌa, yovalil ol ex ilchajelta yuj ebꞌ.
12 Masanil e cuartel, lajan ol aj icha sat teꞌ higo qꞌuin̈xo cꞌun scot cꞌotoljoc, tato ay ebꞌ tzꞌucan teꞌ, bꞌexon̈ej sloanbꞌat sat teꞌ ebꞌ.
13 A ebꞌ e soldado, lajan ol aj ebꞌ icha ebꞌ ix ix. A bꞌe tzꞌoch dꞌa smuroal e chon̈abꞌ, jacanxon̈ej ol ajcan dꞌa ebꞌ eyajcꞌool, yujto ol tzꞌabꞌat spuertailtac.
14 Ex aj Nínive, ayocabꞌ aꞌ eyaal yic vachꞌ ol techaj taquin̈tial eyuuj ayic oyanoch ebꞌ ajcꞌol dꞌa spatic e chon̈abꞌ. Aqꞌuecoch yipumal e muro, ochan̈ec dꞌa tecꞌoj socꞌom, tzeyicꞌancot smoldeal lum ladrillo.
15 Vachꞌchom tze cꞌulej masanil juntzan̈ chiꞌ, palta ol ex chamoc. Ol ex n̈usjoctzꞌaoc, ol ex xicjoccham dꞌa qꞌuen espada. Ol ex satn̈ejeloc, icha tas avabꞌil slajviel yuj nocꞌ cꞌulubꞌ. Ix te qꞌuibꞌchaan̈ e bꞌisul icha nocꞌ cꞌulubꞌ, ma icha nocꞌ chil.
16 A ebꞌ e chon̈vajum, ix te qꞌuibꞌchaan̈ sbꞌisul ebꞌ, ecꞌto ix aj sbꞌisul ebꞌ dꞌa yichan̈ qꞌuen cꞌanal. Palta ayic syilan ebꞌ sjavi tas ay smay, tzꞌel lemnaj ebꞌ icha yel lemnaj nocꞌ cꞌulubꞌ.
17 A ebꞌ e soldado sicꞌbꞌileli, lajan ebꞌ icha junoc nivan uman̈ nocꞌ cꞌulubꞌ tzꞌochcan bꞌulan dꞌa sattac pat ayic ay sicn̈abꞌ, axo tzꞌel yoc cꞌu, sbꞌat jen̈eljoc nocꞌ. ¿Toc ayto mach ojtannac bꞌaj sbꞌat nocꞌ?
18 Ach sreyal Asiria, a ebꞌ stan̈vumal a chon̈abꞌ, vaynac ebꞌ. A ebꞌ ayoch dꞌa yopisio uuj, ton̈ej syicꞌ yip ebꞌ. A ebꞌ a soldado, sacleminac yajbꞌat ebꞌ dꞌa jolomtac vitz, ¿toc ayto mach syal smolbꞌan ebꞌ?
19 A jantac ix aj slajviem a chon̈abꞌ chiꞌ, man̈xalaj sbꞌonabꞌil. A yuj echen chiꞌ ol ach chamoc. Masanil ebꞌ ol abꞌan yabꞌixal tas ix ach icꞌani, toxon̈ej ol stzꞌit scꞌabꞌ ebꞌ yuj tzalajcꞌolal, yujto masanil mach ix abꞌan syail yuj a chucal chiꞌ, xchi Jehová.