Ol satel chon̈abꞌ Nínive
2
Ex aj Nínive, a mach ol ex sataneloc, vanxo sjavi dꞌayex. Qꞌueocabꞌ ebꞌ e tan̈vumal dꞌa chaan̈, maquec bꞌe. Tzeqꞌuecoch qꞌuen eyespada dꞌa e nan̈al. Molbꞌejec masanil ebꞌ e soldado.2 Vachꞌchom ix icꞌchajbꞌat tastac ay dꞌa ebꞌ israel yuj ebꞌ ajcꞌool, lajan ix ajcan ebꞌ icha teꞌ uva man̈xalaj scꞌabꞌtac, palta a Jehová ol icꞌanxichaan̈ snivanil yelcꞌoch ebꞌ yin̈tilal vin̈aj Jacob chiꞌ icha dꞌa yalan̈taxo.
3 A ebꞌ soldado ajcꞌol van scot dꞌayex, chacchac yilji smaclabꞌ jul-labꞌ ebꞌ yedꞌ spichul ayochi. Listaxo yaj ebꞌ yic syacꞌan oval. A scarruaje ebꞌ, toxon̈ej copopi yilji, maxtzac och vaan nocꞌ schej ebꞌ.
4 Jin̈in̈ixon̈ej yecꞌ ebꞌ yedꞌ scarruaje dꞌa yoltac calle, toxon̈ej tzꞌocꞌ yecꞌ ebꞌ yedꞌ scarruaje sveei icha junoc tas ayoch scꞌacꞌal dꞌa yol chon̈abꞌ, lajan yecꞌ ebꞌ icha yecꞌ lebꞌlon ayic smacꞌvaj cꞌu.
5 Syavtej ebꞌ soldado te tecꞌan vin̈ sreyal Nínive, toxon̈ej vanpichan scot ebꞌ. Sbꞌat lemnaj ebꞌ dꞌa smuroal schon̈abꞌ van sbꞌo bꞌaj scol sbꞌa ebꞌ.
6 Sjacchaj juntzan̈ puerta dꞌa stitac a aꞌ, tzꞌem vecnaj spalacio vin̈ rey chiꞌ.
7 Tzꞌicꞌchajcanbꞌat ix reina dꞌa preso, ajun ebꞌ ix schecabꞌ ix sbꞌatcan yedꞌoc. Junchel yocꞌ ebꞌ ix icha nocꞌ cuvajteꞌ, stan̈ubꞌtan̈an sn̈iꞌ scꞌol ebꞌ ix yuj cuselal.
8 Icha tzꞌaj yel a aꞌ bꞌaj molaneqꞌui, icha chiꞌ ol aj yel lemnaj masanil ebꞌ cajan dꞌa Nínive chiꞌ. Olto avtajcot ebꞌ, ol yalan ebꞌ tzꞌavtancot ebꞌ chiꞌ icha tic: Ochan̈ec vaan. Meltzajan̈ec, xcham ebꞌ. Palta man̈xalaj mach ol chaan yabꞌi.
9 Ol alchaj dꞌa ebꞌ ajcꞌool: Iqꞌuecbꞌat qꞌuen oro yedꞌ qꞌuen plata, yujto a sbꞌeyumal chon̈abꞌ Nínive yedꞌ tas vachꞌ yilji ay dꞌay, malaj sbꞌisul, xchama.
10 Toxo ix juchaj lajvoc Nínive, tzꞌinini ix ajcani. Tzꞌel val yip ebꞌ cajan dꞌay yuj xivelal. Toxon̈ej sluclon yoc ebꞌ smasanil. Man̈xalaj mach ay yip, sacxon̈ej yilji sat ebꞌ yuj xivelal.
11-12 A chon̈abꞌ Nínive, a dꞌa totoval tic, lajan icha sn̈aqꞌueen nocꞌ choj yedꞌ yuneꞌ. A nocꞌ choj yedꞌ yuneꞌ chiꞌ, vachꞌ yaj nocꞌ syabꞌi, stzalaj nocꞌ dꞌa sn̈aqꞌueen chiꞌ, malaj mach sxibꞌtan nocꞌ. Smilcham schibꞌej nocꞌ mam choj chiꞌ, spojanecꞌ nocꞌ dꞌa nocꞌ snun yedꞌ dꞌa nocꞌ yuneꞌ. Bꞌudꞌann̈ej yol sn̈aqꞌueen nocꞌ chiꞌ yuj chibꞌej dꞌa masanil tiempo, icha chiꞌ yaj Nínive chiꞌ, palta, ¿tas ix icꞌan ticnaic?
Ol satel Nínive dꞌa juneln̈ej
13 A Jehová Yajal dꞌa Smasanil ix alan icha tic: Ayinoch ajcꞌolal dꞌayex ex aj Nínive. Ol in n̈ustzꞌa e carruaje yic oval, tabꞌxon̈ej ol vutejcani. Ol in milcham masanil ebꞌ soldado, ol in satanel masanil tas elcꞌabꞌil eyuj ayecꞌ dꞌa e macbꞌen. Man̈xa bꞌaqꞌuin̈ ov ol yutej sbꞌa ebꞌ e checabꞌ sloloni, xchi Jehová.