A Slolonel Dios Dꞌa Vin̈aj
NAHUM
A spac yoval scꞌool Dios
1
A in Nahum in tic, aj chon̈abꞌ Elcos in, ix schꞌox Jehová dꞌayin schecabꞌ in tic tas ol javoc dꞌa yibꞌan̈ chon̈abꞌ Nínive.2 A Jehová Dios toni, spactzitej yedꞌ yoval scꞌol dꞌa ebꞌ tzꞌicꞌan ecꞌ yichan̈. Spactzitej dꞌa ebꞌ chuc syutej sbꞌa dꞌay, ste cotval yoval dꞌa ebꞌ ajcꞌool yajoch dꞌay.
3 A Jehová, man̈ cꞌunoc scot yoval, palta te ay spoder, yovalil syacꞌoch yaelal dꞌa yibꞌan̈ ebꞌ tzꞌoch smul. A dꞌa scal chacxuxum icꞌ sbꞌeyeqꞌui, axo asun, spococal yoc yaji.
4 A tzꞌalani stupem aꞌ mar. An̈ejaꞌ tzꞌacꞌanpax tup masanil a aꞌ. Stacjicanbꞌat masanil lum luum dꞌa Basán yedꞌ pax dꞌa vitzal Carmelo yuuj. Tzꞌixtaxpaxbꞌat yilji teꞌ xumaac dꞌa Líbano yuuj.
5 Tzꞌibꞌxiqꞌue lum vitz, tzꞌulaxpaxbꞌat lum tzalquixtac dꞌa yichan̈. Tzꞌibꞌxiqꞌue lum luum tic smasanil ayic schꞌoxan sbꞌa. Stzicubꞌtan̈aj yolyibꞌan̈qꞌuinal tic yedꞌ masanil anima yuuj.
6 ¿Mach syal stecꞌbꞌan sbꞌa dꞌa yichan̈ yoval scꞌool, ma syal scachanoch vaan yoval scꞌool chiꞌ? A yoval scꞌool chiꞌ, tzꞌem copnaj icha teꞌ cꞌacꞌ, spojbꞌat qꞌuen nivac qꞌueen yuuj.
7 Te vachꞌ scꞌol Jehová, a scolvaj dꞌayon̈ dꞌa scal co yaelal. A ebꞌ syacꞌoch scꞌol dꞌay, scolji ebꞌ yuuj.
8 Axo pax ebꞌ chuc syutej sbꞌa dꞌay jun, satjiel ebꞌ yuuj icha tzꞌaj scuchjibꞌat masanil tas yuj aꞌ elumaꞌ. Syacꞌcanbꞌat qꞌuicꞌalqꞌuinal dꞌa yibꞌan̈ ebꞌ ajcꞌol yajoch dꞌay.
9 Ex aj Nínive, ¿toc val ay yelcꞌoch jabꞌoc tas tze na dꞌa spatic Jehová? Aꞌ ol ex satanel dꞌa juneln̈ej. Malaj mach syal stecꞌbꞌan sbꞌa chaeloc dꞌa yichan̈.
10 Vachꞌchom te tecꞌan ex eyabꞌan icha ebꞌ ucꞌum an̈, ma ichato lajan ex icha teꞌ qꞌuiix jeljumbꞌa yaji, palta ol ex satel icha tzꞌaj stzꞌabꞌat an̈ taquin̈ ac.
11 A dꞌa e chon̈abꞌ Nínive chiꞌ, ataꞌ ay jun mach snaan chucal dꞌa spatic Jehová, aton jun acꞌum cꞌool dꞌa chucal.
12 Yuj chiꞌ syal Jehová dꞌa schon̈abꞌ Jerusalén icha tic: Vachꞌchom man̈xo jantacoc sbꞌisul ebꞌ aj Asiria, ma te ay yip ebꞌ yalani, palta ol satjoquel ebꞌ. A in ix vacꞌoch yaelal dꞌa eyibꞌan̈, palta man̈xa bꞌaqꞌuin̈ ol vacꞌxioch eyaelal chiꞌ.
13 Ol ex in colel dꞌa yol scabꞌ ebꞌ aj Asiria tzꞌacꞌanoch yaelal dꞌa eyibꞌan̈, ol in cotac dꞌin̈chitanbꞌat qꞌuen cadena ayoch dꞌayex yuj ebꞌ, xchi Jehová.
14 A Jehová tzꞌalan dꞌa vin̈ sreyal Asiria icha tic: Malaj in̈tilal ol ach acꞌancan bꞌinajoc. Ol in satel juntzan̈ a diosal ayecꞌ dꞌa yol a templo. Chequelxo yaj bꞌaj ol ach mucchajoc, yujto malaj elcꞌochi, xchi Jehová.
15 Ilecnabꞌi, van sjavi jun mach tzꞌalanel vachꞌ abꞌix yic juncꞌolal dꞌa jolomtac vitz. Ex aj Judá aqꞌuecoch e qꞌuin̈, cꞌanabꞌajejec bꞌaj ix eyacꞌ e tiꞌ. Man̈xalaj bꞌaqꞌuin̈ ol ex ixtaj yuj ebꞌ chuc chiꞌ, toxo ix satel ebꞌ dꞌa juneln̈ej.