A Slolonel Dios Dꞌa Vin̈aj
DANIEL
A yichbꞌanil yabꞌixal vin̈aj Daniel
1
Ayic yoxilxo abꞌil yoch vin̈aj Joacim reyal dꞌa Judá, ix cꞌoch vin̈aj Nabucodonosor sreyal Babilonia yedꞌ ebꞌ soldado, yic syacꞌan oval ebꞌ dꞌa Jerusalén. Yuj chiꞌ ix och oyan ebꞌ dꞌa spatic chon̈abꞌ chiꞌ. 2 A Dios Cajalil ix acꞌanoch vin̈aj rey Joacim chiꞌ dꞌa yol scꞌabꞌ vin̈aj Nabucodonosor chiꞌ yedꞌ juntzan̈xo ebꞌ anima aj Judá yedꞌ jantac yamcꞌabꞌ scꞌanchaj dꞌa stemplo Dios. A juntzan̈ yamcꞌabꞌ chiꞌ, ix yicꞌcot vin̈, ix javi dꞌa Babilonia tic, ix schecan vin̈ acꞌchajoch dꞌa spatil sdiosal bꞌaj sicꞌchaj tas tzꞌacꞌji dꞌa sdiosal vin̈ chiꞌ. 3 Ayic ix javi ebꞌ, ix yalan vin̈ rey chiꞌ dꞌa vin̈aj Aspenaz, aton vin̈ yajal yaj dꞌa ebꞌ yilumal sdespacho vin̈ rey chiꞌ to sicꞌchajel jayvan̈oc ebꞌ vin̈ quelemtac dꞌa scal ebꞌ yin̈tilal ebꞌ vin̈ rey aj Judá chiꞌ yedꞌ dꞌa scal ebꞌ yin̈tilal ebꞌ nivac yopisio ix icꞌchajcot chiꞌ. 4 Ix yalan vin̈ rey chiꞌ icha tic: A ebꞌ vin̈ quelemtac chiꞌ, yovalil te vachꞌ yilji ebꞌ vin̈, malaj jabꞌoc spaltail snivanil ebꞌ vin̈, jelan ebꞌ vin̈, ay spensar ebꞌ vin̈, snachajel tas yuj ebꞌ vin̈, ebꞌ vin̈ smoj val yacꞌan servil dꞌa palacio. Yovalil scꞌaybꞌej stiꞌ ebꞌ caldeo ebꞌ vin̈ yedꞌ tas tzꞌibꞌabꞌil yuj ebꞌ. 5 Ix yalanpax vin̈ rey dꞌa vin̈aj Aspenaz chiꞌ to a svael vin̈ yedꞌ svino vin̈ syabꞌlej ebꞌ vin̈ quelemtac chiꞌ, scꞌaybꞌajpax oxeoc abꞌil ebꞌ vin̈. Slajvi chiꞌ, tzꞌoch ebꞌ vin̈ yacꞌ servil vin̈ rey chiꞌ.A vin̈aj Daniel yedꞌ oxvan̈ ebꞌ vin̈ yetquelemal
6 A dꞌa scal juntzan̈ ebꞌ vin̈ quelemtac ix sicꞌchajel yuj vin̈aj Aspenaz chiꞌ, ataꞌ ayoch vin̈aj Daniel, vin̈aj Ananías, vin̈aj Misael yedꞌ vin̈aj Azarías. Aton ebꞌ vin̈ tic ix cot dꞌa scal ebꞌ yin̈tilal Judá. 7 Ix qꞌuexchaj sbꞌi ebꞌ vin̈ yuj vin̈aj Aspenaz chiꞌ. A vin̈aj Daniel chiꞌ, Beltsasar ix sbꞌiej vin̈, axo vin̈aj Ananías, Sadrac ix sbꞌiej vin̈, axo pax vin̈aj Misael, Mesac ix sbꞌiej vin̈, axo vin̈aj Azarías jun, Abed-nego ix sbꞌiej vin̈. 8 A vin̈aj Daniel chiꞌ, ix sna vin̈ to man̈ ol svalaj juntzan̈ tas ay yovalil yuj sley Dios, yuj chiꞌ ix tevi vin̈ dꞌa vin̈aj Aspenaz chiꞌ to max acꞌji pural vin̈ svaan svael vin̈ rey yedꞌ tas syuqꞌuej vin̈. 9 Ix och Dios yedꞌ vin̈aj Daniel chiꞌ, yuj chiꞌ te vachꞌ vin̈ dꞌa yol sat vin̈aj Aspenaz chiꞌ. Vachꞌchom icha chiꞌ, 10 palta ix yal vin̈aj Aspenaz chiꞌ icha tic:
—Tzin xiv dꞌa vin̈ vajalil, yujto a vin̈ ix alani tas ol e vaꞌa yedꞌ tas ol eyuqꞌuej. Qꞌuinaloc axo ol yilan vin̈ to bꞌactac ex dꞌa scal juntzan̈xo ebꞌ vin̈ quelemtac tic, ol am in schec miljoccham vin̈ rey chiꞌ eyuuj, xchi vin̈.
11 Axo vin̈aj Aspenaz chiꞌ, ix yacꞌoch jun yilumal vin̈aj Daniel chiꞌ vin̈ yedꞌ ebꞌ vin̈ oxvan̈ quelemtac chiꞌ. Yuj chiꞌ ix yal vin̈aj Daniel chiꞌ dꞌa vin̈ yilumal chiꞌ icha tic:
12 —Tzin tevi dꞌayach to tzon̈ acꞌ proval dꞌa lajun̈eoc cꞌual. An̈ej comon vael tzacꞌ dꞌayon̈, mocabꞌ acꞌ nocꞌ chibꞌej co chiꞌa, an̈ej pax a aꞌ tzacꞌ cuqꞌuej. 13 Ayic stzꞌacvi lajun̈eꞌ cꞌual chiꞌ, tzon̈ a lajbꞌan yedꞌ juntzan̈xo ebꞌ vin̈ quelemtac svaan svael vin̈ rey chiꞌ. Ichato chiꞌ syalxo acꞌan dꞌayon̈ tas ol co va chiꞌ, ato syal chajtil quiljiochi, xchi vin̈.
14 Ix schaan scꞌol vin̈ tas ix scꞌan ebꞌ vin̈ chiꞌ. Lajun̈eꞌ cꞌual ix acꞌji proval ebꞌ vin̈. 15 Axo yic ix tzꞌacvi lajun̈eꞌ cꞌual chiꞌ, ix iljiochi to te vachꞌ yilji ebꞌ vin̈, te tecꞌan ebꞌ vin̈ dꞌa yichan̈ juntzan̈xo ebꞌ vin̈ ix vaan svael vin̈ rey chiꞌ. 16 Yuj chiꞌ, majxo acꞌjilaj vael yedꞌ vino yic vin̈ rey chiꞌ dꞌa ebꞌ vin̈ yuj vin̈ yilumal ebꞌ vin̈ chiꞌ, axon̈ej comon vael ix yacꞌ vin̈ dꞌa ebꞌ vin̈.
17 A ebꞌ vin̈ quelemtac chiꞌ schan̈van̈il, ix acꞌji sjelanil ebꞌ vin̈ yuj Dios yic snachajel jantac scꞌaybꞌubꞌal ebꞌ aj Babilonia chiꞌ yuj ebꞌ vin̈ yedꞌ tas tzꞌibꞌabꞌil. Axo vin̈aj Daniel chiꞌ, ay pax sjelanil vin̈ snaanel tas syalelcꞌoch juntzan̈ vayich yedꞌ juntzan̈ tas tzꞌacꞌji yilaꞌ. 18 Axo yic ix cꞌoch stiempoal icha yalnaccan vin̈ rey, ix molbꞌaj masanil ebꞌ vin̈ quelemtac ix cꞌay chiꞌ yuj vin̈aj Aspenaz, ix yicꞌanbꞌat ebꞌ vin̈ vin̈ dꞌa yichan̈ vin̈aj rey Nabucodonosor chiꞌ. 19 Ayic ix cꞌoch ebꞌ vin̈ dꞌa yichan̈ vin̈ rey chiꞌ, ix lolon vin̈ yedꞌ ebꞌ vin̈, palta a dꞌa scal ebꞌ vin̈ quelemtac chiꞌ smasanil, malaj junoc ebꞌ vin̈ syal slajbꞌan sbꞌa yedꞌ ebꞌ vin̈ chan̈van̈ chiꞌ, aton vin̈aj Daniel, vin̈aj Ananías, vin̈aj Misael yedꞌ vin̈aj Azarías. Yuj chiꞌ ix acꞌjicanoch ebꞌ vin̈ yacꞌ servil vin̈ rey chiꞌ. 20 Juntaquel scꞌanbꞌej razón vin̈ rey chiꞌ dꞌa ebꞌ vin̈ yuj juntzan̈ jelanil yedꞌ tastac ajaltac snachajeli, ix nachajel yuj ebꞌ vin̈, lajun̈el val ecꞌto sjelanil spensar ebꞌ vin̈ chan̈van̈ chiꞌ dꞌa yichan̈ masanil ebꞌ ajchum yedꞌ ebꞌ naumel lolonel ay dꞌa yol masanil smacbꞌen vin̈. 21 Axo vin̈aj Daniel chiꞌ ix cann̈ej vin̈ dꞌa yopisio chiꞌ, masanto dꞌa bꞌabꞌel abꞌil yoch vin̈aj Ciro reyal.